Dawuda kàshikwɔɔnbilʼà jà Abisalɔn wuubii na
18
Dawuda à u fyèɲwɔhɔ shiinbii tɔ̀rɔ,
maa ɲùŋufee cwɔɔnrɔ mà tìŋɛ shiin kampwoo kampwoo (1.000) ná shiin ŋkuu ŋkuu (100) ɲùŋɔ na.
2 U à u sùpyire táa tataaya taanre,
maa Seruya jyaŋi Yohabu yaha niŋɛ taage niɲcyiige ɲùŋɔ na,
maa Yohabu sìɲɛɛŋi Abisayi yaha taage shwɔnwoge ɲùŋɔ na,
maa Itayi yaha taage tanrewoge ɲùŋɔ na.
Uru mpyi na yîri Gati kànhe e.
Lire kàntugo,
ka saanŋi si sùpyire pyi:
«Mii mú sí n-kàre ná yii e.»
3 Ka sùpyire si u pyi:
«Mu ɲyɛ a sàa yaa mu u ŋkàre ná wuu e mɛ.
Ɲaha kurugo yɛ,
wuu aha fê,
lire ɲyɛ kabwoo mɛ.
Pi mɛɛ ká wuu taaga bò,
lire mú ɲyɛ kabwoo mɛ.
Ŋka mu wi ke,
mu na ɲyɛ mu à jwo wuu shiin kampwɔhii kɛ (10.000).
Lire e ke,
li sí n-pwɔ́rɔ mu u ntɛ̀ɛn naha kànhe e ma a wuu tɛ̀gɛ.»
4 Ka saanŋi si jwo:
«Ndemu lʼà ɲwɔ yii ɲyii na ke,
mii sí lire pyi.»
Ka saanŋi si sà yyére kànhe tajyiɲwɔge na,
ka kàshikwɔɔnbii puni si wá na fwore ŋkuu ŋkuu (100) ná kampwoo kampwoo (1.000).
5 Ka saanŋi si yi jwo a waha Yohabu ná Abisayi ná Itayi á,
na pi a nàɲjyibilini Abisalɔn pyi lùtaan na uru kurugo.
Ɲje saanŋi à jwo ɲùŋufeebii punʼá Abisalɔn kyaa na ke,
ka sùpyire puni si yire lógo.
6 Ka Dawuda kàshikwɔɔnbii si fworʼa kàre sige e Izirayɛli shiinbii mɛɛ na.
Ka pi i sà piye cû kàshige na Efirayimu sipuŋke e.
7 Ka Dawuda kàshikwɔɔnbii si jà Izirayɛli shiinbii na,
ka ti i mpyi kakyara nimbwɔrɔ wani.
Shiin kampwɔhii beɲjaaga (20.000) à bò kuru canŋke.
8 Kàshige mpyi a caala lire kùluni puni i.
Sùpyire tʼà kwû sipuŋke e kuru canŋke ke,
tire mpyi a ɲyaha kàshikwɔnŋwɔɔni nimbuubii na.
Yohabu à Abisalɔn bò
9 Tèni là à pa nɔ,
ka Abisalɔn si sà uye ta Dawuda kàshikwɔɔnbii yyaha yyére.
U mpyi a dùgo shwɔngɔ tùlugo dùfaanŋke ɲuŋʼi.
Ka kuru si sà jyè terebɛnti cibwɔhɔ ŋkéye shwɔhɔlʼe.
Ka Abisalɔn ɲùŋke si shwɔ̂hɔ terebɛnti cige ŋkéyi shwɔhɔlʼe mà u yáaŋa nìɲyiŋi ná ɲìŋke shwɔhɔlʼe.
Ka shwɔngɔ tùlugo dùfaanŋke si fworo u ɲwɔhʼi mà kàre.
10 Kàshikwɔnŋi wà a u ɲya pure e ke,
maa sà Yohabu pyi:
«Wíi,
mii à Abisalɔn ɲya u u fánŋi terebɛnti cige ŋkéyi shwɔhɔlʼe.»
11 Nàŋi u à sà yi jwo Yohabu à ke,
ka u u uru pyi:
«Mu à u ɲya ke,
ɲaha na mu ɲyɛ a tílʼa u bò mà yɛ?
Mii mpyi na sí wyɛ́rɛfyinŋi tɔɔnɲwɔ kɛ ná seepwɔgɔ kan mu á.»
12 Ŋka uru nàŋʼà Yohabu pyi:
«Mu mɛɛ ká wyɛ́rɛfyinŋi tɔɔnɲwɔ kampwoo (1.000) kan mii á,
mii cyɛge sì nɔ saanŋi jyaŋi na mɛ.
Ɲaha kurugo yɛ,
saanŋi à ɲjemu jwo a waha mu ná Abisayi ná Itayi á na:
“Yii shin maha shin u yaha nàɲjyibilini Abisalɔn na” ke,
wuu à yire lógo.
13 Mii ná mpyi a u bò,
yi mpyi na sì ŋiwɔhɔ saanŋi na mɛ,
mu yabiliŋi mú mpyi na sí mii tɛ̀gɛ mɛ.»
14 Ka Yohabu si jwo:
«Ná mii ɲyɛ a yîri mu taan mà!»
U à yire jwo ke,
maa tàanlii taanre lwɔ́ a cû uye cye e,
maa sà pire cûru Abisalɔn ntùŋke e.
Uru ɲyii wuŋi saha na mpyi terebɛnti cige ŋkéyi shwɔhɔlʼe.
15 Kàshikwɔɔnbii kɛŋi u mpyi maha Yohabu kàshikwɔnyaayi lwúu ke,
ka pire si sà Abisalɔn kwûulo,
maa u bwɔ̀n a bò.
16 Ɲyɛ ka Yohabu si pi pyi pi à mpuruge wyì,
ka kàshikwɔɔnbii si Izirayɛli shiinbii ŋkɔ̀rɔŋi ɲwɔ yaha,
ɲaha kurugo yɛ,
Yohabu mpyi a pi sige lire na.
17 Ka pi i Abisalɔn lwɔ́ a sà wà kacyewyibwɔhʼe sipuŋke funŋke e,
maa kafaɲaŋa nimbwɔhɔ bínni u ɲuŋʼi.
Ka Izirayɛli shiinbii puni si fê a kàre pi pyɛnyi i.
18 Mà Abisalɔn yaha shì na,
u mpyi a pi pyi pi à kafaŋkunnuŋɔ faanrʼa yyéeŋɛ saanŋi bafage e,
ɲaha kurugo yɛ,
u mpyi a jwo:
«Jya ɲyɛ a sìi mii á,
ŋgemu u sí mii mɛge pyi ku kwôro mɛ.»
Ɲyɛ ka u u u yabiliŋi mɛge le kuru kafaŋkunnuŋke na.
Pi maha ku yîri Abisalɔn kafaŋkunnuŋke ali niɲjaa.
Pi à Abisalɔn sànge wyì Dawuda á
19 Zadɔki jyaŋi Ayimasi à Yohabu pyi:
«Na yaha si fê zà ŋke kafetange jwo saanŋʼá,
na Kafooŋi à u ŋkooŋi wwû maa u shwɔ u zàmpɛɛnbii na.»
20 Ka Yohabu si u pyi:
«Mu bà u sí niɲjaa kafɛɛge kan mɛ.
Mu sí canŋkabɛrɛ wogo kan.
Niɲjaa kafɛɛge ɲyɛ a táan mɛ,
ɲaha kurugo yɛ,
saanŋi jyaŋʼà kwû.»
21 Lire kàntugo,
ka Yohabu si Etiyopi shinŋi wà pyi:
«Ta sì,
nde mu à ɲya ke,
ma a sà lire jwo saanŋʼá.»
Ka Etiyopi shinŋi si niŋkure sín Yohabu fere e,
maa ŋkwɔ̀ maa yîri na fî na wà.
22 Ka Zadɔki jyaŋi Ayimasi si núrʼa Yohabu pyi:
«Lʼaha sìi pyiŋkanna maha pyiŋkanna na ke,
na yaha si fê zhà Etiyopi shinŋi fye e.»
Ka Yohabu si jwo:
«Na jya,
ɲaha kurugo mu la ɲyɛ sʼa wà yɛ?
Mu vworo ɲyɛ tùnnture e mɛ.»
23 Ka Ayimasi si núrʼa jwo:
«Lʼaha mpyi shi o shi ke,
mii sí n-fê zhà.»
Ka Yohabu si jwo:
«Ɲyɛ,
fê a shà!»
Ka Ayimasi si Zhurudɛn bafage kuni lwɔ́ mà fê a sà Etiyopi shinŋi caanra.
24 Dawuda mpyi a tɛ̀ɛn bage ɲwɔyi shuunniŋi shwɔhɔlʼe.
Ka saɲcwɔnsigiŋi si dùgo kàtanŋke na mà sà yyére bage ɲwɔge yyetiimpe na ŋkunnuŋke ɲuŋʼi,
maa yyahe yîrigʼa wíi,
mà nàŋi wà ɲya u u fî na ma u kanni.
25 Ka saɲcwɔnsigiŋi si ŋkwúulo,
maa saanŋi sɔ̂nŋɔ.
Ka saanŋi si jwo:
«Ká mpyi u kanni u wa,
jwuntanma tajwugʼe u na ma.»
Nàŋi mpyi na byanhare na ma.
26 Ka saɲcwɔnsigiŋi si nàŋi wabɛrɛ ɲya u u fî na ma,
maa jwo fànha na pyɛnge ɲwɔge saɲcwɔnsigiŋʼá:
«Wà saha wa na fî na ma u kanni.»
Ka saanŋi si jwo:
«Jwuntanma tajwugʼe uru mú na ma.»
27 Ka saɲcwɔnsigiŋi si jwo:
«Niɲcyiiŋi fèŋkanni naha a fworo Zadɔki jyaŋi Ayimasi wuuni na mii ɲyii na.»
Ka saanŋi si jwo:
«Uru na ɲyɛ shincɛnŋɛ,
ná jwuntanmʼi uru na ma.»
28 Ayimasi à nɔ wani ke,
maa jwo fànha na saanŋʼá:
«Tapege wa a sìi mɛ.»
Lire kàntugo,
maa niŋkure sín saanŋi fère e,
maa yyahe cyígile ɲìŋke na maa jwo:
«Fwùŋi ɲyɛ Kafooŋi ,
mu Kileŋi wu.
Sùpyire ti mpyi a yîri saanŋi mii kàfooŋi kurugo ke,
uru u à tire le u cye e.»
29 Ka saanŋi si jwo:
«Nàɲjyibilini Abisalɔn à cùuŋɔ la?»
Ka Ayimasi si jwo:
«Tèni i Yohabu à mii,
mu báarapyiŋi,
ná saanŋi báarapyiŋi tun ke,
mii à supyiɲyahara ɲya ti i tùnmbwomɔ pyi,
ŋka mii ɲyɛ a mpyi a li ɲùŋke cè mɛ.»
30 Ka saanŋi si jwo:
«Sà yyére ŋkère na mɛyyere.»
Ka Ayimasi si sà yyére ŋkère na.
31 Ɲyɛ ka Etiyopi shinŋi si sà nɔ,
maa jwo fànha na:
«Saanŋi,
mii kàfooŋi u mpe jwuntanmpe lógo.
Sùpyire ti mpyi a yîri mu kurugo ke,
Kafooŋi à mu tanga kan maa mu yîge tire puni cye e niɲjaa.»
32 Ka saanŋi si Etiyopi shinŋi pyi:
«Nàɲjyibilini Abisalɔn à cùuŋɔ la?»
Ka Etiyopi shinŋi si jwo:
«Saanŋi,
mii kàfooŋi zàmpɛɛnbii puni ná mpii puni pi à yîri mu kurugo si kapii pyi mu na ke,
pire pi pyi nde nàɲjyibilini fiige.»