Isibosɛti mbòŋi kani
4
Ɲyɛ,
Soli jyaŋi Isibosɛti à lógo na pi à Abinɛri bò Eburɔn kànhe e ke,
ka u zòŋi si ŋkwɔ̀n a cwo.
Izirayɛli shiinbii puni mú mpyi a fyá sèlʼe.
2 Lirʼà ta,
yyaha yyére shiin shuunni mpyi Soli jyaŋi Isibosɛti kàshikwɔnkuruɲyi ɲùŋɔ na.
Wà mɛgɛ mpyi Baana,
u sanŋi mɛgɛ si mpyi Erekabu.
Irimɔ jyaa pi mpyi pire mà yîri Berɔti kànhe e.
Bezhamɛ tùluge shiin pi mpyi pi pi.
Ɲaha na yɛ,
Berɔti kànhe na mpyi Bezhamɛ shiinbii tare e.
3 Ŋka Berɔti kànhe shiinbii mpyi a fê a kàre Gitayimu kànhe e.
Pire na ɲyɛ wani ali niɲjaa.
4 Ɲyɛ jyafooŋi wà na mpyi Soli jyaŋi Zhonatan á,
u mɛgɛ mpyi Mefibosɛti.
U tooyi shuunniŋi puni mpyi a kɛ̀ɛgɛ.
Tèni i pi à pa Soli ná Zhonatan kwùŋi jwo mà yîri Zizirɛli kànhe e ke,
Mefibosɛti shiŋi mpyi yyee kaŋkuro.
Ceeŋi u mpyi na u byíi ke,
ka uru funvwugo wuŋi si pyàŋi lwɔ́ sʼa fî.
Ka u u shwɔ a cwo mà u tooyi kɛ̀ɛgɛ,
ka u u ŋkwôro cwɔ̀hɔmɔ foo.
5 Ɲyɛ canŋka canvwuge na,
Berɔti kànhe shinŋi Irimɔ jyaabii,
Erekabu ná Baana à kàre Isibosɛti pyɛnge e mà sà u ta u à sínni na u canvwugo ŋɔɔmpe pyi.
6 Ka pi i jyè ná sùma e mà kàre fo u bage funŋke e,
maa piye pyi mu à jwo sùmaŋi pi sí n-sà yaha,
maa Isibosɛti sú a fûru u yaceni i ná ŋwɔɔni i mà bò,
maa fworʼa fê.
7 Lire jyiŋkanni na pi à jyè bage e mà u ta u à sínnʼa sànhana u yasiniŋke na,
u bashwɔnge e.
Ka pi i u sú a bò,
maa u ɲùŋke kwɔ̀n,
maa ku lwɔ́ a fworo,
maa numpilage puni pyi ɲani na Zhurudɛn bafage kuni i.
8 Pi à kàre ná Isibosɛti ɲùŋke e saanŋi Dawuda yyére Eburɔn kànhe e,
maa sà u pyi:
«Mu zàmpɛnŋi Soli la ku mpyi si mu bò ke,
uru jyaŋi Isibosɛti ɲùŋke ku ŋke.
Niɲjaa,
Kafooŋi à saanŋi,
mii ɲùŋufooŋi nàvunŋɔ kwɔ̀ Soli ná u tùluge shiinbii na!»
9 Ka Dawuda si Berɔti kànhe shinŋi Irimɔ jyaabii shuunniŋi,
Erekabu ná u cɔɔnŋi Baana ɲwɔ shwɔ:
«Mii sí n-kâa Kafooŋi ɲyii wuŋi mɛgɛ na,
uru ŋgemu u à mii yige na cwɔ̀rɔmpe puni i ke.
10 Mà mii yaha Zikilaki kànhe e,
nàŋi u mpyi a pa Soli ŋkwùŋi jwo mii á ke,
uru mpyi na sɔ̂nŋi na jwuntanma u à pa jwo mii á.
Ŋka,
mii à pi pyi pi à u cû a bò si ntɛ̀gɛ u sâra si ntàanna ná u niɲjwumpe e!
11 Numɛ yii shinpiibii,
yii à sà shintíiŋi ta u yasinniŋke na u bage e,
maa u bò.
Lire e ke mii ɲyɛ a yaa mii i tire boore ŋkooŋi wwû yii na,
si yii shi pînniŋɛ ɲìŋke na mà?»
12 Ɲyɛ ka Dawuda si u fyèɲwɔhɔ shiinbii pyi pi pi bò.
Ka pire si pi bò,
maa pi cyeyi ná pi tooyi kwɔ̀n kwɔ̀n,
maa pi pwɔ a dùrugo Eburɔn kànhe lwɔhe ɲwɔge na.
Ɲyɛ ka pi i Isibosɛti ɲùŋke lwɔ̀ á sà n-tò Abinɛri fanŋke e.