Dawuda à kacɛnnɛ pyi Zhonatan jyaŋʼá
9
Canŋka,
Dawuda à jwo:
«Tá Soli pyɛngɛ shinŋi wà saha na ɲyɛ shì na,
ŋgemu á mii sí n-jà kacɛnnɛ pyi mii cevooŋi Zhonatan kurugo la?»
2 Lirʼà ta,
Soli pyɛnge báarapyiŋi wà na mpyi wani,
u mɛgɛ mpyi Ziba.
Ka pi i mpa ná urʼe Dawuda yyére.
Ka saanŋi si u yíbe:
«Mu u ɲyɛ Ziba la?»
Ka u u jwo:
«Ɔɔn,
mii u ɲyɛ mu báarapyiŋi Ziba.»
3 Ka saanŋi si jwo:
«Taha Soli pyɛngɛ shinŋi wà saha ɲyɛ a sìi,
ŋgemu á mii sí n-jà kacɛnnɛ pyi bà mii à li ɲwɔmɛɛni lwɔ́ Kile yyahe taan mɛ?»
Ka Ziba si jwo:
«Zhonatan jyaŋi wà na ɲyɛ wani,
u tooyi shuunniŋi punʼà kɛ̀ɛgɛ.»
4 Ka saanŋi si jwo:
«Taa u ɲyɛ ke?»
Ka Ziba si saanŋi ɲwɔ shwɔ:
«U na ɲyɛ Lodebara kànhe e,
Amiyɛli jyaŋi Makiri pyɛnge e.»
5 Ɲyɛ ka saanŋi Dawuda si u tun Lodebara kànhe e,
Amiyɛli jyaŋi Makiri pyɛnge e,
u sà u lwɔ́ u a ma.
6 Tèni i Soli jyaŋi Zhonatan u jyaŋi Mefibosɛti à nɔ Dawuda yyére ke,
maa niŋkure sín ɲìŋke na Dawuda yyahe taan.
Ka Dawuda si u pyi:
«Mefibosɛti!»
Ka u u jwo:
«Mu báarapyiŋi u ŋge.»
7 Ka Dawuda si u pyi:
«Ma hà vyá mɛ.
Mii sí kacɛnnɛ pyi mu á,
mu tuŋi Zhonatan kurugo.
Mii sí mu tulyɛge Soli taare puni núruŋɔ ŋkan mu á.
Mu wi ke,
mu sí raa lyî ná mii i tèrigii puni i.»
8 Ka Mefibosɛti si núrʼa niŋkure sín,
maa u pyi:
«Mu báarapyiŋi ɲyɛ yafyin pwùnŋkwugo kàntugo mɛ,
mu saha si i sɔ̂nŋi mii kyaa na la?»
9 Ka saanŋi si Soli báarapyiŋi Ziba yyere maa u pyi:
«Yaaga maha yaaga ku mpyi Soli ná u pyɛngɛ shiinbii wogo ke,
mii sí yire puni kan mu kàfooŋi ɲampyigʼá.
10 Mu ná ma pyìibii ná ma báarapyiibii sí raa yire kɛrɛyi fàa u á.
Yii sí raa u sùmaŋi bégeli,
bà mu kàfooŋi ɲampyige si mpyi sʼa yalyire taa mɛ.
Mefibosɛti wi ke,
uru sí raa lyî mii yyére tèrigii puni i.»
Lirʼà ta,
jyaa kɛ ná kaŋkuro ná báarapyii beɲjaaga na mpyi Ziba á.
11 Ka Ziba si saanŋi pyi:
«Ɲje saanŋi mii kàfooŋʼà jwo u báarapyiŋʼá ke,
mii sí yire puni pyi.»
Ɲyɛ Mefibosɛti mpyi maha lyî saanŋi yyére,
u mpyi mu à jwo saanŋi yabiliŋi jya.
12 Pùnambile na mpyi Mefibosɛti á li mɛgɛ mpyi Mika.
Shin maha shin u mpyi Ziba pyɛnge e ke,
pire puni mpyi a pyi Mefibosɛti báarapyii.
13 Mefibosɛti mpyi a sà ntɛ̀ɛn Zheruzalɛmu i,
ɲaha kurugo yɛ,
u mpyi maha lyî tèrigii puni i saanŋi yyére.
U tooyi shuunniŋi mpyi a kɛ̀ɛgɛ.