Abisalɔn à núrʼa kàre Zheruzalɛmu i
14
Seruya jyaŋi Yohabu à li kàanmucya mà li ɲya na Abisalɔn kani na ɲyɛ saanŋi funŋʼi,
2 ka u u wà tun u à sà ceeŋi wà yyere Tekuwa kànhe e.
Uru ceeŋi mpyi a cyîige.
Ka Yohabu si u pyi:
«Maye pyi mu à jwo sùpya u à kwû mu á,
ma a yamɛsu vàanɲyi le.
Ma hà nùguntanga sìnmɛ tìri mɛ,
ma a maye pyi mu à jwo shinŋi u ɲyɛ na yamɛɛ súu mà lwɔ́ fo tèemɔni i ke.
3 Ma a shà saanŋi yyére,
mii sí ɲjemu jwo mu á ke,
ma a sà yire jwo u á.»
Ɲje ceeŋʼà yaa u sà jwo ke,
ka Yohabu si yire jwo a kan u á.
4 Ka Tekuwa kànhe cwoŋi si ŋkàre si sà jwo ná saanŋi i,
maa sà niŋkure sín maa yyahe cyígile ɲìŋke na u yyahe taan maa jwo:
«Saanŋi,
ɲwɔ na na.»
5 Ka saanŋi si jwo:
«Ɲaha kyaa li ɲyɛ mu na yɛ?»
Ka ceeŋi si jwo:
«Ei saanŋi,
mii na ɲyɛ leŋkwucwo,
mii pooŋʼà kwû.
6 Jyaa shuunni na mpyi mu báarapyicwoŋʼá.
Pirʼà tùn sige e,
sùpya ɲyɛ a mpyi a byanhara si pi láhala mɛ,
ka wà si u sanŋi bwɔ̀n a bò.
7 Lirʼà pyi ke,
ka tɛɛnni shiinbii puni si yîri mu báarapyicwoŋi kurugo,
maa jwo na ŋge u à u shɛ̀rɛfooŋi bò ke,
na mii i uru kan pirʼá pi bò si niŋkwuŋi ŋkooŋi wwû u na.
Lire pyiŋkanni na,
pire sí koolyiŋi bò.
Sɔ̀nŋɔre tatahage nimbileni li ɲyɛ mii á ke,
lire pyiŋkanni na pi la ɲyɛ si lire pînniŋɛ,
si mii pooŋi mɛge ná u tùluge shi tò ɲìŋke na.»
8 Ka saanŋi si ceeŋi pyi:
«Ta sì pyɛngɛ,
mii sí nde kani cwɔɔnrɔ mu á.»
9 Ka Tekuwa kànhe cwoŋi si saanŋi pyi:
«Ei saanŋi mii kàfooŋi,
uru ɲcɛ̀ɛgɛŋi sí n-pyi mii ná na tuŋi pyɛnge wu,
ɲcɛ̀ɛgɛ sì saanŋi ná u saanre yatɛɛnŋke ta mɛ.»
10 Ka saanŋi si jwo:
«Wà ká yà jwo mu na,
ta ma ná urufolʼe naha mii yyére.
Urufoo sàha sì nɔ mu na mɛ.»
11 Ka ceeŋi si jwo:
«Mii à li ɲáare saanŋʼá u kâa Kafooŋi u Kileŋi na,
bà li si mpyi,
ŋkowwuvooŋi kà n-kwɔ̀ là bâra kakyaare na,
si na jyaŋi bò mɛ.»
Ka saanŋi si jwo:
«Kafooŋi ɲyii wuŋi mɛge na,
mu jyaŋi ɲùɲjuŋke kà niŋkin sì n-cwo ɲìŋke na mɛ.»
12 Ka ceeŋi si jwo:
«Ma báarapyicwoŋi yaha u kyaa niŋkin jwo saanŋi,
mii kafooŋʼá.»
Ka saanŋi si jwo:
«Li jwo!»
13 Ka ceeŋi si jwo:
«Ɲaha kurugo mu sʼa lire shiŋi pyi Kile shiinbii na yɛ?
Saanŋi,
mà tàanna ná mu numɛ jwumpe e,
mu à jwumpe cyán maye na,
ɲaha kurugo yɛ,
mu jyaŋi u à fê ke,
mu ɲyɛ a uru pyi u à núrʼa pa mɛ.
14 Lʼà fínniŋɛ na wuu puni sí n-kwû.
Wuu sí n-pyi mu à jwo lwɔhɔ kʼà wu,
ŋkemu ku ɲyɛ ku sàha sì n-jà n-kuu mɛ.
Kile la ɲyɛ si múnaa wwû mɛ,
u la na ɲyɛ,
shinfeŋi kà mpînni mɛ,
ŋka u núrʼa pa uru yyahe taan.
15 Ɲyɛ,
mu aha mii ɲya mii à pa mpe jwumpe jwo saanŋi mii kàfooŋi á,
labɛrɛ bà mɛ,
sùpyire tʼà mii pyi mii à fyá.
Lire kurugo mu báarapyiŋʼà jwo uye funŋʼi:
“Mii sí n-sà jwo ná saanŋi i,
saanŋi ká ŋkwɔ̀ a ɲɛnʼa u báarapyicwoŋi niɲjwumpe pyi.
16 Shinŋi u ɲyɛ na saanŋi báarapyicwoŋi ná u jyaŋi caa raa bùu si wuu shi pînniŋɛ Kile kìni niŋkanni i u shiinbilʼá ke,
saanŋi sí n-lógo mii á si mii shwɔ urufoo na.”
17 Mu báarapyicwoŋʼà jwo uye funŋʼi:
“Saanŋi,
mii kàfooŋi jwumpe sí funɲiŋɛ kan mii á.
Ɲaha kurugo yɛ,
saanŋi mii kàfooŋi na ɲyɛ Kile mɛ̀lɛkɛ fiige,
ŋgemu u maha jà a kacɛnni ná kapiini cê a wwû yiye e ke.
Kafooŋi ,
mu Kileŋi u pyi ná mu i.”»
18 Ka saanŋi si ceeŋi pyi:
«Kani yibige mii sí n-pyi mu na ke,
ma hà yafyin ŋwɔhɔ na na lʼe mɛ.»
Ka ceeŋi si jwo:
«Saanŋi,
mii kàfooŋi,
ta yu.»
19 Ka saanŋi si jwo:
«Mpe puni mu ɲyɛ na yu ke,
Yohabu fyè ɲyɛ pʼe mà?»
Ka ceeŋi si jwo:
«Saanŋi mii kàfooŋi,
mu ɲyii wuŋi mɛge na,
saanŋi mii kàfooŋi ká yaaga maha yaaga jwo ke,
mii sì n-fɛ̂ɛn zhà kàniŋke lire ɲyɛ mɛ,
kàmɛni na puru kàmpanŋke na mɛ.
Sèeŋi na,
mu báarapyiŋi Yohabu u à yi yyaha jwo mii á maa mpe jwumpe puni le mu báarapyicwoŋi ɲwɔge e.
20 Mu báarapyiŋi Yohabu à nde pyi si ŋkɛ̀ɛnŋɛ lèŋɛ nde kani i.
Ŋka mii kàfooŋʼà karigii cè Kile mɛ̀lɛkɛ fiige,
maa ɲìŋke karigii puni cè.»
21 Ɲyɛ ka saanŋi si Yohabu pyi:
«Mii à ɲɛɛ,
ta sì ma a sà a ma ná nàɲjyibilini Abisalɔn e.»
22 Ka Yohabu si niŋkure sín,
maa yyahe cyígile ɲìŋke na maa jwó le saanŋʼá,
maa jwo:
«Saanŋi,
mii kàfooŋi,
mu báarapyiŋʼà li cè niɲjaa na mii kyalʼà táan mu á.
Ɲaha kurugo yɛ,
nde saanŋi báarapyiŋʼà cya u á ke,
u à lire pyi.»
23 Ka Yohabu si yîrʼa kàre Geshuri i maa sà mpa ná Abisalɔn e Zheruzalɛmu i.
24 Ka saanŋi si jwo:
«Abisalɔn u tɛ̀ɛn u bage e,
u ɲyiini kà ntɛ̀gɛ mii na mɛ.»
Ka Abisalɔn si ŋkàre u pyɛnge e,
u ɲyiini ɲyɛ a tɛ̀gɛ saanŋi na mɛ.
Dawuda á u ná Abisalɔn yoge kwɔ̀
25 Izirayɛli shiinbii puni shwɔhɔlʼe,
sùpya lemɛ ɲyɛ a mpyi a sàa ɲwɔ mà Abisalɔn kwɔ̀,
mà lwɔ́ u nintahigii na,
mà sà nɔ fo u ɲùŋke na mɛ.
Cwò cyaga ɲyɛ a mpyi a sìi u na mɛ.
26 Yyee maha yyee,
u mpyi maha u ɲùŋke kûlu,
ɲaha kurugo yɛ,
u ɲùɲjwoore mpyi maha ntɔɔn maa dùgo.
U ɲùɲjwoore dugumpe mpyi maha cúlii shuunni ná paanga kwɔ̀ mà tàanna ná saanŋi pyɛnge sumare e.
27 Abisalɔn mpyi a pùnampyire taanre ná pùcembili si,
ndemu mɛgɛ ku mpyi Tamari ke.
Li lemɛ mpyi a sàa ɲwɔ.
28 Abisalɔn à yyee shuunni pyi Zheruzalɛmu i,
u ɲyiini ɲyɛ a tɛ̀gɛ saanŋi na mɛ.
29 Ka Abisalɔn si pi pyi pi à Yohabu yyere si u tun saanŋi yyére,
ŋka Yohabu ɲyɛ a ɲɛnʼa shà mɛ.
Ka u u pi pyi pi à u yyere tozhwɔnwogo,
ŋka Yohabu ɲyɛ a ɲɛnʼa shà mɛ.
30 Ɲyɛ ka Abisalɔn si u báarapyiibii pyi:
«Yii wíi,
Yohabu kɛrɛge na ɲyɛ mii woge taan,
sùmaŋi na ɲyɛ kʼe.
Yii a sì yii i sà nage le ku na.»
Ka Abisalɔn báarapyiibii si ŋkàrʼa sà nage le kɛrɛge na.
31 Ka Yohabu si yîrʼa kàre Abisalɔn fye e u pyɛnge e maa sà u pyi:
«Ɲaha kurugo mu báarapyiibilʼà nage le mii kɛrɛge na yɛ?»
32 Ka Abisalɔn si u ɲwɔ shwɔ:
«Mii à pi pyi pi à sà mu yyere ma pa si mpa ma tun saanŋi yyére ma a sà u pyi:
“Ɲaha kurugo mii à yîri Geshuri i mà pa naha yɛ?
Li mpyi na sí n-pwɔ́rɔ mii á,
mii niɲjaa ta wani.”
Numɛ,
mii ɲyiini la ɲyɛ si ntɛ̀gɛ saanŋi na,
mii aha nta mii à kapyimbaala pyi,
u u na bò.»
33 Ka Yohabu si ŋkàrʼa sà yire jwo saanŋʼá.
Ka saanŋi si Abisalɔn yyere,
ka Abisalɔn si mpa niŋkure sín maa yyahe cyígile ɲìŋke na saanŋi taan.
Ka saanŋi si Abisalɔn purʼa cû.