Dawuda à Amoni ná Siri shiinbii tùn maa jà pi na
10
Lire kàntugo,
Amoni saanŋi à kwû,
ka u jyaŋi Anuni si ntɛ̀ɛn u tatɛɛnge e saanre na.
2 Ɲyɛ ka Dawuda si jwo:
«Mii sí Nakasi jyaŋi Anuni cùmulemɛ ɲwɔ,
bà u tuŋi mpyi a mii cùmulemɛ ɲwɔ mɛ.»
Ka Dawuda si u kìni yyaha yyére shiinbii pìi tun pi sà Anuni tuŋi kwɔge fwù kan u á.
Dawuda tùnntunmpilʼà nɔ Amoni shiinbii kìni i ke,
3 ka Amoni shiinbii yyaha yyére shiinbii si pi kàfooŋi Anuni pyi:
«Mu na sɔ̂nŋi na mu tuŋi pèenɛ kurʼe Dawuda à nte sùpyire tun mu yyére ti i mpa kwɔge fwùŋi kan mu á la?
U à mpii ɲùŋufeebii tun mu á,
pi i mpa mu kànhe ŋwɔhʼa wíi,
bà pi si mpyi si mpa ku kakyara mɛ.»
4 Anuni à puru lógo ke,
ka u u Dawuda tùnntunmpii cû maa pi mahajwoŋi kàmpanɲya niŋkin niŋkin kûlu,
maa pi vàanntinyi kwɔ̀n a bere mà láha pi nafyiɲjirigii na,
maa pi yaha pi à kàre.
5 Ɲyɛ,
pi à sà yire jwo Dawuda á,
ka u u wà tun u sà pi ɲùŋɔ bɛ̂.
Ɲaha na yɛ,
pi silege wuubii pi mpyi a sìi.
Ka saanŋi si pi pyi pi tɛ̀ɛn Zeriko kànhe e,
fo pi mahajwoŋi u fûn,
pi i nta pi a ma.
6 Ɲyɛ,
Amoni shiinbilʼà li ɲya na pirʼà piye la wwû Dawuda na ke,
ka pi i kàshikwɔɔnbii shiin kampwɔhii beɲjaaga (20.000) shwɔ Beti-Erehɔbu kànhe ná Soba kànhe e,
Siri shiinbilʼá,
maa shiin kampwoo (1.000) shwɔ Mahaka saanŋi kàshikwɔɔnbilʼe,
maa shiin kampwɔhii kɛ ná shuunni (12.000) shwɔ Tobu kùluni i.
7 Dawuda à yire lógo ke,
ka u u Yohabu tun pi mɛɛ na,
ná u kàshikwɔnkuruŋke puni i.
Pire puni mpyi kàshikwɔnmpiye.
8 Ɲyɛ ka Amoni shiinbii si fworʼa taanna pi kànbwɔhe tajyiɲwɔge na kàshige mɛɛ na.
Siri shiinbii pi ɲyɛ Soba kànhe e ná mpii pi ɲyɛ Erehɔbu kànhe e ke,
ka pire ná Tobu kànhe shiinbii ná Mahaka kànhe shiinbii si ŋkàrʼa sà piye bínni sige funŋke e.
9 Ɲyɛ,
Yohabu à li ɲya na kuruyo shuunni na uru sí raa kàshige kwùun,
na kuruŋke kà na ɲyɛ uru yyaha yyére,
kà si ɲyɛ uru kàntugo.
Ka u u Izirayɛli shiinbii kàshikwɔnmpiyi cwɔɔnrɔ maa yyére ná pire e kàshige mɛɛ na mà yyaha kan Siri shiinbilʼá.
10 U à u sìɲɛɛŋi Abisayi yaha kàshikwɔɔnbii sanmpii ɲùŋɔ na,
ka pire mú si yyére kàshige mɛɛ na mà yyaha kan Amoni shiinbilʼá.
11 Ka Yohabu si Abisayi pyi:
«Siri shiinbii fànhe ká ɲyaha wuu woge na,
yii i mpa wuu tɛ̀gɛ.
Ŋka Amoni shiinbii fànhe ká ɲyaha yii woge na,
wuu mú sí n-sà yii tɛ̀gɛ.
12 Fànha le maye e,
wuu puni pi fànha le wuye e,
wuu u kàshige kwɔ̀n wuu shiinbii kurugo ná wuu Kileŋi kànyi kurugo.
Nde lʼà táan Kafooŋi á ke,
u lire pyi.»
13 Ɲyɛ ka Yohabu ná u kàshikwɔɔnbii si file Siri shiinbii na si pi tùn.
Ka Siri shiinbii si fê pi yyaha na.
14 Ɲyɛ,
Amoni shiinbilʼà pa li ɲya na Siri shiinbii punʼà fê ke,
ka pire mú si fê Abisayi ná u shiinbii yyaha na mà jyè pi kànhe e.
Ka Yohabu si yîri u ná Amoni shiinbii kàshige cyage e mà pa Zheruzalɛmu i.
15 Siri shiinbilʼà li ɲya na Izirayɛli shiinbilʼà jà pire na ke,
ka pi i pi kàshikwɔɔnbii puni wà piye na.
16 Siri shiinbii pi mpyi Efirati baŋi kàntugo ke,
ka saanŋi Adadezɛri si tùnntunmii tun pi sà pire yyére pi a ma.
Ka pire si mpa Elamu i.
Adadezɛri kàshicyɛge yyaha yyére shinŋi Sobaki u mpyi pi yyaha na.
17 Pi à pa yire jwo Dawuda á ke,
ka u u Izirayɛli kàshikwɔɔnbii puni bínni,
maa Zhurudɛn baŋi jyiile mà kàre Elamu i.
Ka Siri shiinbii si piye bégele kàshige mɛɛ na Dawuda ná u kàshikwɔɔnbii na,
maa sà ɲcwo pi na.
18 Ŋka Siri shiinbilʼà fê Izirayɛli shiinbii yyaha na.
Ka Dawuda ná u kàshikwɔɔnbii si kàshikwɔnwotoroyi feebii shiin ŋkwuu baashuunni (700) bò,
mà bâra shɔnfeempii shiin kampwɔhii beeshuunni (40.000).
Pi à pi kàshicyɛge yyaha yyére shinŋi Sobaki bò.
Wani urʼà kwû.
19 Saanbii puni pi mpyi Adadezɛri fànhe ɲwɔhʼi ke,
pirʼà li ɲya na Izirayɛli shiinbilʼà jà pire na ke,
ka pi i sà jwumabeŋɛ cya ná pi e,
maa ŋkwôro Izirayɛli shiinbii fànhe ɲwɔhʼi.
Lirʼà pyi ke,
Siri shiinbii saha ɲyɛ a ɲɛɛ si sà Amoni shiinbii tɛ̀gɛ kàshige na mɛ.