Abisalɔn ɲùŋkyaanre
15
Lire kàntugo,
ka Abisalɔn si kàshikwɔnwotoro cya ná shwɔnyɔ ná shiin beeshuunni ná kɛ,
mpimu pi mpyi maha fî u yyaha yyére ke.
2 U mpyi maha sôlʼa yîri,
maa ŋkàrʼa sà yyére kuni ɲwɔge na,
kànhe tajyiɲwɔge na.
Yogo kyaa ná mpyi wà ɲùŋɔ taan,
ka urufoo si wá na ŋkɛ̀ɛge li tacwɔnrɔge e saanŋi yyére,
Abisalɔn mpyi maha urufoo yyere maa u pyi:
«Kànhe ŋkire na mu à yîri yɛ?»
Urufoo ká jwo:
«Mu báarapyiŋʼà yîri Izirayɛli tùluge ŋke cyiin na,»
3 Abisalɔn mpyi maha jwo:
«Mu kataanmpʼà ɲwɔ maa ntíi,
ŋka sùpya ɲyɛ saanŋi pyɛnge e,
ŋgemu u sí n-lógo mu á mɛ.»
4 Abisalɔn mú mpyi maha jwo:
«Ká mpyi mii u mpyi nde kìni yukyaaŋi,
wà ná mpyi a pa ná yukyaala kyaa,
lire ɲyɛ mɛ,
kani làbɛrʼe mii yyére,
mii mpyi na sí lire kani cwɔɔnrɔ ná ntìiŋi i.»
5 Wà ná mpyi a shà niŋkure sín u fere e,
u mpyi maha urufoo cû cyɛge na maha yîrige maa u pûrʼa cû.
6 Izirayɛli shiinbii puni pi mpyi maha ma na yuyi karigii cwɔɔnre saanŋi yyére ke,
lire Abisalɔn mpyi maha mpyi ná pire e.
Lire pyiŋkanni na Abisalɔn à Izirayɛli shiinbii ɲùmbogigii kɛ̂ɛnŋɛ uye yyére.
7 Yyee sicyɛɛrʼà tòro ke,
ka Abisalɔn si saanŋi pyi:
«Kuni kan na á si shà Eburɔn kànhe e,
mii mpyi a ɲwɔfaaga fáa Kafooŋi á,
si sà kuru wwû.
8 Ɲaha kurugo yɛ,
tèni i mu báarapyiŋi mpyi Geshuri kànhe e,
Siri kìni i ke,
mii à ɲwɔfaaga fáa,
ɲjwo:
“Kafooŋi ká mii yaha mii à jà a núrʼa pa Zheruzalɛmu i,
mii sí sáraga wwû u á.”»
9 Ka saanŋi si u pyi:
«Ta sì yyeɲiŋke e.»
Ka Abisalɔn si yîrʼa kàre Eburɔn e.
10 Mà u yaha wani,
ka u u pìi ŋwɔhʼa tun Izirayɛli tùluyi puni i pi sà jwo:
«Yii aha mpuruge mɛɛni lógo,
yii i jwo:
“Abisalɔn à pyi saanŋi Eburɔn kànhe e.”»
11 Abisalɔn mpyi a nàmbaa ŋkwuu shuunni (200) yyerʼa yîri Zheruzalɛmu i mà kàre.
Pire mpyi a kàre ná u e jwuɲyahama bàa,
mà ta pi ɲyɛ a pà cè nde kani i mɛ.
12 Mà Abisalɔn yaha sárayi ŋgwùŋi na,
u à pi pyi pi à sà Gilo kànhe shinŋi Ayitofɛli yyere Gilo e mà pa.
Uru na mpyi Dawuda yɛrɛfoo.
Ka vùnmpwɔɔre si fànha ta,
ka là si wá na bârali Abisalɔn sùpyire ɲyahaŋi na,
na wà.
Dawuda vèŋi
13 Ka wà si sà Dawuda pyi:
«Izirayɛli shiinbii ɲùmbogigii wa a kɛ̂ɛnŋɛ Abisalɔn kàmpanŋke na.»
14 Ɲyɛ,
báarapyiibii pi mpyi ná Dawuda e Zheruzalɛmu i ke,
ka u u pire puni pyi:
«Yii yîri wuu a fî,
lire baare e,
tashwɔgɔ ɲyɛ a sìi wuu na Abisalɔn na mɛ.
Yii a fyâa wuu a sì,
lire baare e,
u sì mɔ si cye taha wuu na mɛ.
U sí wuu bwɔ́n si mbò si kànhe puni kakyara ná kàshikwɔnŋwɔɔni i.»
15 Ka saanŋi báarapyiibii si u pyi:
«Kyaa maha kyaa lʼà táan saanŋi mii kàfooŋi á ke,
mu báarapyiibii sí lire pyi.»
16 Ka saanŋi si yîrʼa fworo ná u pyɛngɛ shiinbii puni i tɔɔre na,
maa u bilicyeebii nindeŋɛbii shiin kɛ yaha wani,
pi raa pyɛnge kàanmucaa.
17 Saanŋʼà fworo,
ka sùpyire puni si ntaha u fye e,
ka pi i ŋkàrʼa sà yyére bage nizanŋke kàntugo yyére.
18 Ka saanŋi báarapyiibii puni ná Kereti shiinbii puni ná Pelɛti shiinbii puni si wá na ntùuli u ŋkère na.
Gati shiinbii ŋkwuu baaniŋi (600) pi mpyi a pa si mpa ntaha u fye e mà yîri Gati kànhe e ke,
ka pire si ntòro saanŋi yyaha yyére.
19 Ka saanŋi si Gati shiinbii yyaha yyére shinŋi Itayi pyi:
«Ɲaha kurugo mu mú à taha wuu fye e yɛ?
Núrʼa sà ntɛ̀ɛn saanŋi nivɔnŋi taan,
ɲaha kurugo yɛ,
nàmpɔnŋɔ u ɲyɛ mu.
Mu à kɔ̀rɔ ma kìni i.
20 Mu à pa li sàha mɔ mɛ,
mii i ŋkwɔ̀ à mu pyi mu u a fyínge raa mâre niɲjaa ná wuu e,
mii yabiliŋi si ɲyɛ a na tashage cè mà la!
Núru ma a sì ná ma cìnmpyiibilʼe.
Kafooŋi u ɲwɔ ma na,
u u u ɲwɔmɛfente fûnŋɔ ma á.»
21 Ka Itayi si saanŋi ɲwɔ shwɔ:
«Kafooŋi ɲyii wuŋi mɛge na,
ná saanŋi mii kàfooŋi ɲyii wuŋi mɛge na,
cyaga maha cyagʼe saanŋi mii kàfooŋi ɲyɛ ke,
lʼà pyi kwù yo,
lʼà pyi shì yo,
wani mu báarapyiŋi mú sí n-pyi.»
22 Ka Dawuda si Itayi pyi:
«Ɲyɛ,
tòro wuu a sì.»
Ka Gati kànhe shinŋi Itayi si ntòro yyaha yyére ná u kàshikwɔɔnbii puni ná u shiinbii puni i.
23 Mà sùpyire yaha ti i ntùuli,
ka kuru cyage sùpyire puni si wá na myahii súu maa ŋkwúuli.
Ka saanŋi si Sedurɔn bafage jyiile,
ka sùpyire puni si ntaha u fye e,
ka pi i sà síwage kuni lwɔ́.
24 Zadɔki mú na mpyi wani mà bâra Levi tùluge shiinbii puni pi mpyi a Kile tunmbyaare mbwùuni tugo ke.
Ka pi i Kile tunmbyaare mbwùuni tîrige,
ka Abiyatari si wá na sárayi wwû,
fo mà sà yaa ná sùpyire e pi à fworo kànhe e mà sà ŋkwɔ̀.
25 Ka saanŋi si Zadɔki pyi:
«Núru ma a sì ná Kile tunmbyaare mbwùuni i kànhe e.
Ká mpyi mii kyalʼà táan Kafooŋi á,
u sí mii yaha mii i núrʼa pa naha si tunmbyaare mbwùuni ná li tatɛɛnge ɲya.
26 Ŋka,
u aha mii pyi:
“Mu kyaa sàha ɲyɛ a táan mii á mɛ,”
nde lʼà táan u á ke,
u lire pyi na na.»
27 Ka saanŋi si núrʼa sáragawwuŋi Zadɔki pyi:
«Wíi,
núru ma a sì yyeɲiŋke e kànhe e ná yii jyaabii shuunniŋi i,
mu jyaŋi Ayimasi ná Abiyatari jyaŋi Zhonatan e.
28 Mii sí n-sà ntɛ̀ɛn síwage bafage e,
fo mii aha kafɛɛgɛ ta mà yîri yii yyére tèni ndemu i ke.»
29 Lire pyiŋkanni na Zadɔki ná Abiyatari à núrʼa kàre ná Kile tunmbyaare mbwùuni i Zheruzalɛmu kànhe e maa sà ntɛ̀ɛn wani.
30 Dawuda mpyi a dùgʼa kàre Oliviye cire ɲaŋke ɲuŋʼi.
U mɛɛsuwuŋi u mpyi na ku dùru,
maa ɲùŋke tò,
maa wà nintapyaŋi na.
Mpii pi mpyi ná u e ke,
pire puni mpyi a pi ɲùɲyi tò,
maa mɛɛ súu na dùru.
31 Ka wà si mpa Dawuda pyi:
«Ayitofɛli na wa ná Abisalɔn e vùnmpwɔɔre e.»
Ka Dawuda si jwo:
«Kafooŋi ,
mii na mu ɲáare,
Ayitofɛli yɛrɛyi yaha yi pyi kaɲwɔɔ bàa.»
32 Dawuda à kàrʼa sà nɔ ɲaŋke ɲùɲcyage e Kile tapeeŋke e ke,
ka Ariki shinŋi Usayi si u ɲùŋɔ bɛ̂.
Vàanntinɲcwɔngɔ mpyi u na,
u ɲùŋke puni si ɲyɛ pwoore na.
33 Ka Dawuda si u pyi:
«Mu aha ŋkàre ná mii i,
mu sí n-pyi tuguro mii á.
34 Ŋka núru ma a sì pyɛngɛ maa sà Abisalɔn pyi:
“Saanŋi,
mii sí raa báare mu á.
Tèni lʼe,
mii mpyi mu tuŋi báarapyi,
ŋka numɛ,
mii sí raa báare mu á.”
Mu aha lire pyi,
yɛrɛyi Ayitofɛli à kan mii mɛɛ na ke,
mu sí yire pyi kaɲwɔɔ bàa.
35 Taha sáragawwuubii Zadɔki ná Abiyatari sì n-pyi wani ná mu i mɛ?
Mu aha ɲjemu lógo mà yîri saanŋi pyɛnge e ke,
maa yire puni jwo sáragawwuubii Zadɔki ná Abiyatari á.
36 Pi jyaabii shuunniŋi,
Zadɔki jyaŋi Ayimasi ná Abiyatari jyaŋi Zhonatan sí n-pyi ná pi e wani.
Yii aha ɲjemu lógo ke,
yii i pire yaha pi yi puni nɔ na na.»
37 Ka Dawuda cevooŋi Usayi si núrʼa kàre Zheruzalɛmu kànhe e,
lirʼà Abisalɔn mú ta u u jyè wani kànhe e.