Aminɔ ná Tamari kani
13
Ɲyɛ,
Dawuda jyaŋi Abisalɔn cɔɔnŋi wà na mpyi wani,
u lemɛ mpyi a sàa ɲwɔ.
U mɛgɛ mpyi Tamari.
Dawuda jyaŋi wà saha na mpyi wani,
uru mɛgɛ mpyi Aminɔ.
Ka uru si mpa yyaha yige Tamari kurugo.
2 Aminɔ cwɔɔnŋi Tamari kanʼà pa u yákiliŋi ɲyàha wùrugo fo lʼà pa mpyi u á yama.
Tamari ɲyɛ a mpyi na sàha ŋkwɔ̀ a nɔ̀ shi cè mɛ.
Lire kurugo Aminɔ ɲyɛ a mpyi a pyiŋkanna ta,
si ɲjà n-file Tamari na mɛ.
3 Ŋka Aminɔ cevooŋi wà na mpyi wani,
u mɛgɛ mpyi Yonadabu.
Dawuda cìnmpworonaŋi Shimeya jya u mpyi u wi.
Yonadabu mpyi a sàa cyìige.
4 Ɲyɛ canŋka,
ka uru si Aminɔ pyi:
«Saanŋi jyaŋi,
ɲaha kurugo mu yyaha a tanha a yaha canŋa maha canŋa yɛ?
Li ɲùŋke jwo na á!»
Ka Aminɔ si u ɲwɔ shwɔ:
«Mii cìnmpworonaŋi Abisalɔn cɔɔnŋi Tamari kyaa li ɲyɛ mii na.»
5 Ka Yonadabu si u pyi:
«Sà sínni ma a maye pyi yaŋa fiige.
Mu tuŋi ká mpa mu wíi,
ma a yi jwo u á:
“Mii na mu ɲáare ma a na cɔɔnŋi Tamari yaha u pa yalyire kan na á.
U u ti yaa na ɲyii na.
U yabiliŋi cyɛge ku ti kan mii á,
mii sí ti lyî.”»
6 Ɲyɛ ka Aminɔ si sà sínni maa uye pyi yaŋa fiige.
Ka saanŋi sí mpa u wíi,
ka u u saanŋi pyi:
«Mii na mu ɲáare ma a na cɔɔnŋi Tamari yaha u pa tàntɛnɲyɛ shuunni yaa na ɲyii na,
ná u yabiliŋi cyɛge e,
u kan na á si n-lyî.»
7 Ka Dawuda si wà tun Tamari á bage e u sà u pyi:
«Shà ma yyahafooŋi Aminɔ bage e maa sà yalyire yaa u á.»
8 Ka Tamari si ŋkàre u yyahafooŋi Aminɔ bage e,
mà sà u nizinniŋi ta yasiniŋke na.
Ka Tamari si mbyimpe lwɔ́ a cwɔ̀nhɔ,
maa tàntɛnɲyi yaa u ɲyii na.
9 U à kwɔ̀ ke,
maa tàntɛnɲyi wwû tèeŋke e mà kan Aminɔ á.
Ŋka Aminɔ ɲyɛ a ɲɛnʼa yi lyî mɛ,
maa jwo:
«Yii sùpyire puni pyi ti fworo.»
Ka sùpyire puni si fworo ntàani na.
10 Ɲyɛ ka Aminɔ si Tamari pyi:
«Ta ma ná tàntɛnɲyi i naha mii bage e,
ma pa ŋkan na á si n-lyî.»
Ka Tamari si u tàntɛnɲyi niɲjyaayi lwɔ́ a sà ŋkan u yyahafooŋʼá bage e.
11 Mà u yaha u u tàntɛnɲyi kaan Aminɔ á,
ka Aminɔ si u cyán a cû,
maa u pyi:
«Na cɔɔn,
yyére si wwɔ̀ ná mʼe!»
12 Ka Tamari si jwo:
«Ɔnhɔ,
yyahawuŋi,
ma hà ɲcwo na na mɛ!
Ɲaha na yɛ,
nde kani fiige ɲyɛ na mpyi Izirayɛli shiinbii shwɔhɔlʼe mɛ.
Ma hà ɲɛɛ lire silege kani pyi mɛ.
13 Lire ká mpyi,
taa mii sí n-jyè ná kuru silege e ke?
Mu mú sí n-pyi Izirayɛli shiinbii shwɔhɔlʼe supyikuuŋɔ.
Lire e ke,
mii na mu ɲáare,
ma sà na cya saanŋʼá,
u sì n-cyé si mii kan mu á mɛ!»
14 Ŋka Aminɔ ɲyɛ a ɲɛnʼa lógo u cɔɔnŋʼá mɛ.
Ná u fànhe si mpyi a ɲyaha u woge na,
ka u u u kárima maa wwɔ̀ ná u e.
15 Lire kàntugo,
ka Aminɔ si Tamari kyaa pɛn uyʼá,
mu à jwo u kyaa ɲyɛ a mpyi a têlʼa táan u á mà ɲya mɛ.
Ka u u Tamari pyi:
«Yîri ma a sì!»
16 Ka Tamari si u pyi:
«Ma hà yire jwo mɛ.
Mu aha mii kɔ̀rɔ,
lire sí n-pyi kapii nimbwoo si ntòro nde mu à pyi mii na mà kwɔ̀ ke.»
Ŋka u ɲyɛ a lógo u cɔɔnŋʼá mɛ.
17 Ka u u u báarapyiŋi yyere maa u pyi:
«Ŋge pùcwoŋi kɔ̀rʼa yige ntàani na,
ma a bage tò ma a ku shwɔ̂hɔ u yyaha na!»
18 Ɲyɛ ka báarapyiŋi si Tamari kɔ̀rʼa yige bage e,
maa ku tò,
maa ku shwɔ̂hɔ.
Vàanntinmbwɔhɔ nisinaŋa mpyi Tamari na,
bà saanbii pworobii nɔ̀ shi cèmbaa wuubii mpyi maha yi leni mɛ.
19 Ka Tamari si cwɔɔnre kulʼa wu u ɲùŋke na,
maa u vàanntinmbwɔhe nisinaŋke cwɔn,
maa u cyeyi taha u ɲùŋke na,
maa ŋkwúuli na wà.
20 Ka u yyahafooŋi Abisalɔn si u pyi:
«Mu yyahafooŋi Aminɔ u à cwo mu na kɛ?
Ɲyɛ numɛ,
fyâha ɲaha na yɛ mu yyahafoo wi.
Ma hà nde kani lwɔ́ ntugo si ntòro mɛ.»
Ɲyɛ ka Tamari si ŋkàrʼa sà ŋkwôro u yyahafooŋi Abisalɔn bage e uye niŋkin.
21 Saanŋi Dawuda à pa cyire karigii puni lógo ke,
ka u lùuni si sàa yîri.
22 Abisalɔn wi ke,
uru ɲyɛ a yaaga jwo Aminɔ na mɛ.
Ŋka u à u kyaa pɛn uyʼá,
ɲaha na yɛ u mpyi a cwo uru cɔɔnŋi Tamari na.
Abisalɔn à Aminɔ bò
23 Yyee shuunni toroŋkwooni kàntugo,
canŋka,
pìi mpyi a kàre Abisalɔn mpàabii shire takwɔngʼe Baali-Azɔri kànhe e,
Efirayimu ŋkère na.
Ka Abisalɔn si saanŋi jyaabii puni yyere.
24 Ka Abisalɔn si ŋkàre saanŋi yyére maa sà u pyi:
«Pi na mu báarapyiŋi mpàabii shire kwùun.
Mii na saanŋi ɲáare,
u ná u kìni yyaha yyére shiinbii pi a si ná u báarapyiŋi i.»
25 Ka saanŋi si Abisalɔn pyi:
«Ɔnhɔ na jya,
wuu puni sì n-jà ŋkàre mɛ.
Lire bàare e,
wuu sí sà mpyi mu á tuguro.»
Abisalɔn à saanŋi ɲáara pyiŋkannigii puni na,
ŋka saanŋi ɲyɛ a ɲɛnʼa kàre mɛ,
maa jwó le u á kanna.
26 Ka Abisalɔn si núrʼa jwo:
«Ká mpyi mu yabiliŋi sì n-jà ŋkàre mɛ,
mii la na ɲyɛ ma a mii yyahafooŋi Aminɔ yaha u a si na wuu e.»
Ka saanŋi si u pyi:
«Ɲaha kurugo mu la ɲyɛ Aminɔn u a sì ná mu i yɛ?»
27 Ŋka Abisalɔn à saanŋi ɲáare sèlʼe ke,
ka saanŋi si Aminɔ ná u jyaabii sanmpii puni yaha a kàre.
28 Ɲyɛ ka Abisalɔn si u báarapyiibii pyi:
«Yii a Aminɔ kàanmucaa sèlʼe!
Yii aha mpa u ɲya u à sinmpe bya mà u funŋke táan,
mii aha mpa jwo:
“Yii Aminɔ bò”,
yii i ɲcwo u na yii bò.
Yii àha vyá mɛ,
ɲaha na yɛ mii u à yii tun!
Yii yiye waha yii i yii zòompii tàra.»
29 Ɲje Abisalɔn mpyi a jwo u báarapyiibilʼà pi pyi Aminɔ na ke,
ka pi i yire puni pyi u na maa u bò.
Saanŋi jyaabii sanmpilʼà lire ɲya ke,
ka pi shin maha shin si dùgo u shwɔngɔ tùlugo dùfaanŋke na mà fê.
30 Mà pi yaha kuni i na wà,
ka yi i mpa jwo Dawuda á:
«Abisalɔn à saanŋi jyaabii puni bò,
ali shin niŋkin ɲyɛ a shwɔ mɛ.»
31 Saanŋʼà puru lógo ke,
ka u u u vàanntinɲyi cwɔn,
maa sínni ɲìŋke na.
Ka u kìni yyaha yyére shiinbii si mpa yyére u taan.
Pire puni mú mpyi a pi vàanntinɲyi cwɔn cwɔn.
32 Ka Dawuda yyahafooŋi Shimeya jyaŋi Yonadabu si jwumpe lwɔ́ maa jwo:
«Mii kàfooŋi,
ma hà raa sɔ̂nŋi na pi à saanŋi jyaabii puni bò mɛ.
Aminɔ kanni pi à bò.
Abisalɔn mpyi a lire kani bégele mà lwɔ́ canŋke Aminɔ à cwo u cɔɔnŋi Tamari na ke.
33 Lire e ke,
saanŋi mii kàfooŋi kà n-kwɔ̀ raa sɔ̂nŋi na uru jyaabii puni pi à bò mɛ.
Aminɔ kanni pi à bò.
34 Ka Abisalɔn si fê.»
Ɲyɛ,
nàɲjiiŋi u mpyi na kàanmucyage pyi ke,
ka uru si yyahe yîrige,
mà wílʼa supyikurumbwɔhɔ ɲya ku u ntîri ɲaŋke ɲuŋʼi canŋacwumɔ yyére kuni i.
35 Ka Yonadabu si saanŋi pyi:
«Saanŋi jyaabii pi naha na ma!
Yire bà mu báarapyiŋʼà jwo mu á mà?»
36 U na ŋkwùu puru jwumpe na,
saanŋi jyaabii si i nɔni,
maa ntíi na myahii súu maa ŋkwúuli.
Ka saanŋi ná u kìni yyaha yyére shiinbii puni mú si myahii sú sèlʼe.
37 Lire mpyi a Abisalɔn ta u à fê a kàre Geshuri saanŋi Talimayi yyére.
Uru na mpyi Amiwudi jya.
Ŋka canŋa maha canŋa Dawuda mpyi maha u jyaŋi kwùŋi yamɛɛni súu.