Usayi à cyé Ayitofɛli yɛrɛyi na
17
Ɲyɛ ka Ayitofɛli si Abisalɔn pyi:
«Na yaha si nàmbaa kampwɔhii kɛ ná shuunni (12.000) cwɔɔnrɔ si Dawuda fyè tɔ̀rɔ ŋke numpilage yabiliŋi i.
2 Mii sí n-sà u pâa si u ta u à kànha,
fànhe sʼà kwɔ̀.
Mii sí u pyi u fyá sèlʼe,
u fyèɲwɔhɔ shiinbii puni sí n-fê si u yaha.
Mii sí saanŋi kanni bò,
3 si mpa ná u fyèɲwɔhɔ shiinbii puni i si mpa ŋkan mu á.
Sùpyaŋi kurugo mu ɲyɛ ke,
uru ká ŋkwû,
sùpyire puni sí núru tiye kan mu á.
Lire ká mpyi,
sùpyire puni sí yyeɲiŋɛ ta.»
4 Ka puru jwumpe si ntáan Abisalɔn ná Izirayɛli kacwɔnribii puni i.
5 Ɲyɛ ka Abisalɔn si jwo:
«Yii Ariki kànhe shinŋi Usayi yyere mú,
wuu u mpa lógo uru ɲwɔ na mú.»
6 Usayi à pa ke,
ka Abisalɔn si u pyi:
«Ayitofɛli à mpe jwo.
Wuu u niɲjwumpe pyi laa,
wuu àha pu pyi mɛ?
Yà jwo wuu á!»
7 Ka Usayi si Abisalɔn pyi:
«Numɛ tɔɔge e,
Ayitofɛli yɛrɛge ɲyɛ a ɲwɔ mɛ.»
8 Maa núrʼa jwo:
«Mu à ma tuŋi ná u shiinbii nante shi cè.
Pi à tanha mu à jwo cànraga,
ŋgemu pyìi pi à ŋwɔhʼa cû sige e ke.
Mu tuŋi na ɲyɛ kàshikwɔnmpege,
u mú sì ɲɛɛ zhwɔ̀n ná sùpyire sannte e mɛ.
9 Numɛ sí u ta u à sà ŋwɔhɔ ɲaŋgyige kà,
lire ɲyɛ mɛ,
taŋwɔhɔge kabɛrʼe.
Kàshige tasiige e pi aha wuu shiinbii pìi bò,
sùpyire sí n-wyɛ̀rɛ yire lógo,
si jwo:
“Pi à Abisalɔn kàshikwɔɔnbii pìi bò.”
10 Lire ká mpyi,
ali kàshikwɔnmpiyi zòompii pi à tàra cànraga wu fiige ke,
pire sí n-fyá.
Ɲaha kurugo yɛ,
Izirayɛli shiinbii punʼà cè na mu tuŋi na ɲyɛ kàshikwɔnmpege,
u fyèɲwɔhɔ shiinbii si ɲyɛ kàshikwɔnmpiye.
11 Lire e ke,
mii à li cya mu á,
ma a Izirayɛli kàshikwɔɔnbii puni yaha pi piye bínni mu taan,
mà lwɔ́ Dan kànhe na,
mà sà nɔ fo Bɛrisheba kànhe na.
Pi sàa ɲyaha suumpe lwɔhe ɲwɔge nticyɛnŋi fiige.
Mu yabiliŋi sʼa wà kàshigʼá.
12 U à sìi cyaga maha cyagʼe ke,
wuu sí u ɲya si ntîge u ɲuŋʼi mu à jwo kamɛŋɛ kʼà tîgʼa ɲìŋke ɲuŋʼi.
U ná u shiinbii puni,
pi wà sì zhwɔ mɛ.
13 U aha ŋkàrʼa sà ŋwɔhɔ kànhe kà na,
Izirayɛli shiinbii puni sí n-kàre ná mɛɛre e kuru kànhe mɛɛ na,
si ku dìri zà wà fo dùge e.
Ali kafaaga sì n-kwôro mɛ.»
14 Ka Abisalɔn ná Izirayɛli shiinbii puni si jwo:
«Ariki kànhe shinŋi Usayi à yɛrɛge ŋkemu kan ke,
kurʼà pwɔ́rɔ Ayitofɛli woge na.»
Kafooŋi mpyi a li lwɔ́ si Ayitofɛli yɛrɛge niɲcɛnŋke kɛ̀ɛgɛ si kapii nɔ Abisalɔn na.
Dawuda à Zhurudɛn baŋi jyiile
15 Ka Usayi si sáragawwuubii Zadɔki ná Abiyatari pyi:
«Ayitofɛli à ŋke yɛrɛge kan Abisalɔn ná Izirayɛli kacwɔnrɔbilʼá,
ka mii i ŋke yɛrɛge kan.
16 Numɛ,
yii fyâlʼa sà yi jwo Dawuda á na u àha zhwɔ̀n síwage bafage e mɛ,
ŋka u baŋi jyiile u ná u fyèɲwɔhɔ shiinbii puni kà ŋkwɔ̀ mbò mɛ.»
17 Zhonatan ná Ayimasi mpyi a kwòro Ɛni-Orogɛli cyage e.
Jwumpe pi mpyi na sí n-sà n-jwo saanŋi Dawuda á ke,
báarapyicwoŋi wà u mpyi a yaa u sà puru yyaha jwo pi á.
Ɲaha kurugo yɛ,
wà ɲyɛ mpyi a yaa u pi ɲya tajyige e kànhe e mɛ.
18 Ŋka,
nàɲjiiŋi wà à pi ɲya,
maa sà yi jwo Abisalɔn á.
Ka pire tùnntunmpii mú shuunniŋi puni si fyâlʼa kàrʼa sà nɔ nàŋi wà pyɛngɛ na Bahurimu kànhe e.
Bɛ̀ɛnŋɛ na mpyi uru pyɛnge e,
ka pi i sà ntîgʼa ŋwɔhɔ kurʼe.
19 Ka nàŋi cwoŋi si vàanŋa lwɔ́ a sà mpìli bɛ̀ɛnŋke ɲwɔge na,
maa sùma nizirawa lwɔ́ mà sà ɲcɛɛgɛ ku ɲuŋʼi,
wà kà ŋkwɔ̀ yi yyaha cè mɛ.
20 Ka Abisalɔn tùnntunmpii si sà jyè pyɛnge e maa ceeŋi pyi:
«Taa Ayimasi ná Zhonatan ɲyɛ ke?»
Ka ceeŋi si pi ɲwɔ shwɔ:
«Pi à lwɔhe jyiile.»
Ka pi i wa na pi caa,
ŋka pi ɲyɛ a pi ɲya mɛ,
maa núrʼa kàre Zheruzalɛmu i.
21 Pi à kàre ke,
ka Ayimasi ná Zhonatan si fworo bɛ̀ɛnŋke e,
maa ŋkàrʼa sà yi yyaha jwo saanŋi Dawuda á.
Pi à sà u pyi:
«Yii yîri yii i baŋi jyiile fwɔfwɔ,
ɲaha kurugo yɛ,
Ayitofɛli à Abisalɔn yɛrɛ,
na u pa yii mɛɛ na.»
22 Ka Dawuda ná u fyèɲwɔhɔ shiinbii puni si ntílʼa yîri,
maa Zhurudɛn baŋi jyiile.
Mà jwo ɲyɛ̀ge ku múgo ke,
lirʼà pi puni ta pi à jyiile,
ali shin niŋkin ɲyɛ a kwôro Zhurudɛn baŋi kàntugo mɛ.
23 Ayitofɛli à li ɲya na uru yɛrɛyi kuni ɲyɛ a ɲaara mɛ,
ka u u dùfaanŋke pwɔ,
maa kuni lwɔ́ mà kàre u pyɛnge e,
u kànhe na,
maa sà u pyɛnge karigii cwɔɔnrɔŋkanni yyaha jwo u pyɛnge shiinbilʼá,
maa uye pwɔ a bò.
Lire kwùŋkanni na u à kwû,
ka pi i sà u tò u tuŋi fanŋke e.
Dawuda à kàre Mahanayimu kànhe e
24 Dawuda à sà nɔ Mahanayimu kànhe e,
lirʼá Abisalɔn ta u u Zhurudɛn baŋi jyiili,
u ná Izirayɛli shiinbii puni pi mpyi ná u e ke.
25 Ka Abisalɔn si Amasa tɛ̀gʼa Yohabu fáa kàshikwɔɔnbii yyaha yyérente na.
Amasa na mpyi Izirayɛli shinŋi wà jya,
uru mɛgɛ mpyi Yitira.
Yitira u mpyi a Abigali lèŋʼa pyi u cwo.
Abigali na mpyi Nakasi pworo,
Nakasi si mpyi Seruya cìnmpworocwo,
Seruya u mpyi Yohabu nuŋi.
26 Ɲyɛ,
Izirayɛli shiinbii ná Abisalɔn à sà pi tatɛɛnge yaa Galadi kùluni i.
27 Dawuda à sà nɔ Mahanayimu kànhe e ke,
Nakasi jyaŋi Sobi u mpyi na yîri Amoni shiinbii kànhe Araba e ke,
ná Amiyɛli jyaŋi Makiri u mpyi na yîri Lodebara kànhe e ke,
ná Galadi kùluni shinŋi Barizilayi u mpyi na yîri Orogelimu kànhe e ke,
28 ka pire si shà ná yasinniyi ná vàanɲya ná yajigiyi ná alikamaŋi ná orizhiŋi,
ná mbyimɛ,
ná sùmafwɔgɔ ná jàhii kuuyo shuunni,
ná bìlii nivwɔgii,
29 ná sɛrɛ ná yalyire kuuyo shuunni,
nùjirimpʼà tɛ̀gʼa ntemu yaa ke,
ná mpàa ná nùyeŋi i mà sà ŋkan Dawuda ná u fyèɲwɔhɔshiinbilʼá pi lyî.
Ɲaha kurugo yɛ,
pi mpyi na ŋko:
«Nte sùpyirʼà kyaala katege ná kanhare ná byage cye e síwage e.»