Dawuda à pyi Izirayɛli shiinbii puni saanŋi
5
Lire kàntugo,
ka Izirayɛli tùluyi puni si ŋkàre Dawuda yyére Eburɔn kànhe e,
maa sà u pyi:
«Wuu ná mu na ɲyɛ niŋkin.
Wuu na ɲyɛ cìnmpyii.
2 Tèni là à tòro,
mà Soli yaha wuu saanŋi mu u mpyi maha sì maa núruli ná Izirayɛli shiinbilʼe kàshigʼá.
Kafooŋi mpyi a yi jwo mu á:
“Mu u sí n-pyi mii shiinbii,
Izirayɛli shiinbii nàhafooŋi,
si n-pyi Izirayɛli shiinbii ɲùŋufooŋi.”»
3 Lire pyiŋkanni na,
Izirayɛli kacwɔnribii punʼà pa saanŋi Dawuda yyére Eburɔn kànhe e.
Ka Dawuda si tunmbyara le ná pi e Eburɔn kànhe e Kafooŋi yyahe taan.
Ka pi i sìnmpe tìri Dawuda na mà pyi Izirayɛli shiinbii puni saanŋi.
4 Dawuda à pyi Izirayɛli shiinbii saanŋi tèni ndemu i ke,
u shìŋi mpyi yyee beɲjaaga ná kɛ.
U à pyi Izirayɛli shiinbii saanŋi yyee beeshuuni funŋʼi.
5 Mà u yaha Eburɔn kànhe e,
u à pyi Zhuda shiinbii saanŋi yyee baashuunni ná yiɲyɛ baani funŋʼi.
Mà u yaha Zheruzalɛmu kànhe e,
u à pyi Izirayɛli shiinbii puni ná Zhuda shiinbii saanŋi yyee beɲjaaga ná kɛ ná taanre funŋʼi.
Zheruzalɛmi kànhe ɲcùŋi kani
6 Ka saanŋi Dawuda ná u shiinbii si ŋkàre Zheruzalɛmu kànhe mɛɛ na,
si sà Yebusi shiinbii tùn,
pire mpiimu pi mpyi kuru cyage shiinbii ke.
Ka pire si Dawuda pyi:
«Mu sì n-jyè naha mɛ!
Ali fyinmpii ná toŋkɛgɛyi feebii sí n-jà mu sige ɲjyìŋi na naha.»
Lire ɲwɔhe ku ɲyɛ,
na Dawuda sì n-jà n-jyè pire kànhe e mɛ.
7 Ŋka Dawuda à Siyɔn kànhe kàshisulubage shwɔ pi na.
Kuru kʼà pa mpyi Dawuda kànhe.
8 Kuru canŋke,
Dawuda mpyi a jwo:
«Shin maha shin la ku ɲyɛ si Yebusi shiinbii tùn si jà pi na ke,
urufoo u kàre lùŋkuuŋi kurugo u a sì yire toŋkɛgɛyi feebii ná pire fyiinmpii mɛɛ na,
pire mpiimu pi ɲyɛ mii Dawuda zàmpɛɛnbii ke.»
Lire kurugo,
pi maha jwo:
«Fyinmpii ná toŋkɛgɛyi feebii ɲyɛ a yaa pi a jyè Kile bage e mɛ.»
9 Dawuda à sà ntɛ̀ɛn kàshisulu bage e,
lire kurugo pi à ku mɛgɛ le Dawuda kànhe.
Ka Dawuda si káaɲyi yà faanra,
mà lwɔ́ Milo na,
mà mâhana a kàre fo funŋʼi.
10 Là mpyi na bârali Dawuda saanre mpèeŋi na,
ɲaha kurugo yɛ,
Síŋi foo Kafooŋi Kile mpyi ná u e.
Tiri saanŋʼà ma yaaya kan Dawuda á
11 Ɲyɛ Tiri saanŋi Iramu à tùnntunmii tun Dawuda á ná sediri cire e.
U à cíkyanhibii pìi ná kafatempii pìi tun u á mú,
ka pire si mpa saanra baga faanra Dawuda á.
12 Ɲyɛ Dawuda mpyi a li cè na Kafooŋi u à uru pyi Izirayɛli shiinbii saanŋi,
maa uru saanre tígile u shiinbii Izirayɛli shiinbii kurugo.
Dawuda jyaabii pi à si Zheruzalɛmu kànhe e ke
13 Ɲyɛ,
Dawuda yìriŋkwooŋi kàntugo Eburɔn kànhe e mà kàre Zheruzalɛmu kànhe e,
u à cyeebii piibɛrii ná bilicyee lèŋɛ mà pyi u cyee.
Pirʼà pùnampyire ná pùcempyire si u á mú.
14 Pùnampyire u à si mà u yaha Zheruzalɛmu i ke,
pire mɛyi yi ɲyɛ:
Shamuha ná Shobabu ná Natan ná Solomani,
15 ná Ibari ná Elisuwa ná Nefɛgi ná Yafiya,
16 ná Elisama ná Eliyada ná Elifelɛti.
Dawuda à Filisi shiinbii tùn maa jà pi na
17 Ɲyɛ Filisi shiinbilʼà pa lógo na pi à sìnmpe tìri Dawuda na mà pyi Izirayɛli shiinbii saanŋi ke,
ka pi kàshikwɔɔnbii puni si wà piye na,
maa ŋkàrʼa sà u caa si u tùn.
Dawuda à puru lógo ke,
maa ŋkàrʼa sà ŋwɔhɔ kàshisulu bage e.
18 Filisi shiinbilʼà pa Erefayimu shiinbii bafage ɲî.
19 Ɲyɛ ka Dawuda si Kafooŋi yíbe:
«Mii à yaa mii shà Filisi shiinbii mɛɛ na la?
Mu sí pi le mii cye e la?»
Ka Kafooŋi si Dawuda ɲwɔ shwɔ:
«Ta sì ma a sà pi tùn.
Mii sí Filisi shiinbii le mu cye e.»
20 Ka Dawuda si ŋkàrʼa sà nɔ fo Baali-Perasimu i,
maa sà Filisi shiinbii tùn,
maa jà pi na.
Ka Dawuda si jwo:
«Kafooŋi à kuro wwû mii á na zàmpɛɛnbii shwɔhɔlʼe bà lwɔhe maha kàsɔɔgɔ ŋɔɔŋʼa cyán maa kuro wwû mɛ.»
Lire kurugo,
pi à kuru cyage mɛgɛ le Baali-Perasimu.
Kuru ɲwɔhe ku ɲyɛ:
«Kafooŋi u maha kuni wwû.»
21 Ka Filisi shiinbii si fê maa pi kacyanhigii yaha.
Ka Dawuda ná u shiinbii si cyi lwɔ́ a kàre.
22 Lire kàntugo,
ka Filisi shiinbii si mpa Erefayimu shiinbii bafage ɲî sahaŋki.
23 Ka Dawuda si núrʼa Kafooŋi yíbe,
ka Kafooŋi si u pyi:
«Ma hà ntíi ŋkàre pi fye e mɛ.
Mâhana a tòro ma a sì pi fye e.
Cyage e muriye ciyi ɲyɛ ke,
ma a sà ɲcwo pi na kuru cyage yyaha yyére.
24 Yii aha mpa na nintahii tùnmɔ núru muriye ciyi nìɲyi na,
yii i fyâlʼa fworo.
Ɲaha na yɛ,
Kafooŋi u ɲyɛ na sì yii yyaha na si sà Filisi shiinbii kàshikwɔɔnbii tùn.»
25 Karigii Kafooŋi mpyi a jwo Dawuda á ke,
u à cyire puni pyi.
U à Filisi shiinbii tùn maa jà pi na,
mà lwɔ́ Geba kànhe na,
mà sà nɔ fo Gezɛri kànhe na.