Tunmbyaare mbwùuni ŋkàreŋi Zheruzalɛmu i
6
Lire kàntugo,
ka Dawuda si Izirayɛli kàshikwɔnmpiyi puni wà piye na sahaŋki,
pire puni mpyi shiin kampwɔhii beɲjaaga ná kɛ (30.000).
2 Ka u u yîri ná tire sùpyire e mà kàre Baala e,
Zhuda kùluni i,
si sà Kile tunmbyaare mbwùuni lwɔ́.
Síŋi foo Kafooŋi mɛge mpyi na yiri li na.
Sheribɛɛn shuunni na mpyi tunmbyaare mbwùuni na,
Kafooŋi tatɛɛnge si ɲyɛ pire sherubɛɛnbii* shwɔhɔlʼe.
3 Ka pi i Kile tunmbyaare mbwùuni lwɔ́ a yige Abinadabu pyɛnge e.
Kuru pyɛnge mpyi ɲaŋke ɲuŋʼi.
Ka pi i li le nìiyi wòtorofɔnŋi wʼe.
Abinadabu jyaabii,
Uza ná Ayo,
pire pi mpyi a wòtoroŋi yyaha cû.
4 Lire pyiŋkanni na pi à Kile tunmbyaare mbwùuni yige Abinadabu pyɛnge e ɲaŋke ɲuŋʼi,
mà le nìiyi wòtoroŋi i mà kàre.
Uza mpyi na ɲaare Kile tunmbyaare mbwùuni ŋkère na,
Ayo si ɲyɛ li yyaha yyére na wà.
5 Dawuda ná Izirayɛli shiinbii puni mpyi funntange e Kafooŋi yyahe taan,
pi mpyi na yatire shiŋi puni bwùun,
tire yatire mpyi a yaa ná sipɛrɛ ciyi i,
mu à jwo:
Ŋkɔ̀nnɔbii ná mpòoɲyi ná pìnŋgaare ná dàɲyɛŋi kantakworo yaare.
6 Pi à sà nɔ Nakɔn sùmaŋi fyiini na ke,
ka nìiyi si ntɛ̂rɛlɛ.
Ka Uza si u cyeyi yîrige maa Kile tunmbyaare mbwùuni cû.
7 Ɲyɛ ka Kafooŋi lùuni si yîri Uza taan sèlʼe.
Kuru tanuge e,
ka Kile si u bò lire kapiini mpyiŋi kurugo.
Uza à kwû Kile tunmbyaare mbwùuni ŋkère na wani.
8 Kafooŋʼà Uza bò ke,
lire mpyi a Dawuda kànha.
Ka pi i kuru cyage mɛge le Pɛrɛzi-Uza.
Fo mà pa nɔ niɲjaa na,
kuru ku ɲyɛ kuru cyage mɛge.
9 Kuru canŋke,
ka Dawuda si fyá Kafooŋi yyaha na maa jwo:
«Ká mpyi amuni yi ɲyɛ,
di Kafooŋi tunmbyaare mbwùuni sí n-jà mpa mii yyére ɲjwo yɛ?»
10 U ɲyɛ a ɲɛnʼa kàre ná Kafooŋi tunmbyaare mbwùuni i Dawuda kànhe e mɛ.
U à li yaha a kàre Obɛdi-Edɔmu pyɛnge e.
Uru mpyi na yîri Gati kànhe e.
11 Yiɲyɛ taanre Kafooŋi tunmbyaare mbwùuni à pyi Gati shinŋi Obɛdi-Edɔmu pyɛnge e.
Ka Kafooŋi si jwó lwɔ́ Obɛdi-Edɔmu ná u pyɛngɛ shiinbii puni na.
12 Ɲyɛ ka pi i mpa yi jwo saanŋi Dawuda á na Kafooŋi na wa a jwó lwɔ́ Obɛdi-Edɔmu ná u cyeyaayi puni na Kile tunmbyaare mbwùuni kurugo.
Ɲyɛ ka Dawuda si yîrʼa kàrʼa sà Kile tunmbyaare mbwùuni lwɔ́ Obɛdi-Edɔmu pyɛnge e,
mà kàre u yabiliŋi kànhe na.
Ka li i mpyi funntanga.
13 Mpii pi mpyi a Kafooŋi tunmbyaare mbwùuni tugo ke,
pirʼà tonlaaya baani ta ke,
maa yyére.
Ka Dawuda si nupee ná nunaga sìnmɛ wogo pyi sáraga.
14 Dawuda mpyi na ŋkwɔ̂hɔli ná u fànhe puni i Kafooŋi yyahe taan.
Dìizinzhiliŋi vàanntinŋɛ kanna ku mpyi u na.
15 Lire pyiŋkanni na,
Dawuda ná Izirayɛli shiinbii punʼà pa ná Kafooŋi tunmbyaare mbwùuni i,
ná funntanga kwuuyi ná mpúruwaagii tùnmpe e.
16 Ɲyɛ,
tèni i Kafooŋi mbwùuni mpyi na jyè Dawuda kànhe e ke,
Soli pworoŋi Mikali mpyi a yyére na wíi fìnɛtiriŋi i.
U à saanŋi Dawuda ɲya u u yini maa ŋkwɔ̂hɔli Kafooŋi yyahe taan ke,
ka u u wá na Dawuda fare uye funŋʼi.
17 Ɲyɛ,
pi à pa ná Kafooŋi tunmbyaare mbwùuni i ke,
maa li yaha vàanŋke bage e,
Dawuda mpyi a kuru ŋkemu yaa li mɛɛ na ke.
Ka Dawuda si sáraya nizogoyo ná funntanga sáraya wwû Kafooŋi á.
18 Dawuda à yire sárayi nizogoyo ná funntanga sárayi wwû a kwɔ̀ ke,
maa jwó le sùpyirʼá Síŋi foo Kafooŋi mɛge na.
19 Lire kàntugo,
ka u u bwúuruɲuɲwɔ niŋkin niŋkin ná támariŋi tàntɛnɲjyirii niŋkin niŋkin ná ɛrɛzɛn waŋi tàntɛnɲjyirii niŋkin niŋkin kan Izirayɛli shiinbii puni niŋkin niŋkinŋʼá,
nɔ̀ bâra ceewe na.
Lire kàntugo,
ka pi shin maha shin si núrʼa kàre u pyɛnge e.
20 Ɲyɛ ka Dawuda si núrʼa kàre u pyɛnge e,
si sà jwó le u pyɛngɛ shiinbilʼá.
Ka Soli pworoŋi Mikali si u ɲùŋɔ bɛ̂ maa u pyi:
«Ei!
Izirayɛli shiinbii saanŋʼà pèenɛ ta niɲjaa dɛ!
Mu cípyire wuŋʼà maye cyêe ma báarapyiibii bilicyeebii na supyikuuŋɔ fiige!»
21 Ka Dawuda si Mikali ɲwɔ shwɔ:
«Kafooŋi yyahe taan mii à kwɔ̂hɔ.
Uru ŋgemu u à mii cwɔɔnrɔ mà pyi u shiinbii Izirayɛli shiinbii ɲùŋufooŋi,
maa mu tuŋi ná u pyɛngɛ shiinbii yaha ke,
uru yyahe taan mii á kwɔ̂hɔ.
22 Mii sí naye pyi shintiiwe fiige sahaŋki,
ali mà tòro mpe taan,
si naye tîrege sahaŋki.
Lire ná li wuuni mú i,
bilicyeebii kyaa mu à jwo ke,
pire sí raa mii pêre.»
23 Ɲyɛ,
Soli pworoŋi Mikali ɲyɛ a pyà ta mɛ,
fo mà sà yaa ná u kwùŋi i.