3
Kàshigʼà mɔ Soli shiinbii ná Dawuda shiinbii shwɔhɔlʼe.
Ŋka là mpyi na bârali Dawuda fànhe na,
là si i fwore Soli shiinbii woge e.
Dawuda à jyaabii mpiimu si Eburɔn e ke
2 Dawuda à jyaabii pìi si mà u yaha Eburɔn kànhe e.
U jyaŋi niɲcyiiŋi mɛgɛ mpyi Aminɔ,
u mpyi a uru si Zizirɛli shinŋi Ayinohamu na.
3 U jyaŋi shwɔnwuŋi mɛgɛ mpyi Kilehabu,
u à uru si u cwoŋi Abigayili na,
uru mpyi a fyânha a pyi Karimɛli shinŋi Nabali u à kwû ke,
uru cwo.
U jyaŋi tanrewuŋi u mpyi Abisalɔn.
U mpyi a uru si u cwoŋi Mahaka na,
uru na mpyi Geshuri saanŋi Talimayi pworo.
4 U jyaŋi sicyɛrewuŋi mɛgɛ mpyi Adoniya.
U mpyi a uru si u cwoŋi Agiti na.
U jyaŋi kaŋkurowuŋi mɛgɛ mpyi Sefatiya.
U mpyi a uru si u cwoŋi Abitali na.
5 U jyaŋi baaniwuŋi mɛgɛ mpyi Itereyamu.
U mpyi a uru si u cwoŋi Egila na.
Pùnampyire tʼà si Dawuda á mà u yaha Eburɔn kànhe e ke,
pire pi ɲyɛ mpii.
Abinɛri à sà uye kan Dawuda á
6 Mà Soli shiinbii ná Dawuda shiinbii yaha kàshige na,
Abinɛri fànhe mpyi na ɲyahage Soli shiinbii shwɔhɔlʼe.
7 Ɲyɛ,
Soli mpyi a bilicwoŋi wà lèŋʼa pyi u cwo,
u mɛgɛ mpyi Irisipa.
Uru u tuŋi mɛgɛ mpyi Aya.
Canŋka,
Isibosɛti à Abinɛri cɛ̂ɛgɛ:
«Ɲaha na mu à jyè mii tuŋi cwoŋi kurugo yɛ?»
8 Ɲyɛ,
Isibosɛti jwumpe mpyi a Abinɛri lùuni yîrige sèlʼe.
Ka u u Isibosɛti ɲwɔ shwɔ:
«Lire e ke,
pwun u ɲyɛ mii,
ŋgemu u à yaha Zhuda shiinbii báaraŋi laage e la?
Fo mà pa nɔ numɛ na,
mii à pyi ɲwɔmɛɛ foo mu tuŋi Soli pyɛngɛ shiinbii,
ná u cìnmpyiibii ná u ceveebilʼá.
Mii ɲyɛ a ɲɛnʼa mu le Dawuda cye e mɛ.
Niɲjaa mu na mii cɛ̂ɛge ŋge ceeŋi woge na la?
9 Ɲyɛ ɲwɔmɛɛni Kafooŋi à lwɔ́ Dawuda á ke,
ná mii ɲyɛ a Dawuda tɛ̀gɛ si lire fûnŋɔ mɛ,
Kile kà na yaha mɛ.
10 Ɲaha na yɛ,
Kafooŋi à kâa na uru sí saanre shwɔ Soli pyɛngɛ shiinbii na,
si Dawuda tìŋɛ saanre na Izirayɛli shiinbii,
ná Zhuda kùluni puni ɲùŋɔ na mà lwɔ́ Dan kànhe na,
si sà nɔ fo Bɛrisheba kànhe na.»
11 Isibosɛti ɲyɛ a jà a Abinɛri ɲwɔ shwɔ ná jwumɔ niŋkin i mɛ,
ɲaha na yɛ u mpyi a fyá Abinɛri yyaha na.
12 Lire tèenuuni i,
ka Abinɛri si tùnntunmii tun Dawuda á pi sà yi jwo u á:
«Nde kìni ɲyɛ jo wuu yɛ?
Tunmbyara le ná nʼi.
Lire ká mpyi,
mii sí mu tɛ̀gɛ si Izirayɛli shiinbii puni yyaha kɛ̂ɛnŋɛ mu yyére.»
13 Ka Dawuda si u ɲwɔ shwɔ:
«Ɔɔn,
mii à ɲɛɛ si tunmbyara le ná mu i.
Ŋka mii sí kyaa niŋkin cya mu á,
lire li ɲyɛ,
mu aha a ma mii yyére,
mu àha mpyi mu ɲyɛ a pa ná Soli pworoŋi Mikali i mɛ,
ma hà ŋkwɔ̀ nɔ naha mɛ.»
14 Ɲyɛ ka Dawuda si tùnntunmii tun Soli jyaŋi Isibosɛti á maa u pyi:
«Na cwoŋi Mikali núruŋʼa kan na á,
ɲaha na yɛ Filisi shiinbii nàmbaa ŋkuu (100) mii à kwɔ̀n maa yire seeyi kan,
maa u pyi na cwo.»
15 Ka Isibosɛti si Mikali shwɔ u pooŋi Palitiyɛli na.
Uru na mpyi Lahisi jya.
16 Ka u pooŋi mɛsuwuŋi si ntaha u fye e fo mà sà nɔ Bahurimu na.
Pi à nɔ wani ke,
ka Abinɛri si u pyi na u núru.
Ka u u núru.
17 Ɲyɛ ka Abinɛri si sà jwo ná Izirayɛli shiinbii kacwɔnrɔbilʼe.
U à jwo:
«Mà lwɔ́ fo tèemɔni i,
yii à li cya na Dawuda u pyi yii saanŋi.
18 Ɲyɛ numɛ,
li tèepyiinʼà nɔ,
ɲaha kurugo yɛ,
uru kyaa na Kafooŋi Kile à jwo:
“Mii sí na shiinbii Izirayɛli shiinbii shwɔ Filisi shiinbii na,
si pi shwɔ pi zàmpɛɛnbii puni na,
mii bárapyiŋi Dawuda cye kurugo.”»
19 Abinɛri à sà jwo ná Bezhamɛ tùluge shiinbilʼe mú.
Izirayɛli shiinbii ná Bezhamɛ tùluge shiinbii punʼà ɲwɔ ɲjemu na ke,
ka u u sà yire puni yyaha jwo Dawuda á Eburɔn kànhe e.
20 Abinɛri niŋkareŋi Dawuda yyére Eburɔn kànhe e,
nàmbaa beɲjaaga pi mpyi a kàre ná u e.
Pi à nɔ wani ke,
ka Dawuda si lyìmbwoo bégele Abinɛri ná u fyèɲwɔhɔ shiinbilʼá.
21 Ka Abinɛri si Dawuda pyi:
«Mii sí n-sà Izirayɛli shiinbii puni bínni saanŋi mii kàfooŋʼá,
bà pi si mpyi si tunmbyara le ná mu i mɛ.
Lire ká mpyi,
cyage kʼà táan mu á ke,
mu sí ma saanre tìŋɛ wani.»
Ɲyɛ ka Dawuda si Abinɛri yaha a kàre yyeɲiŋke e.
Abinɛri mbòŋi kani
22 Ɲyɛ,
tèrʼà tòro ke,
ka Yohabu ná Dawuda shiinbii si mpa mà yîri kàshige kà cyagʼe.
Pi mpyi a yaaya niɲyahaya shwɔ pi zàmpɛɛnbii na kàshige cyage e.
Ŋka Abinɛri saha ɲyɛ mpyi Dawuda taan Eburɔn kànhe e mɛ,
ɲaha na yɛ Dawuda mpyi a u yaha a kàre yyeɲiŋke e.
23 Yohabu ná u kàshikwɔɔnbii kuruŋke punʼà nɔ wani ke,
ka sùpyire si u pyi:
«Nɛri jyaŋi Abinɛri mpyi a pa saanŋi yyére,
lire kàntugo,
ka saanŋi si u yaha a kàre yyeɲiŋke e.»
24 Ɲyɛ ka Yohabu si shà saanŋi yyére maa sà u pyi:
«Ɲaha mu à pyi amɛ yɛ?
Abinɛri à pa mu yyére,
ɲaha na mu à u yaha u à kàre amuni yɛ?
25 Ŋka mu à Nɛri jyaŋi Abinɛri cè!
U à pa mu fɔ̀ɔnŋɔ,
bà li si mpyi,
cyeyi i wuu ɲyɛ na sì na kàshiyi kwùun ke,
si jà yire puni cè,
si mu karigii nimpyiiŋkii puni cè mɛ.»
26 Ɲyɛ ka Yohabu si yîri Dawuda taan,
maa tùnntunmii tun Abinɛri á.
Ka pire si sà Abinɛri ta Sira bɛ̀ɛnŋke taan.
Ka pi i u yyerʼa núruŋɔ.
Ŋka Dawuda ɲyɛ a mpyi a pà cè lire kani i mɛ.
27 Ɲyɛ Abinɛri à núrʼa pa Eburɔn kànhe e ke,
ka Yohabu si u yyere ŋkère na,
kànhe tajyiɲwɔge na,
maa li pyi mu à jwo u la na ɲyɛ si uru ná u kanni jwumɔ jwo u á.
Mà pi yaha lire na,
ka Yohabu si mpâlʼa Abinɛri sú ná ŋwɔɔnni i u yaceni i,
mà bò.
U à lire pyi si u kàntugowuŋi Asayɛli mbòŋi nàvunŋɔ kwɔ̀ u na.
28 Dawuda à pa lire kani lógo ke,
maa jwo:
«Kafooŋi sì n-sìi mii cɛ̂ɛgɛ,
lire ɲyɛ mɛ,
si mii saanre cɛ̂ɛgɛ,
Nɛri jyaŋi Abinɛri mbòŋi i mɛ.
29 U kwùŋi tugure ti cwo Yohabu ná u pyɛngɛ shiinbii puni na.
Tèrigii puni i,
u pyɛngɛ shiinbilʼe,
fyereŋgyaani yampe pu pìi cû,
lire ɲyɛ mɛ,
tòge ku pìi cû,
lire ɲyɛ mɛ,
pìi pi pyi cwɔ̀hɔmɔfee pi a ɲaare ná kàbigilʼe,
lire ɲyɛ mɛ,
pìi pi bò kàshige cyage e,
lire ɲyɛ mɛ,
katege ku cwo pìi na.»
30 Ɲyɛ,
lire pyiŋkanni na,
Yohabu ná u sìɲɛɛŋi Abisayi à Abinɛri bò.
Ɲaha na yɛ,
Abinɛri u mpyi a pi cɔɔnŋi Asayɛli bò Gabahɔn kàshige cyage e.
31 Ɲyɛ ka Dawuda si Yohabu pyi,
mà bâra mpii puni pi mpyi ná u e ke:
«Yii yii vàanntinɲyi cwɔn cwɔn,
yii i cafubɔrigii* le,
yii i ntòro Abinɛri buwuŋi yyaha na yii raa kwùŋi yamɛɛni súu yii sà u tò.»
Saanŋi Dawuda yabiliŋi mpyi na ɲaare buŋi kàntugo na wà u tatoŋke e.
32 Pi à sà u tò Eburɔn kànhe e.
Ka saanŋi si mɛɛ sú sèlʼe maa kuuyi wà Abinɛri fanŋke na.
Ɲyɛ ka sùpyire puni si mɛɛ sú.
33 Ka saanŋi si ŋke parage mɛɛni cêe na:
«Ei,
ta Abinɛri mpyi a yaa u kwû amɛ mu à jwo sìcyerefoo la?
34 Mu cyeyi ɲyɛ a mpyi a pwɔ mɛ,
mu tooyi mú ɲyɛ a mpyi a pwɔ ná tɔɔnnɔ yɔ̀rɔyʼe mɛ.
Mu à cwo bà wà maha ɲcwo shinpiibii fere e mɛ.»
Ɲyɛ,
lirʼà pyi ke,
ka sùpyire puni si núru na myahigii súu Abinɛri buwuuŋi ɲuŋʼi.
35 Lire kàntugo,
ka sùpyire puni si file Dawuda na,
si u pyi u lyî.
Lirʼà numpilage ta ku sàha wwɔ̀ mɛ.
Ka Dawuda si ŋkâa maa jwo:
«Mii aha bwúuru kwɔngɔ lire ɲyɛ mɛ,
yalyige kabɛrɛ le na ɲwɔge e mà li ta canŋaɲyiini sàha ɲcwo mɛ,
Kile kà na yaha mɛ.»
36 Sùpyire punʼà puru jwumpe lógo ke,
ka li ntáan pi e.
Karigii puni saanŋi mpyi maha mpyi ke,
cyire puni mpyi maha ntáan pi á.
37 Ɲyɛ ka kàshikwɔɔnbii ná Izirayɛli shiinbii puni si li cè kuru canŋke na saanŋi fyè bà u mpyi Nɛri jyaŋi Abinɛri mbòŋi mɛ.
38 Ka saanŋi si u báarapyiibii pyi:
«Taha yii ɲyɛ a cè na ɲùŋufoo ná shinbwo u à bò niɲjaa Izirayɛli i mɛ?
39 Sèe,
pi à sìnmpe tìri mii na mà pyi saanŋi,
ŋka mii fànhʼà sàa cyɛ́rɛ ali numɛ.
Mpii nàmbaabii pi ɲyɛ Soruya jyaabii ke,
pire fànhʼà pêe mii woge na.
Ɲyɛ,
shinŋi u à nde kapiini pyi ke,
Kafooŋi yabiliŋi u li ŋkooŋi wwû urufoo na,
u tàanna ná u kapiini nimpyiini i.»