Dawuda na mɛɛ súu u jyaŋi Abisalɔn ŋkwùŋi na
19
Ɲyɛ,
ka saanŋi nàvunŋɔ wuŋi si dùgʼa kàre u bage e,
kànhe tajyiɲwɔge nìɲyiŋi na,
maa sà mɛɛ sú.
U niŋkaraŋi mpyi na ŋko:
«Mii jyaŋi Abisalɔn,
mii jyaŋi,
mii jyaŋi Abisalɔn!
Mii mpyi a yaa mii i ŋkwû mu cyaga,
Abisalɔn mii jyaŋi,
mii jyaŋi.»
2 Ka wà si sà Yohabu pyi:
«Wíi,
saanŋi Dawuda wa na mɛɛ súu maa mpaare Abisalɔn ŋkwùŋi na.»
3 Ka Izirayɛli shiinbii sítaare si ŋkɛ̂ɛnŋʼa pyi yyetanhara pi punʼá kuru canŋke.
Ɲaha kurugo yɛ,
súpyirʼà lógo na saanŋi yyahe wa a sàa tanha u jyaŋi ŋkwùŋi kurugo.
4 Kàshikwɔɔnbilʼà ŋwɔhʼa jyè kànhe e kuru canŋke mu à jwo bà wà maha silige u vèŋi na,
mà yîri kàshige cyage e mɛ.
5 Saanŋi mpyi a vàanŋa tɛ̀gʼa u yyahe tò,
maa mɛɛ súu maa ŋkwúuli fànha na,
maa ŋko:
«Mii jyaŋi Abisalɔn!
Abisalɔn mii jyaŋi,
mii jyaŋi!»
6 Ɲyɛ ka Yohabu si jyè saanŋi bage e,
maa u pyi:
«Mu à ma kàshikwɔɔnbii puni sílige niɲjaa,
pire mpiimu pi à mu ná mu jyaabii ná mu pworobii ná mu cyeebii ná mu bilicyeebii nindeŋɛbii shwɔ ke.
7 Mpiimu pi à mu kyaa pɛn piyʼá ke,
pire kyaa lʼà táan mu á,
mu kyalʼà táan mpiimu á ke,
ka pire kyaa si mpɛn mu á.
Ɲaha kurugo yɛ,
mu à li cyêe niɲjaa na mu kàshikwɔɔnbii yyaha yyére shiinbii ná mu báarapyiibii ɲyɛ a sìi yafyin mu á mɛ.
Mii naha a li ɲya mu i na Abisalɔn ná mpyi shì na ka wuu puni si ŋkwû niɲjaa,
lire li mpyi na sí n-táan mu i.
8 Yîri numɛ,
ma a fworʼa báarapyiibii fɔ̀ɔnŋɔ.
Lire baare e,
mii sí n-kâa Kafooŋi mɛge na,
ná mu ɲyɛ a yîrʼa fworo mɛ,
ali shin niŋkin sì n-tɛ̀ɛn naha ná mu i ŋke numpilage e mɛ.
Lire ká mpyi,
mà lwɔ́ mu nàŋkocyawuŋi na,
mà pa nɔ niɲjaa na,
mu sàha ntêlʼa ŋgahaŋi ŋgemu ta mɛ,
uru mu sí n-ta.»
9 Ɲyɛ ka saanŋi si yîrʼa kàrʼa sà ntɛ̀ɛn kànhe tajyiɲwɔge na.
Ka pi i wà pyi u sà yi jwo kàshikwɔɔnbii punʼá:
«Saanŋi nintɛɛnŋi na wa kànhe tajyiɲwɔge na.»
Ka kàshikwɔɔnbii puni si mpa saanŋi taan.
Dawuda à núrʼa kàre Zheruzalɛmu kànhe e
Izirayɛli kàshikwɔɔnbii pi mpyi ná Abisalɔn e ke,
lire mpyi a pire ta pi à fê a kàre pi pyɛnyi i.
10 Izirayɛli tùluyi puni shiinbii mpyi na ŋko piyʼá:
«Saanŋʼà wuu shwɔ wuu zàmpɛɛnbii na.
Uru u à wuu shwɔ Filisi shiinbii na.
Numɛ,
u à fê a fworo kìni i Abisalɔn yyaha na.
11 Abisalɔn wuu mpyi a cwɔɔnrɔ mà pyi wuu saanŋi ke,
urʼà kwû kàshige cyage e.
Ɲyɛ,
ɲaha shi wuu ɲyɛ na sigili si saanŋi Dawuda pyi u núru u a ma yɛ?»
12 Ɲyɛ,
jwumpe Izirayɛli shiinbii puni mpyi na yu ke,
puru mpyi a nɔ saanŋi Dawuda na.
Ka saanŋi si tùnntunŋɔ tun u à sà sáragawwuubii Zadɔki ná Abiyatari pyi:
«Yii sà jwo ná Zhuda kacwɔɔnrɔbilʼe,
yii i pi pyi:
“Ɲaha kurugo yii a sùpyire tabɛrɛ yaha tʼà yii caanra saanŋi núruŋɔmpaŋi i yɛ?
13 Yii na ɲyɛ mii cìnmpyii,
mii kaciiyi ná mii cyeere tà ti ɲyɛ yii.
Ɲaha kurugo yii à pyi kàntugoyyere shiinbii si saanŋi núrunŋɔ mpa yɛ?”
14 Yii i Amasa pyi mú:
“Taha mu ɲyɛ mii kaciige ná mii cyere mɛ?
Mii àha mpyi mii ɲyɛ a mu yaha mu à pyi kàshikwɔɔnbii ɲùŋufooŋi Yohabu cyaga mɛ,
Kile kʼàha zìi na yaha mɛ.”»
15 Amuni Dawuda à Zhuda tùluge shiinbii puni sɔ̀nŋɔre wà tiye na mu à jwo pi à pyi shin niŋkin.
Ka pi i pìi tun pi sà saanŋi pyi:
«Núru ma a ma,
mu ná ma báarapyiibii puni.»
16 Ka saanŋi si núrʼa pa fo Zhurudɛn baŋi ɲwɔge na.
Ka Zhuda tùluge shiinbii si ŋkàre Giligali i,
si sà saanŋi ɲùŋɔ bɛ̂,
si u tɛ̀gɛ u u Zhurudɛn baŋi jyiile.
Dawuda à ɲùɲaara ta Shimeyi na
17 Bezhamɛ tùluge shinŋi Gera jyaŋi Shimeyi u mpyi na yîri Bahurimu kànhe e ke,
urʼá fyâlʼa kàrʼa sà bâra Zhuda tùluge shiinbii na,
maa ŋkàrʼa sà saanŋi Dawuda ɲùŋɔ bɛ̂.
18 Bezhamɛ tùluge shiin kampwoo (1.000) mpyi ná u e,
mà bâra Soli pyɛngɛ shiinbii báarapyiŋi Ziba ná Ziba jyaabii kɛ ná kaŋkuroŋi ná u báarapyii beɲjaaga na.
Pire mpyi a fyâlʼa sà saanŋi caanra Zhurudɛn baŋi na.
19 Bakwɔɔge ku mpyi a yaha saanŋi pyɛngɛ shiinbii ɲjyiiliŋi laagʼe ke,
lire mpyi a kuru ta ku u baŋi jyiili si sà pi lwɔ́ si saanŋi ɲyii wuuni pyi.
Tèni i saanŋi mpyi na bégeli si Zhurudɛn baŋi jyiile ke,
ka Shimeyi si niŋkure sín u fere e,
20 maa saanŋi pyi:
«Mii kàfooŋi,
ma hà na ntìimbaaŋi wíi kyaa mɛ.
Kani mu báaraapyiŋʼà pyi mu na mu canvworoge Zheruzalɛmu i ke,
funŋɔ wwɔ̀ lire na,
ma hà li yaha maye funŋʼi mɛ.
21 Ɲaha kurugo yɛ,
mu báarapyiŋʼà li cè na urʼà kapii pyi.
Lire kurugo,
bà mu ɲyii ɲya li na mɛ,
mii à pyi Yusufu baga shiinbii puni shincyiiŋi niɲjaa,
si mpa saanŋi mii kàfooŋi ɲùŋɔ bɛ̂.»
22 Ɲyɛ ka Seruya jyaŋi Abisayi si jwo:
«Shimeyi u à Kafooŋi shincwɔnrɔŋi láŋa ke,
uru ɲyɛ a yaa u bò mà?»
23 Ka Dawuda si jwo:
«Ɲaha na yii,
Seruya jyaabilʼà yii ɲwɔyi le mii karigilʼe maa yiye pyi mii zàmpɛnmii niɲjaa yɛ?
Sùpya à yaa u bò Izirayɛli shiinbilʼe niɲjaa la?
Taha pi à jwo na mii ɲyɛ a li cè na mii u ɲyɛ Izirayɛli shiinbii saanŋi niɲjaa mɛ?»
24 Ka saanŋi si Shimeyi pyi:
«Mu sì n-sìi mbò mɛ.»
Ka saanŋi si ŋkâa Shimeyi á.
Mefibosɛti à jwumabeŋɛ cya Dawuda á
25 Ɲyɛ ka Soli ɲampyige Mefibosɛti mú si ŋkàre saanŋi ɲùŋɔ tabeŋi i.
Mà lwɔ́ canŋke saanŋʼà kàre fo mà sà yaa ná u cannuruge e yyeɲiŋke e ke,
Mefibosɛti ɲyɛ a mpyi a sàa u tooyi jyé maa mahajwoŋi yaa,
maa vàanɲyi jyé mɛ.
26 U à kàrʼa sà nɔ saanŋi yyére Zheruzalɛmu i ke,
ka saanŋi si u pyi:
«Mefibosɛti,
ɲaha kurugo mu ɲyɛ a mpyi a kàre ná mii i mà yɛ?»
27 Ka u u saanŋi pyi:
«Ei saanŋi mii kàfooŋi,
mii báarapyiŋi u à mii wurugo.
Mii,
mu báarapyiŋi na ɲyɛ cwɔ̀hɔmɔ foo.
Mii mpyi a jwo mii sí na dùfaanŋke pwɔ si dùgo ku na raa sì ná saanŋi i,
28 ka mii báarapyiŋi si ŋkàrʼa sà mii mɛge kɛ̀ɛgɛ mu saanŋi mii kàfooŋi á.
Ŋka,
saanŋi mii kàfooŋi na ɲyɛ mu à jwo Kile mɛ̀lɛkɛ.
Nde lʼà táan mu á ke,
lire pyi na na.
29 Ɲaha kurugo yɛ,
kwùŋi bàare e yafyin ɲyɛ a mpyi a yaa ná mii tulyɛge pyɛngɛ shiinbii puni i,
saanŋi mii kàfooŋi yyahe taan mɛ.
Lire ná li wuuni mú i,
mu à ma báarapyiŋi le ná ma pyɛnge lyìlyiibilʼe.
Tànge ŋkire saha ku sí n-pyi mii á si yaaga ɲáara saanŋʼá yɛ?»
30 Ka saanŋi si u pyi:
«Mpe jwumpe puni ɲùŋke ku ɲyɛ ŋkire yɛ?
Mii à yi jwo a kwɔ̀ ɲjwo mu ná Ziba sí taare táa yiye na.»
31 Ka Mefibosɛti si saanŋi pyi:
«Ziba u ti puni ta,
li tɛgɛni li ɲyɛ,
saanŋi mii kàfooŋi niɲcɛnŋʼà pa u pyɛnge e.»
Barizilayi à núrʼa pa pyɛngɛ
32 Galadi kùluni shinŋi Barizilayi à yîri Orogelimu kànhe e,
maa saanŋi tùugʼa Zhurudɛn baŋi jyiile mà sà yaha kùmpoge na.
33 Barizilayi mpyi a sàa lyɛ.
U shìŋi mpyi yyee beecyɛɛre (80).
U mpyi a yyére ná saanŋi i mà u yaha Mahanayimu i,
ɲaha kurugo yɛ,
yaarafoo u mpyi a sìi u wi.
34 Ka saanŋi si Barizilayi pyi:
«Ta ma wuu a sì Zheruzalɛmu i,
mii sí n-sà n-yyére ná mu karigii puni i.»
35 Ka Barizilayi si saanŋi pyi:
«Mii shìŋi sanŋi ɲyɛ jwuuli mii núru raa wà ná saanŋi i Zheruzalɛmu i yɛ?
36 Mii shìŋi ɲyɛ yyee beecyɛɛre (80) niɲjaa.
Mii saha sí n-jà yacɛnŋɛ cè n-wwû yapege e la?
Mu báarapyiŋi saha sí n-jà u yalyige ná yabyaga tìpoomɔ cè la?
Mii saha sí n-jà mɛcenambaabii ná mɛceɲcyeebii myahigii lógo la?
Ɲaha kurugo mu báarapyiŋi saha sí n-pyi tuguro saanŋi mii kàfooŋi ɲuŋʼi yɛ?
37 Mu báarapyiŋi sí Zhurudɛn baŋi jyiile kanna ná saanŋi i.
Ɲaha kurugo saanŋi la bá ɲyɛ si lire kacɛnni pyi mii á yɛ?
38 Na yaha si núru,
si sà ŋkwû na yabiliŋi kànhe na,
na tuŋi ná na nuŋi fanŋke taan.
Ŋka wíi,
mu báarapyiŋi Kimamu,
mii jyaŋi sí baŋi jyiile ná saanŋi mii kàfooŋi i.
Nde lʼà táan mu á ke,
lire pyi urʼá.»
39 Ka saanŋi si jwo:
«Kimamu u baŋi jyiile ná mii i,
nde lʼà táan mu á ke,
mii sí lire pyi u á.
Mu aha kyaa maha kyaa cya mii á ke,
mii sí lire pyi mu á.»
40 Ɲyɛ,
sùpyire punʼà Zhurudɛn baŋi jyiilʼa kwɔ̀ ka saanŋi mú si jyiile ke,
ka saanŋi si Barizilayi pûrʼa cû maa jwó le u á,
ka Barizilayi si núrʼa kàre u pyɛnge e.
41 Saanŋʼà pa yîri na wà Giligali kàmpanŋke na,
ka Kimamu si ŋkàre ná u e.
Jwuɲyahama à yîri Zhuda shiinbii ná Izirayɛli shiinbii sanmpii shwɔhɔlʼe
Zhuda shiinbii puni ná Izirayɛli suumɔ kùlu yyére shiinbii taaga à sà saanŋi tùugo.
42 Ka Izirayɛli suumɔ kùlu yyére shiinbii si shà saanŋi fye e maa sà u pyi:
«Ɲaha kurugo wuu cìnmpyiibii Zhuda shiinbilʼà ŋwɔhʼa kàrʼa sà saanŋi ná u pyɛngɛ shiinbii ná u fyèɲwɔhɔ shiinbii puni jyiile Zhurudɛn baŋi na yɛ?»
43 Ka Zhuda shiinbii puni si Izirayɛli suumɔ kùlu yyére shiinbii pyi:
«Wuu à li pyi,
ɲaha kurugo yɛ,
u à wuu byanhara.
Ɲaha kurugo nde à yii lùgigii yîrige yɛ?
Taha saanŋi u mpyi a yyére ná wuu e lire ɲyɛ mɛ,
u à ma yaaya kan wuu á la?»
44 Ka Izirayɛli suumɔ kùlu yyére shiinbii si Zhuda shiinbii pyi:
«Saanŋi na ɲyɛ wuu wu tooyo kɛ mà tòro yii na.
Dawuda yabiliŋi na ɲyɛ wuu wu.
Ɲaha kurugo yii à wuu ɲjini faha amɛ yɛ?
Wuu bà pi à fyânha a jwo wuu la na ɲyɛ wuu saanŋi u núru u a ma mà?»
Ŋka Zhuda shiinbii mpyi na yu ná kafugʼe mà tòro Izirayɛli suumɔ kùlu yyére shiinbii na.