Dawuda la ɲyɛ si baga faanra Kafooŋi á
7
Ɲyɛ,
mà saanŋi Dawuda yaha u à tɛ̀ɛn u saanre bage e,
Kafooŋi sʼà yyeɲiŋke kan u á maa u shwɔ u zàmpɛɛnbii puni na,
pire mpiimu pi mpyi a u kìni kwûulo ke,
2 ka saanŋi si Kile tùnntunŋi Natan pyi:
«Wíi,
mii na ɲyɛ sediriciyi basinaŋʼi,
Kile tunmbyaare mbwùuni si ɲyɛ vàanŋke bage e.»
3 Ka Natan si saanŋi pyi:
«Yaaga maha yaaga mu ɲyɛ na sɔ̂nŋi ke,
lire pyi ɲaha na yɛ Kafooŋi na ɲyɛ ná mu i.»
4 Ŋka kuru canŋke numpilage e,
ka Kafooŋi si jwo ná Natan e.
U à jwo:
5 «Sà yi jwo mii báarapyiŋi Dawuda á na Kafooŋʼà jwo:
“Mu bà u sí baga faanra si mii lèŋɛ mɛ.
6 Ɲaha na yɛ,
mà lwɔ́ mii à Izirayɛli shiinbii yige Misira kìni i fo mà pa nɔ niɲjaa na,
mii ɲyɛ a têlʼa jyè bage e mɛ.
Mà mii yaha lire ɲani na ná pi e,
vàanŋa baga ku mpyi mii tatɛɛnge.
7 Cyeyi puni i mii à tòro ná Izirayɛli shiinbii puni i ke,
ɲùŋufeebii mii à cwɔɔnrɔ pi à mii shiinbii,
Izirayɛli shiinbii yyaha cû ke,
mii à têlʼa pire wà pyi na ɲaha na pi ɲyɛ a sediri cire baga faanra mii á mà?”
8 Lire e,
yi jwo mii báarapyiŋi Dawuda á,
na Síŋi foo Kafooŋi à jwo:
“Mà mu yaha mpànahasige e,
mii à mu lwɔ́ mà pyi mii shiinbii,
Izirayɛli shiinbii ɲùŋufooŋi.
9 Cyeyi puni i mu à tòro ke,
mii à pyi ná mu i.
Mii à mu zàmpɛnbii puni kɔ̀rʼa lwɔ́ mu yyaha na.
Mii à mɛgɛ nimbwɔhɔ kan mu á ɲìŋke shinbwoobii fiige.
10 Mii à cyage kà kan na shiinbii,
Izirayɛli shiinbilʼá,
maa pi tìŋɛ wani.
Kuru cyage sí n-pyi pi wogo,
bà pi si mpyi pi àha núru sʼa fyáge mɛ.
Lire ká mpyi shinpiibii sàha sì n-jà pi cùmulemɛ pi,
bà pi mpyi maha ntêe na li pyi tooyi nintoroyʼe,
11 tèni i mii à yukyaabii tìŋɛ na shiinbii Izirayɛli shiinbii ɲùŋɔ na ke.
Mii à taŋɔɲcyaga kan mu á,
maa mu yige ma zàmpɛnbii puni cye e.
Kafooŋi à jwo na uru sí baga shiin kan mu á.
12 Ɲyɛ mu shìŋi canmpyaagii ká ŋkwɔ̀,
ka mu u sà bâra ma tulyeyi na tèni ndemu i ke,
mii sí mu tùluge shinŋi wà,
ŋge u à fworo mu i ke,
uru wà tìŋɛ saanre na mu kàntugo.
Mii sí u saanre tígile.
13 Uru u sí n-pa baga faanra mii á,
mii sí u saanre tígile tèrigii puni i.
14 Mii sí n-pyi u tuŋi,
u sí n-pyi mii jyaŋi.
U aha kapii pyi,
mii sí sùpyire tà tɛ̀gɛ u kíbe,
si sùpyire tà tɛ̀gɛ u kapiini ŋkooŋi wwû u na.
15 Mii sì n-sìi na cɛ̀nmpe laaga tɔɔn u na,
bà mii mpyi a pu laaga tɔɔn Soli na mɛ.
Mii à uru cyé maa mu tìŋɛ u cyaga.
16 Mu tùluge shiinbii sí raa piye fáre mu saanre yatɛɛnŋke na mu kàntugo.
Mu saanre sí n-tígile tèrigii puni i.”»
17 Ɲyɛ,
jwumpe puni Kafooŋʼà jwo Natan á,
ná karigii puni u à cyêe u na ke,
ka Natan si cyire puni yyaha jwo Dawuda á.
Dawuda kileɲarage
18 Ɲyɛ ka saanŋi Dawuda si ŋkàre Kile yyahe taan,
maa jwo:
«Ei Saanbwɔhe Kafooŋi ,
mii ná na pyɛngɛ shiinbii ɲyɛ ɲaha shi,
fo mu à mii pêe amɛ yɛ?
19 Ei Saanbwɔhe Kafooŋi ,
ɲje puni mu à jwo ke,
yirʼà cyɛ́rɛ mu ɲyii na.
Mu à núrʼa ɲwɔmɛɛ lwɔ́,
na mu sí ma báarapyiŋi pyɛnge tígile tèrigii nimpaaŋkilʼe sahaŋki.
Ei Saanbwɔhe Kafooŋi ,
sùpyaŋʼà yaa ná tire pèente puni i mu á la?
20 Ɲaha saha mii Dawuda sí n-jà n-jwo mu á yɛ?
Ɲaha na yɛ,
Saanbwɔhe Kafooŋi ,
mu à ma báarapyiŋi cè.
21 Mu u à cyire karigii ɲwɔmɛɛni lwɔ́.
Mu à li lwɔ́ maye funŋʼi mà tàanna ná ma ɲyii wuuni i.
Lire kurugo mu à ɲcyii kabwɔhigii puni pyi,
maa ma báarapyiŋi mú yaha u à cyi cè.
22 Ei Saanbwɔhe Kafooŋi ,
mu à pêe,
mu ɲca ɲyɛ a sìi mɛ.
Mà tàanna ná ɲje wuu à lógo ke,
Kileŋi wà sàha ɲyɛ a sìi mu baare e mɛ.
23 Tá supyishi na ɲyɛ ɲìŋke na,
ŋgemu u ɲyɛ mu shiinbii,
Izirayɛli shiinbii fiige?
Mu yabiliŋʼà sà pire mpiimu yige Misira kìni i,
maa pi pyi ma shiinbii,
maa ma mɛge pêe.
Mu à kabwɔhii pyi pi á,
maa fyagara karigii pyi,
maa pi yige Misira shiinbii bilere e.
Mu u à supyishi kuuyo niɲyahaya ná pi kacyanhigii kɔ̀rʼa lwɔ́ ma shiinbii yyaha na.
24 Mu u à ma shiinbii Izirayɛli shiinbii tìŋɛ,
bà pi si mpyi si mpyi mu wuu tèrigii puni i mɛ.
Ɲyɛ,
mu Kafooŋi ,
mu u à pa mpyi pi Kileŋi.
25 Numɛ,
Kafooŋi Kile,
ɲwɔmɛɛni mu à lwɔ́ mii mu báarapyiŋi ná mii pyɛngɛ shiinbilʼá ke,
kwôro lire na tèrigii puni i.
Bà mu à yi jwo mɛ,
li pyi amuni.
26 Mu mɛgɛ ku pêe tèrigii puni i,
bà li si mpyi,
sùpyire puni sʼa ŋko:
“Síŋi foo Kafooŋi u ɲyɛ Izirayɛli shiinbii Kileŋi!”
Mii,
mu báarapyiŋi Dawuda pyɛnge yaha ku tígile ma yyahe taan tèrigii puni i.
27 Síŋi foo Kafooŋi Izirayɛli u Kileŋi,
mu à li cyêe ma báarapyiŋi na maa u pyi:
“Mii sí baga shiin kan mu á.”
Lire lʼà mii ta mii à naye ndîri maa ŋke ɲarage pyi.
28 Ɲyɛ numɛ,
Saanbwɔhe Kafooŋi ,
mu u ɲyɛ Kile,
mu jwumpe na ɲyɛ sèe.
Mu u à nde kacɛnni ɲwɔmɛɛni lwɔ́ ma báarapyiŋʼá.
29 Mii à mu ɲáara ma a jwó lwɔ́ ma báarapyiŋi pyɛnge na,
bà u tùluge si mpyi si ŋkwôro mu yyahe taan tèrigii puni i mɛ.
Ɲaha kurugo yɛ,
Saanbwɔhe Kafooŋi ,
mu u à jwo amuni.
Mu jwóŋi cye kurugo,
mu báarapyiŋi pyɛnge sí fànha ta tèrigii puni i!»