Kile tùnntunŋi Natan à Dawuda cɛ̂ɛgɛ
12
Ɲyɛ ka Kafooŋi si Kile tùnntunŋi Natan tun Dawuda á.
Ka Natan si ŋkàre u yyére maa sà u pyi:
«Nàmbaa shuunni na mpyi kànhe kà na,
wà na mpyi nàfufoo,
u sanŋi si mpyi fòŋɔfoo.
2 Mpàa niɲyahamii ná nìiyi niɲyahaya na mpyi nàfufooŋʼá.
3 Ŋka yafyin ɲyɛ a mpyi fòŋɔfooŋʼá mɛ,
fo mpàpyara niŋkin.
U mpyi a lire shwɔ maa li byíi.
Lire mpàpyarani mpyi na lyɛge ná u nàŋkɔpyire e.
Ɲjyìŋi u mpyi maha lyî ke,
uru mpàpyarani mpyi maha lyî,
maa byii u fùɲcwokwuuni i ná u e.
Li mpyi maha sínni u ntùŋke e.
Li mpyi mu à jwo u pworo.
4 Canŋka,
nàmpɔnŋɔ à pa nàfufooŋi yyére.
Ŋka nàfufooŋi ɲyɛ a ɲɛnʼa u mpàŋi wà,
lire ɲyɛ mɛ,
u nùŋi wà cû a bò u nàmpɔnŋʼá mɛ,
maa ŋkàrʼa sà fòŋɔfooŋi mpàpyarani cû a sà bò u nàmpɔnŋʼá.»
5 Ɲyɛ,
Dawuda à puru jwumpe lógo ke,
ka u lùuni si sàa yîri nàfufooŋi taan.
Ka u u Natan pyi:
«Kafooŋi ɲyii wuŋi mɛge na,
nàŋi u à nde kani pyi ke,
u à yaa u bò.
6 Mpàpyarani u à cû ke,
u à yaa u lire fiigii sicyɛɛre kan li fooŋʼá,
ɲaha na ye,
u à ɲɛnʼa nde kapiini pyi ɲùɲaara bàa.»
7 Ka Natan si Dawuda pyi:
«Mu yabiliŋi u ɲyɛ uru nàŋi.
Kafooŋi ,
Izirayɛli u Kileŋi à jwo:
“Mii u à sìnmpe tìri mu na mà pyi Izirayɛli shiinbii saanŋi.
Mii u à mu shwɔ Soli na.
8 Mii u à mu kàfooŋi Soli pyɛnge kan mu á,
maa u cyeebii le mu cye e,
maa mu tìŋɛ Izirayɛli shiinbii ná Zhuda shiinbii ɲùŋɔ na.
Ká mpyi lire ɲyɛ a mpyi a mu funŋke ɲíŋɛ mɛ,
mii mpyi na si là bâra yi na.
9 Ɲaha na mu à Kafooŋi jwumpe ɲjini faha,
maa kapii pyi u yyahe taan yɛ?
Mu à Ɛti tùluge shinŋi Uri bò ná kàshikwɔnŋwɔɔni i.
Mu à Amoni shiinbii yaha pi à u bò ná pi kàshikwɔnŋwɔɔni i,
maa u cwoŋi lwɔ́ mà pyi ma cwo!
10 Ɲyɛ,
numɛ,
kàshikwɔnŋwɔɔni saha sì n-sìi laaga tɔɔn mu pyɛnge na mɛ.
Ɲaha na yɛ,
mu à mii ɲjini faha maa Ɛti shinŋi Uri cwoŋi shwɔ u na mà pyi ma cwo.”
11 Kafooŋi à jwo:
“Mii sí yyefugo nɔ mu na,
kuru ɲùŋke sí n-vworo mu yabiliŋi pyɛnge e.
Mii sí mu cyeebii lwɔ́ mu yabiliŋi ɲyii na si ŋkan mu byanhama shinŋi wà á.
Uru sí ŋgwɔ̀ ná pi e sùpyire puni ɲyii na.
12 Mu à ma wuuni pyi ŋwɔhɔre e,
ŋka mii sí nde pyi Izirayɛli shiinbii puni ɲyii na canŋke e.”»
13 Ɲyɛ ka Dawuda si Natan pyi:
«Mii à kapii pyi Kafooŋi na!»
Ka Natan si jwo:
«Kafooŋi à toro taha mu kapiini na,
mu sì n-kwû mɛ.
14 Ŋka nde kani mpyiŋi cye kurugo,
mu à Kafooŋi zàmpɛɛnbii pyi pi à u ɲjini faha.
Lire kurugo,
pyàŋi mu à ta ke,
uru sí n-kwû.»
Dawuda kapiini kàntuge
15 Ɲyɛ ka Natan si ŋkàre u pyɛngɛ.
Uri cwoŋʼà pyàŋi ŋgemu ta Dawuda á ke,
ka Kafooŋi si yampe pà yaha uru na.
Pyàŋi yampe mpyi a pi sèlʼe.
16 Ka Dawuda si wá na súnŋi leni,
maa Kile ɲáare pyàŋʼá,
maa sínnini ɲìŋke na numpili puni.
17 Ka u pyɛnge kacwɔnribii si file u na,
maa u ɲáara sèlʼe u u yîri ɲìŋke na,
ŋka u ɲyɛ a sàa ɲɛɛ mɛ.
U mú ɲyɛ a ɲɛnʼa lyî ná pi e mɛ.
18 Canmpyibaashwɔnwuuni i,
ka pyàŋi si ŋkwû.
Ŋka kacwɔnribii mpyi a fyá si yi yyaha jwo Dawuda á na pyàŋʼà kwû.
Pi mpyi na ŋko:
«Mà pyàŋi yaha shì na,
wuu à jwo ná u e,
u ɲyɛ a ɲɛnʼa lógo wuu á mɛ.
Ɲyɛ numɛ,
di wuu sí yi jwo u á na pyàŋʼá kwû yɛ?
Wuu aha yi jwo u á,
u sí kawaa pyi uye na!»
19 Dawuda à pa u báarapyiibii ɲya pi i ŋkunni piye shwɔhɔlʼe ke,
ka u u yi cè na pyàŋʼà kwû.
Ka u u pi pyi:
«Pyàŋʼà kwû la?»
Ka pi i jwo:
«Ɔɔn,
u à kwû.»
20 Ɲyɛ ka Dawuda si yîri ɲìŋke na,
maa wìli,
maa sìnmpe nùgontanga wumpe pà tìri,
maa vàanɲyi fáa.
Lire kàntugo,
maa ŋkàre Kafooŋi bage e,
maa sà Kile pêe.
U à kwɔ̀ ke,
maa núrʼa kàre u pyɛngɛ,
maa jwo na pi yalyire kan urʼá.
Ka pi i yalyire kan u á,
ka u u lyî.
21 Ka u báarapyiibii si u pyi:
«Nde mu à pyi amɛ ke,
lire ɲwɔhe ɲyɛ ɲaha shi yɛ?
Mà pyàŋi yaha shì na,
mu mpyi na súnŋi leni,
maa mɛɛ súu pyàŋi kurugo.
Numɛ pyàŋʼà kwû ke,
ka mu u yîri maa lyî.»
22 Ka Dawuda si pi pyi:
«Mà pyàŋi yaha shì na,
mii mpyi na súnŋi leni,
maa mɛɛ súu,
ɲaha na yɛ mii mpyi a jwo naye funŋʼi:
“Jo u à cè kampyi Kafooŋi sí ɲùɲaara ta mii na,
si pyàŋi cùuŋɔ mà yɛ?”
23 Ŋka numɛ,
pyàŋʼà kwû,
ɲaha na mii saha sí súnŋi le yɛ?
Taha mii sí n-jà u núruŋɔ ɲjyige kwùŋi i la?
Mii u sí n-pa ŋkàre uru yyére,
ŋka uru sì n-jà mpa mii yyére sahaŋki mɛ.»
Solomani ziŋi kani
24 Ɲyɛ ka Dawuda si u cwoŋi Batiseba zòŋi taala.
U à wwɔ̀ ná u e,
ka u u mpa pùnambile si,
maa li mɛgɛ le Solomani.
Ka uru pyàŋi kyaa si ntáan Kafooŋi á.
25 Ka Kafooŋi si u tùnntunŋi Natan tun Dawuda yyére,
u u sà yi jwo u á na pyàŋi mɛgɛ sí n-le Yedidiya.
Kuru ɲwɔhe ku ɲyɛ:
«Kafooŋi à u kyaa táan uyʼá.»
Dawuda à Amoni shiinbii kànbwɔhe cû
26 Lirʼà Yohabu ná u kàshikwɔɔnbii ta pi i Amoni shiinbii kànbwɔhe,
Araba tùnni.
Pi à Amoni shiinbii saanŋi pyɛnge cû ke,
27 ka Yohabu si tùnntunmii tun pi sà yi jwo Dawuda á na:
«Mii à Araba kànhe tùn.
Cyage e kànhe shiinbii maha lwɔhe kwóre ke,
mii à kuru shwɔ pi na.
28 Kàshikwɔɔnbii sanmpii wà piye na,
ma a mpa kànhe kwûulo,
ma a ku puni cû.
Lire bàare e,
mii kanni ká ku cû,
ku mɛgɛ sí n-pyi mii kanni wogo.»
29 Ɲyɛ ka Dawuda si kàshikwɔɔnbii sanmpii puni wà piye na,
maa ŋkàre Araba kànhe mɛɛ na,
maa sà ɲcwo ku na maa ku cû.
30 U à Amoni shiinbii saanŋi saanre ɲùntoŋke láha u ɲùŋke na.
Sɛɛn ɲùntoŋɔ ku mpyi ku ki.
Ku dugumpe mpyi a ɲyaha cúlii beɲjaaga ná kɛ na.
Kafaaya loŋgara wuyo mú mpyi ku na.
Ka ku u ntò Dawuda ɲùŋke na.
Dawuda ná u kàshikwɔɔnbilʼà yaaya niɲyahaya kuu kànhe e mà kàre.
31 Kànhe shiinbii pi ke,
u à pire cû a kàre,
maa sà pi yaha cípaanni ná kafateni,
ná kàɲciiyi ɲjyaŋi,
ná lèfawuni na.
Lire pyiŋkanni na Dawuda à Amoni shiinbii kànyi shiinbii puni pyi.
Lire kàntugo,
ka Dawuda ná u kàshikwɔɔnbii puni si núrʼa kàre Zheruzalɛmu kànhe e.