Dawuda ná ceeŋi wà kani
11
Ɲyɛ,
li yyee nùmpanŋa,
tèni i saanbii mpyi maha ntêe na sì kàshigʼá ke,
ka Dawuda si Yohabu ná u kàshicyɛge yyaha yyére shiinbii ná Izirayɛli kàshikwɔɔnbii puni yaha a kàre kàshigʼá.
Ka pi i sà Amoni shiinbii kakyara maa ntɛ̀ɛn Araba kànhe ɲwɔ na kàshige mɛɛ na.
Dawuda wi ke,
ka uru si ŋkwôro Zheruzalɛmu kànhe e.
2 Canŋka,
yàkoŋke byanhampe e,
Dawuda à yîri ŋɔɔmpe na,
maa ŋkàrʼa sà a uye ɲaare u bage kàtanŋke ɲuŋʼi.
Mà u yaha wani,
ka u u ceeŋi wà ɲya u u wìli.
Uru ceeŋi lemɛ mpyi a sàa ɲwɔ.
3 Ka Dawuda si tùnntunŋɔ tun u sà yíbe ceeŋi kyaa na.
Ka pi i mpa u pyi:
«Elamu pworoŋi Batiseba wi,
Ɛti tùluge shinŋi Uri cwoŋi.»
4 Ɲyɛ ka Dawuda si tùnntunmii tun pi à sà ceeŋi yyerʼa pa.
Ka ceeŋi si mpa Dawuda yyére.
Ka Dawuda si wwɔ̀ ná u e.
Lire kàntugo,
ka ceeŋi si núrʼa kàre u pyɛnga.
Lire mpyi a ceeŋi ta u à fworo u yiŋke e kàavo maa uye fínniŋɛ.
5 Ɲyɛ ka ceeŋi si yyére yacere na,
maa wà tun u sà yi jwo Dawuda á:
«Mii laa wuu u naha.»
6 Ɲyɛ ka Dawuda si wà tun u sà yi jwo Yohabu á:
«Ɛti tùluge shinŋi Uri yaha u pa.»
Ka Yohabu si Uri yaha a kàre Dawuda yyére.
7 Uri à nɔ Dawuda yyére ke,
ka Dawuda si u yíbe Yohabu ná kàshikwɔɔnbii puni ná kàshige kyaa na.
8 Lire kàntugo,
ka Dawuda si Uri pyi:
«Ta sì ma pyɛngɛ,
ma a sà ŋɔ̀.»
Ɲyɛ,
Uri à fworo saanŋi pyɛnge e ke,
ka saanŋi si ma yaaya kan pi à sà ŋkan u á.
9 Ŋka Uri ɲyɛ a ɲɛnʼa kàre u pyɛnge e mɛ.
U à kàrʼa sà sínni ná u kàfooŋi saɲcwɔnsigibii puni i saanre pyɛnge ntàani tajyiɲwɔge na.
10 Pi à sà yire jwo Dawuda á na Uri ɲyɛ a ɲɛnʼa kàre u pyɛnge e mɛ,
ka Dawuda si Uri yyere maa u pyi:
«Kùlʼe bà mu à yîri mà?
Ɲaha na mu ɲyɛ a kàre ma pyɛnge e mà yɛ?»
11 Ka Uri si Dawuda pyi:
«Tunmbyaare mbwùuni ná Izirayɛli shiinbii kàshikwɔɔnbii ná Zhuda shiinbii kàshikwɔɔnbii puni na ɲyɛ vàanɲyi bayi i,
mii kàfooŋi Yohabu ná u kàshikwɔɔnbii yyaha yyére shiinbii na ɲyɛ sige e.
Nde tèni i,
mii sí n-jà ŋkàre na pyɛnge e si sà lyî,
si bya si sínni ná na cwoŋi i la?
Mà mu yaha ɲyii na,
mii sì n-sìi lire pyi mɛ!»
12 Ka Dawuda si Uri pyi sahaŋki:
«Tɛ̀ɛn naha ma a niɲjaa ná nùmpanŋa pyi,
lire kàntugo mii sí mu yaha ŋkàre.»
Ka Uri si kuru canŋke ná kuru canŋanumpaŋa pyi Zheruzalɛmu i.
13 Ka Dawuda si Uri yyere ɲjyìŋi ná mbyaŋi na u pyɛnge e,
maa u bya a mɛ́ɛ.
Ŋka numpilage e,
Uri ɲyɛ a ɲɛnʼa kàre u pyɛnge e mɛ,
maa ŋkàrʼa sà sínni ná u kàfooŋi saɲcwɔnsigibilʼe.
14 Kuru canŋanumpanŋa ɲyɛ̀gɛ na,
ka Dawuda si sémɛ sémɛ mà kan Uri á u sà ŋkan Yohabu á.
15 U mpyi a yi jwo uru sémɛŋi i:
«Yii Uri yaha kàshige yyaha yyére ku tapege e,
yii i ɲcaala u na,
bà zàmpɛɛnbii si mpyi si u bò mɛ.»
16 Mà pi yaha pi à kànhe kwûulo,
Yohabu u mpyi na kànhe kàanmucaa ke,
ka uru si Uri yaha cyage e u à cè na zàmpɛɛnbii kàshikwɔmpiyi ɲyɛ ke.
17 Ka kànhe shiinbii si fworo si mpa Izirayɛli shiinbii tùn.
Pi à Dawuda kàshikwɔɔnbii pìi ná pi yyaha yyére shiinbii pìi bò.
Pi à Ɛti shinŋi Uri bò mú.
18 Karigii cyi à pyi kuru canŋke kàshige cyage e ke,
ka Yohabu si tùnntunŋɔ tun u sà cyire puni yyaha jwo Dawuda á.
19 U à tùnntunŋi pyi:
«Karigii cyi à pyi kàshige cyage e ke,
mu aha sà cyi puni yyaha jwo saanŋʼá mà kwɔ̀ tèni ndemu i ke,
20 lʼe saanŋi lùuni sí n-yîri,
si mu pyi:
“Ɲaha na yii à filʼa tòro kànhe na si ku tùn yɛ?
Yii ɲyɛ a cè na tire sùpyire sí n-jà ntɛ̀ɛn pi kànhe káaŋke ɲuŋʼi sʼa yii wàa ná tàanbilʼe mà?
21 Jo u à Yerubesɛtia jyaŋi Abimelɛki bò Tebɛsi kànhe e yɛ?
Ceeŋi wà bà u à tɛ̀ɛn káaŋke nìɲyi na maa tiraga ŋɔɔŋʼa cyán u ɲuŋʼi,
ka u u ŋkwû mà?
Ɲaha na yii à file kànhe na yɛ?”
Ɲyɛ saanŋi ká yire jwo,
ma a yi jwo u á:
“Mu báarapyiŋi Ɛti tùluge shinŋi Uri mú à bò.”»
22 Ka tùnntunŋi si ŋkàrʼà sà nɔ,
ɲje Yohabu à jwo u á ke,
ka u u yire puni yyaha jwo Dawuda á.
23 U à Dawuda pyi:
«Tire sùpyire fànhe mpyi a ɲyaha wuu na.
Pi mpyi a fworʼa pa wuu mɛɛ na sige e.
Ka wuu u pi kɔ̀rʼa pa fo pi kànhe tajyiɲwɔge na.
24 Ɲyɛ,
mpii pi maha tàanbii wàa ke,
pire mpyi a tɛ̀ɛn pi kànhe káaŋke na,
maa mu shiinbii wàa ná tàanbilʼe.
Pi à saanŋi kàshicyɛge yyaha yyére shiinbii pìi bò.
Mu báarapyiŋi Ɛti tùluge shinŋi Uri mú à bò.»
25 Ɲyɛ ka Dawuda si tùnntunŋi ɲwɔ shwɔ:
«Sà yi jwo Yohabu á na lire kà u yatanɲyi bò mɛ,
na kàshige e,
kàshikwɔnŋwɔɔni maha boore pyi kàmpanɲyi shuunniŋi puni na.
Sà yi jwo a waha u á na u kàshige yîrige kànhe mɛɛ na u u ku jya.
Sà u yatanɲyi waha ná puru jwumpe e.»