Dawuda ná Ziba kani
16
Dawuda à tòro ɲaŋke ɲùɲcyage taan cyage ŋkemu i ke,
ka Mefibosɛti báarapyiŋi Ziba si mpa u círi ná dùfaaɲya shuunni nimpwɔyʼe.
Bwúuruɲuɲyɔ ŋkwuu shuunni (200) ná ɛrɛzɛn waare pwɔ̀hii ŋkuu (100) ná bɛnge cire yasɛɛre pwɔ̀hii ŋkuu (100) ná ɛrɛzɛn sinmpe sɛɛgɛ boɲyɛgɛ mpyi yi ɲuŋʼi.
2 Ka saanŋi si Ziba pyi:
«Ɲaha shi mu sí raa mpyi ná yʼe yɛ?»
Ka Ziba si u pyi:
«Saanŋi pyɛngɛ shiinbii sí raa dùru dùfaanɲyi na,
bwúuruŋi ná cire yasɛɛre sí n-pyi kàshikwɔɔnbii yalyire.
Mpiimu pi à kànha síwage e ke,
ɛrɛzɛn sinmpe sí n-tɛ̀gɛ pire kanhare kwɔ̀.»
3 Ka saanŋi si jwo:
«Taa mu ɲùŋufooŋi ɲampyige ɲyɛ ke?»
Ka Ziba si saanŋi ɲwɔ shwɔ:
«U à tɛ̀ɛn wani Zheruzalɛmu i,
ɲaha kurugo yɛ,
u na sɔ̂nŋi na Izirayɛli shiinbii sí uru tulyɛge saanre núruŋɔ ŋkan urʼá niɲjaa.»
4 Ka saanŋi si Ziba pyi:
«Wíi,
Mefibosɛti cyeyaayi punʼà pyi mu wuyo.»
Ka Ziba si jwo:
«Mii à niŋkure sín mu á,
saanŋi mii kàfooŋi.
Kile u na kyaa táan ma á sahaŋki.»
Dawuda ná Shimeyi kani
5 Dawuda à kàrʼa sà byanhara Bahurimu kànhe na,
ka Soli cìnmpworoŋi wà si fworo na Dawuda láŋi na ma.
U mɛgɛ mpyi Shimeyi maa mpyi Gera jya.
6 Ka u u wa na Dawuda ná u báarapyiibii puni wàa ná kafaayi i,
ali mà li ta sùpyire puni ná kàshikwɔnmpiyi mpyi saanŋi Dawuda kàniŋke ná u kàmɛni na.
7 Shimeyi mpyi na laŋaŋke pyi:
«Ta wà,
ta wà,
supyiboŋɔ wà we,
shinpi wà we!
8 Mu à Soli pyɛngɛ shiinbii mpiimu bò maa saanre tatɛɛnge shwɔ u na ke,
Kafooŋi u pi sìshange ŋkooŋi wwû ma na.
Kafooŋi à saanre shwɔ mu na mà kan mu jyaŋi Abisalɔn á.
Mu u ŋge yyefuge e numɛ,
lʼà yaa ná mu i,
ɲaha kurugo yɛ,
mu na ɲyɛ shinbuŋɔ.»
9 Ɲyɛ ka Seruya jyaŋi Abisayi si saanŋi pyi:
«Ɲaha kurugo ŋke pùnŋkwuge na saanŋi mii kàfooŋi láŋi yɛ?
Na yaha si sà u ɲùŋke kwɔ̀n.»
10 Ka saanŋi si jwo:
«Seruya jyaabii,
yii kuro na wa yire e la?
U aha a laŋaŋke pyi,
li sí n-ta Kafooŋi u à yi jwo u á:
“Dawuda láŋa!”
Ɲyɛ,
jofoo u sí n-jà n-jwo:
“Ɲaha kurugo mu à nde pyi yɛ?”»
11 Lire kàntugo,
ka Dawuda si Abisayi ná u báarapyiibii puni pyi:
«Yii à li ɲya kɛ,
mii yabiliŋi jyasege na mii múnaani caa raa wwû cyage ŋkemu i ke,
wà raa Bezhamɛ tùluge shinŋi ŋge kyaa yu la?
Yii u yaha u a laŋaŋke pyi,
kampyi Kafooŋi u à yi jwo u á.
12 Lʼe Kafooŋi sí mii yyefuge wíi,
laŋaŋke mii à ta niɲjaa ke,
si kacɛnnɛ tɛ̀gɛ kuru fwooni tò mii à.»
13 Ka Dawuda ná u shiinbii si pi ɲani sogo.
Ka Shimeyi si wá na wà Dawuda sìcampe na ɲaŋke numpɛnge na,
maa laŋaŋke pyi na wà,
maa kafaayi tɛ̀gɛ na u wáa,
maa pwoore kure na wàa nìɲyiŋi i.
14 Saanŋi ná sùpyire puni ti mpyi ná u e ke,
ka pi i ŋkàrʼa sà nɔ pi tashage e.
Pi mpyi a kànha,
ka pi i ŋɔ wani.
Usayi ná Abisalɔn kani
15 Abisalɔn ná Izirayɛli kàshikwɔɔnbii puni mpyi a jyè a kwɔ̀ Zheruzalɛmu i.
Ayitofɛli mú mpyi a kàre ná u e.
16 Dawuda cevooŋi Usayi,
Ariki shinŋʼà sà nɔ Abisalɔn cyage e ke,
maa u pyi:
«Kile u shì kan saanŋʼá!
Kile u shì kan saanŋʼá!»
17 Ka Abisalɔn si Usayi pyi:
«Mu cempe pyiŋkanni li ɲyɛ nde ná ma cevooŋi i la?
Ɲaha kurugo mu ɲyɛ a kàre ná ma cevooŋi i mà yɛ?»
18 Ka Usayi si Abisalɔn ɲwɔ shwɔ:
«Ɔnhɔ!
Kafooŋi ná sùpyire ná Izirayɛli kàshikwɔɔnbii punʼà ŋgemu cwɔɔnrɔ ke,
ná urufolʼe mii ɲyɛ,
mii sí n-kwôro ná urufolʼe.
19 Jofolʼá mii bá sí raa báare ná u jyaŋi bàlʼa yɛ?
Bà mii à báaraŋi pyi mu tuŋʼá mɛ,
amuni mii sí báaraŋi pyi mu á.»
20 Ka Abisalɔn si Ayitofɛli pyi:
«Yii yiye ɲya yii i ɲwɔ kyaa na,
ndemu wuu à yaa wuu pyi ke.»
21 Ka Ayitofɛli si Abisalɔn pyi:
«Mu tuŋʼà u bilicyeebii nindeŋɛbii mpiimu yaha pi à pyɛnge kàanmucaa ke,
sà sínni ná pi e.
Lire e Izirayɛli shiinbii puni sí li cè na mu à ma tuŋi lùuni yîrige.
Lire ká mpyi,
sùpyire ti ɲyɛ ná mu i ke,
pire puni zòompii sí n-tàra.»
22 Ka pi i vàanŋabaga kwòro bage kàtanŋke ɲuŋʼi Abisalɔn á.
Ka Abisalɔn si u tuŋi bilicyeebii nindeŋɛbii sínniŋɛ Izirayɛli shiinbii puni ɲyii na.
23 Lire tèni i,
Ayitofɛli yɛrɛyi niŋkanyi mpyi maha le ɲjire e mu à jwo Kile yabiliŋi jwumpe.
Amuni u jwumpe mpyi Dawuda á,
amuni pu mpyi Abisalɔn á.