Dawuda à supyishi kuuyo niɲyahaya tùn maa jà yi na
8
Lire kàntugo,
Dawuda à kàrʼa sà Filisi shiinbii tùn maa jà pi na,
maa u fànhe tìŋɛ pi ɲùŋɔ na.
U à pi kànbwɔhe shwɔ pi na.
2 U à jà Muwabu shiinbii na mú.
U à pire shincuumpii sínniŋʼa taanna ɲìŋke na,
maa pi súma ná mɛɛrʼe.
U ná mpyi a mɛɲyɛyɛ taanre súma,
mɛɲyɛge niɲcyiige ná mɛɲyɛge shwɔnwoge ná mpyi a nɔ mpiimu na ke,
pi mpyi maha pire puni bò,
maa mɛɲyɛge taanrewoge shiinbii yaha bòmbaa.
Ɲyɛ ka Muwabu shiinbii si ŋkwôro Dawuda fànhe ɲwɔhʼi,
maa múnalwɔɔre sârali u á.
3 Lire kàntugo,
Dawuda à sà Soba saanŋi Adadezɛri tùn maa jà u na,
Erehobu jya u mpyi u wi.
Lirʼà ta,
Adadezɛri mpyi a yîri si sà Efirati baŋi nìɲyii yyére shiinbii tùn,
sí u fànhe núruŋɔ ntìŋɛ pi ɲuŋʼi.
4 Dawuda à kàshikwɔnwotoroyo fee shiin kampwoo ná shiin ŋkwuu baashuunni (1.700) cû,
ná kàshikwɔɔnbii tɔrɔfee kampwɔhii beɲjaaga (20.000).
U à shɔnyɔ ŋkuu (100) yaha uyʼá u wòtorobii mɛɛ na,
maa shɔnyi sanyi puni sirakapanɲyi kwɔ̀n kwɔ̀n.
5 Siri shiinbii pi mpyi Damasi kùluni i ke,
ka pire si fworʼa sà Soba saanŋi Adadezɛri tɛ̀gɛ.
Ŋka Dawuda à jà pi na.
U à Siri kàshikwɔɔnbii shiin kampwɔhii beɲjaaga ná shuunni (22.000) bò.
6 Ka Dawuda si u kàshikwɔɔnbii yyaha yyére shiinbii pìi tìŋɛ Siri kìni ɲùŋɔ na Damasi kùluni i.
Ɲyɛ ka Siri shiinbii si ŋkwôro Dawuda fànhe ɲwɔhʼi,
maa munalwɔre sârali Dawuda á.
Dawuda ná mpyi a kàre cyaga maha cyage e ke,
Kafooŋi mpyi maha u pyi u à jà kuru cyage shiinbii puni na.
7 Dawuda à Adadezɛri shiinbii tɔɔnnte yabeyi sɛɛnŋi wuuyi lwɔ́ á kàre Zheruzalɛmu i.
8 U à dàɲyɛŋi tɔɔnnte yaayi niɲyahaya lwɔ́ mú Beta kànhe ná Berotayi kànhe e mà kàre.
Yire na mpyi Adadezɛri màrampe kànyi yà.
9 Amati saanŋi Toyi à lógo na Dawuda à Adadezɛri ná u kàshicyɛge puni tùn maa jà pi na ke,
10 ka u u u jyaŋi Yoramu tun ná wyɛ́rɛfyinŋi yaayi ná sɛɛnŋi yaayi ná dàɲyɛtɔɔnnte yaayi yʼe,
u sà ŋkan Duwuda á,
u u u shɛ́ɛre,
u u u kêe,
na u à Adadezɛri tùn maa jà u na ke,
na lirʼà ɲwɔ.
Toyi à yire jwo ɲaha na yɛ,
u ná Adadezɛri mpyi kàshige na tèrigii puni i.
11 Ka saanŋi Dawuda si yire yaayi yaha Kafooŋi yahare e,
bà u à supyishiŋi sanŋi puni tùn maa jà pi na maa pi wɛ́rɛfyinŋi ná sɛɛnŋi shwɔ pi na mà yaha Kafooŋi yahare e mɛ.
12 Uru supyishiŋi u mpyi Edɔmu shiinbii,
ná Muwabu shiinbii,
ná Amoni shiinbii,
ná Filisi shiinbii,
ná Amalɛki shiinbii.
Yaayi u mpyi a shwɔ Soba saanŋi Adadezɛri na,
uru ŋgemu u ɲyɛ Erehɔbu jyaŋi ke,
u à yire puni yaha Kafooŋi yahare e mú.
13 Tèni i Dawuda à sà Siri shiinbii tùn,
u ninuruŋi,
maa Edɔmu shiinbii tùn mú maa pi kàshikwɔɔnbii shiin kampwɔhii kɛ ná baataanre (18.000) bò suumpe kacyage e ke,
ka lire si u mɛge pyi kʼà fworo sèlʼe.
14 U à u kàshicyɛge yyaha yyére shiinbii pìi tìŋɛ Edɔmu kìni puni ɲùŋɔ na.
Ɲyɛ ka Edɔmu shiinbii si ŋkwôro Dawuda fànhe ɲwɔhʼi.
Dawuda ná mpyi a kàre cyaga maha cyagʼe ke,
Kafooŋi mpyi maha u pyi u à jà kuru cyage shiinbii puni na.
Dawuda kìni yyaha yyére shiinbii
15 Dawuda à pyi Izirayɛli kìni puni saanŋi.
U mpyi maha pi karigii cwɔɔnre sèeŋi ná ntìiŋi ɲuŋʼi.
16 Seruya jyaŋi Yohabu u mpyi Dawuda kàshicyɛge ɲùŋufooŋi.
Ayiludi jyaŋi Zhozafati u mpyi sémɛmaraŋi.
17 Ayitubu jyaŋi Zadɔki,
ná Abiyetari jyaŋi Ayimelɛki,
pire pi mpyi sáragawwuubii.
Seraya u mpyi sémɛsemeŋi.
18 Yoyada jyaŋi Benazha u mpyi Kerɛti shiinbii ná Pelɛti shiinbii ɲùŋufooŋi.
Dawuda jyaabii pi mpyi sáragawwuubiia.