Dawuda á pyi Zhuda shiinbii saanŋi
2
Lire kàntugo,
ka Dawuda si Kafooŋi yíbe:
«Kafooŋi ,
mii à yaa mii i ŋkàre Zhuda shiinbii kànhe kà na la?»
Ka Kafooŋi si u pyi:
«Ɔɔn,
ta sì!»
Ɲyɛ ka Dawuda si núrʼa Kafooŋi yíbe:
«Taa mii à yaa mii i ŋkàre ke?»
Ka Kafooŋi si u pyi:
«Ta sì Eburɔn kànhe e!»
2 Ka Dawuda si ŋkàre Eburɔn kànhe e,
u ná u cyeebii shuunniŋi,
Zizirɛli shinŋi Ayinohamu,
ná Abigayili,
uru mpyi a fyânha a pyi Karimɛli shinŋi Nabali cwo.
3 Nàmbaabii pi mpyi ná u e ke,
u à kàre ná pire ná pi pyɛngɛ shiinbii puni i.
Ka pire sí sà n-tɛ̀ɛn Eburɔn kwùumpe kànyi na.
4 Ka Zhuda shiinbii si mpa Eburɔn kànhe e,
maa sìnmpe tìri Dawuda na,
mà pyi pi saanŋi.
Ɲyɛ lire kàntugo,
ka pi i mpa yi jwo Dawuda á na Yabɛsi kànhe ku ɲyɛ Galadi kùluni i ke,
na kuru shiinbii pi à Soli buwuŋi lwɔ́ a sà ntò.
5 Ka Dawuda si tùnntunmii tun Yabɛsi Kànhe shiinbilʼá,
Galadi kùluni i,
maa yi jwo pi á:
«Kafooŋi u jwó le yii á,
ɲaha na yɛ yii à kacɛnnɛ pyi yii kàfooŋi Soli na,
maa u buwuŋi lwɔ́ a sà ntò.
6 Lire e ke,
Kafooŋi mú u tɛ̀ɛn u ɲwɔmɛfente e,
u u kacɛnnɛ pyi yii á.
Nde yii à pyi ke,
lire kurugo mii mú sí kacɛnnɛ pyi yii á.
7 Ɲyɛ,
yii yii yatanɲyi waha yii i yii zòompii tàra.
Yii kàfooŋi Soli à kwû,
numɛ,
mii na Zhuda shiinbilʼà sìnmpe tìri mà pyi pi saanŋi.»
Isibosɛti à pyi Izirayɛli shiinbii saanŋi
8 Ɲyɛ,
Nɛri jyaŋi Abinɛri u mpyi Soli kàshicyɛge yyaha yyére shinŋi ke,
ka uru si ŋkàre ná Soli jyaŋi Isibosɛti i Mahanayimu kànhe e,
9 maa u tìŋɛ mà pyi Galadi shiinbii ná Asuri shiinbii ná Zizirɛli shiinbii ná Efirayimu shiinbii ná Bezhamɛ shiinbii ná Izirayɛli shiinbii sanmpii puni saanŋi.
10 Isibosɛti shìŋi mpyi yyee beeshuunni,
tèni i u à tɛ̀ɛn Izirayɛli shiinbii ɲùŋɔ na saanre e ke.
Yyee shuunni u à pyi saanre na.
Zhuda tùluge shiinbii kanni pi mpyi a taha Dawuda fye e.
11 Yyee baashuunni ná yiɲyɛ baani Dawuda à pyi saanre na Zhuda shiinbii ɲùŋɔ na,
mà u yaha Eburɔn kànhe e.
Soli shiinbii ná Dawuda shiinbii kàshige
12 Ka Nɛri jyaŋi Abinɛri,
ná Soli jyaŋi Isibosɛti kàshikwɔɔnbii si yîri Mahanayimu kànhe e,
maa ŋkàre Gabahɔn kànhe e kàshige mɛɛ na.
13 Ka Seruya jyaŋi Yohabu ná Dawuda kàshikwɔɔnbii mú si ŋkàre wani.
Ɲyɛ ka kàshicyeyi shuunniŋi si sà yiye ta Gabahɔn lwɔhe ɲwɔge na.
Kuruŋke kà na mpyi lwɔhe kàmpanŋke kà na,
kuruŋke sanŋke si ɲyɛ lwɔhe kàmpanŋke sanŋke na.
14 Ka Abinɛri si Yohabu pyi:
«Wuu nàɲjiibii pìi yaha pi piye cû wuu ɲyii na!»
Ka Yohabu si jwo:
«Ɔɔn pi piye cû!»
15 Ka nàɲjiibii si yîrʼa piye bɛ̂.
Yi kuruɲyi puni mpyi dánu:
Soli jyaŋi Isibosɛti kàshikwɔɔnbii mà fworo Bezhamɛ tùluge e,
pire mpyi shiin kɛ ná shuunni.
Dawuda kàshikwɔɔnbii mú mpyi shiin kɛ ná shuunni.
16 Ka pi shin maha shin si u shinɲɛɛŋi purʼa cû u ɲùŋke na,
maa ŋwɔɔni cûru u yaceni i.
Ka pi puni si bínnʼa cwo cwo.
Ɲyɛ cyage e lire kanʼà pyi Gabahɔn kànhe ke,
ka pi i kuru cyage mɛgɛ le Ɛlikati-Asurimua.
17 Kuru canŋke kàshige mpyi a waha sèlʼe.
Ka Dawuda kàshikwɔɔnbii si jà Abinɛri ná Izirayɛli shiinbii sanmpii na.
18 Seruya jyaabii taanreŋi,
Yohabu ná Abisayi ná Asayɛli na mpyi kuru kàshige cyage e.
Asayɛli toni mpya táan sige cèŋke fiige.
19 U à cyán Abinɛri fye e u ɲyɛ a fɛ̂nʼa kàre kàniŋke lire ɲyɛ mɛ,
kàmɛni na mɛ.
20 Abinɛri à pa wíi kàntugo maa jwo:
«Asayɛli,
mu wi la?»
Ka u u jwo:
«Ɔɔn mii wi.»
21 Ka Abinɛri si u pyi:
«Wâlʼa kàre kàniŋɛ,
lire ɲyɛ mɛ,
kàmɛnɛ yyére,
ma a nàɲjiiŋi wabɛrɛ kɔ̀rɔ ma a uru kàshikwɔnyaayi wwû u na.»
Ŋka Asayɛli ɲyɛ a núru Abinɛri fye e mɛ.
22 Ka Abinɛri si núrʼa Asayɛli pyi:
«Núru na fye e!
Ɲaha na mu sí mii yaha mii i mu bò yɛ?
Lire ká mpyi,
di mii sí n-jà na yyahe le mu cìnmpworonaŋi Yohabu i ɲjwo yɛ?»
23 Ŋka Asayɛli ɲyɛ a ɲɛnʼa núru Abinɛri fye e mɛ.
Ɲyɛ ka Abinɛri si u sù u yaceni i ná tàanŋi múnaani i fo tàanŋʼà u fûrʼa fworo u tùbuŋi i.
Ka Asayɛli si ɲcwo à kwû kuru tanuge e.
Cyage e u à cwo a kwû ke,
kàshikwɔnŋi ŋgemu ná mpyi a nɔ wani ke,
uru mpyi maha yyére wani.
24 Ɲyɛ Yohabu ná Abisayi à Abinɛri fyè tɔ̀rɔ.
Canŋaɲyicwoore na,
pi à sà nɔ fo Ama ɲaŋke na,
Giya canŋafyinmpe e,
Gabahɔn síwage kuni na.
25 Bezhamɛ shiinbilʼà pa piye bínni Abinɛri taan.
Pi punʼà piye bínni maa ŋkàrʼa sà yyére ɲaŋke kà ɲuŋʼi.
26 Ka Abinɛri si jwo fànha na Yohabu á:
«Fo ɲaha tère e wuu kàshikwɔnŋwɔɔni sí boore ɲwɔ yaha yɛ?
Mu ɲyɛ a cè na nde sí n-pa ɲùŋɔ kuu kakyara nimbwɔrɔ na mà?
Maye sanŋa yaha ma a yi jwo ma shiinbilʼá na pi pi cìnmpyiibii ŋkɔ̀rɔŋi ɲwɔ yaha amɛ!»
27 Ɲyɛ ka Yohabu si u ɲwɔ shwɔ:
«Sèeŋi na,
Kileŋi ɲyii wuŋi mɛge na,
ná mu ɲyɛ a mpyi a jwo mɛ,
mii shiinbii mpyi na sí pi cìnmpyiibii fyè tɔ̀rɔ fo nùmpanŋa ɲyɛ̀gɛ na.»
28 Ɲyɛ ka Yohabu si mpuruge wyì.
Ka sùpyire puni si yyére.
Pi à Izirayɛli shiinbii fyètɔrɔni ɲwɔ yaha,
ka kàshige si yyére.
29 Ka Abinɛri ná u shiinbii si kuru numpilage puni pyi ɲani na Zhurudɛn bafage e.
Ka pi i Zhurudɛn baŋi jyiile maa ŋkàrʼa sà Bitirɔn dùge jyiile,
mà karʼa sà nɔ Mahanayimu i.
30 Ka Yohabu mú si yîri Abinɛri fyètɔrɔni cyage e mà pa,
maa u shiinbii puni bínni maa pi tɔ̀rɔ.
Ka pi i mpa li ta na nàmbaa kɛ ná baacyɛɛre pi à fô Dawuda shiinbilʼe,
mà bâra Asayɛli na.
31 Ŋka Dawuda shiinbii mpyi a shiin ŋkwuu taanre ná beetaanre (360) bò Abinɛri shiinbilʼe.
Pire puni mpyi Bezhamɛ tùluge shiin.
32 Ɲyɛ ka pi i Asayɛli buwuŋi lwɔ́ a sà ntò u tuŋi fanŋke e Bɛtilɛhɛmu kànhe e.
Ka Yohabu ná u shiinbii si numpilage puni pyi ɲani na,
ɲyɛ̀mugoɲwɔge na,
ka pi i nɔ Eburɔn kànhe e.