Samuwɛli Sémɛŋi shwɔnwuŋi
Soli ná Zhonatan sàngʼà wyì Dawuda á
1
Soli kwùŋkwooni kàntugo,
Dawuda u mpyi a Amalɛki shiinbii tùn maa jà pi na ke,
uru mpyi a núrʼa pa Zikilaki kànhe e li mpyi a canmpyaa shuunni kwɔ̀.
2 Canmpyi tanrewuuni i,
nàŋi wà à yîri Soli kàshikwɔɔnbii cyage e,
u mpyi a u vàanɲyi cwɔn,
u ɲùŋke puni si ɲyɛ pwoore na.
Tèni i u à nɔ Dawuda taan ke,
ka u u ɲcwo ɲìŋke na,
maa niŋkure sín Dawuda taan.
3 Ka Dawuda si u pyi «Taa mu à yîri ke?»
Ka u u jwo:
«Mii à fê a shwɔ mà yîri Izirayɛli shiinbii kàshikwɔɔnbii cyage e.»
4 Ka Dawuda si u pyi «Ɲaha kʼà pyi wani yɛ?
Yi yyaha jwo na á kɛ!»
Ka nàŋi si u pyi:
«Izirayɛli kàshikwɔɔnbilʼà fê pi kàshikwɔnɲɛɛbii yyaha na.
Pi à pi niɲyahamii bò.
Soli ná u jyaŋi Zhonatan à bò mú.»
5 Ka Dawuda si nàŋi pyi:
«Di mu à pyi maa ɲcè na Soli ná u jyaŋi Zhonatan à bò yɛ?»
6 Ka nàŋi si jwo:
«Mii mpyi na naye ɲaare Giliboha ɲaŋke ɲuŋʼi,
mà sà Soli ta u à uye tíiŋɛ u tàanŋi na.
Lirʼà shwɔnyi wòtorobii ná shwɔnfeempii ta pi i ŋko si cye taha u na.
7 U à u yyahe kɛ̂ɛnŋʼa mii ɲya ke,
maa mii yyere.
Ka mii i shwɔ.
8 Ka u u mii pyi:
“Jo u ɲyɛ mu yɛ?”
Ka mii i u pyi:
“Mii na ɲyɛ Amalɛki tùluge shin.”
9 Ka u u mii pyi:
“File naha,
ma a na sanŋi bîiŋɛ,
ɲaha na yɛ mii ɲyɛ ɲyii na,
ŋka mii naha bànni sèlʼe.”
10 Ka mii i file u na maa u bò,
ɲaha na yɛ mii mpyi a li cè na u saha mpyi na sì n-jà zhwɔ mɛ.
Saanre ɲùntoŋke ku mpyi u ɲùŋke na,
ná kaɲcinni li mpyi u cyɛge na ke,
ka mii i yire wwû u na si mpa ŋkan naha na kàfooŋi á.»
11 Ka Dawuda si u vàanntinŋke cwɔn,
u shiinbii pi mpyi na u e ke,
ka pire puni mú si pi wuyi cwɔn cwɔn.
12 Ka pi i kwùŋi yamɛɛni sú,
maa mpaare,
maa súnŋi le fo mà sà nɔ yàkoŋke na,
Soli ná u jyaŋi Zhonatan kurugo ná Kafooŋi kàshicyɛge kurugo,
mà bâra Izirayɛli shiinbii puni pi mpyi a bò ná kàshikwɔnŋwɔɔni i ke.
13 Ɲyɛ ka Dawuda si nàɲjiiŋi yíbe sahaŋki:
«Taa mu à yîri ke?»
Ka u u jwo:
«Amalɛki tùluge shiinbii pi ɲyɛ nàmpɔnte na naha ke,
mii na ɲyɛ pire wà pyà.»
14 Ka Dawuda si u pyi:
«Di lʼà pyi,
ka mu u mpyi mu ɲyɛ a fyá si ma cyɛge nɔ Kafooŋi Kile shincwɔnrɔŋi na maa u bò mà yɛ?»
15 Ɲyɛ ka Dawuda si u fyèɲwɔhɔ shinŋi wà yyere maa u pyi:
«File ma a ŋge nàɲjiiŋi bò!»
Ka nàŋi si file maa u bò.
16 Dawuda mpyi a Amalɛki shinŋi pyi:
«Mu mbòŋi tugure ti cwo ma yabiliŋi ɲuŋʼi.
Mu yabiliŋi jwumpe pʼà cwo mu na,
ɲaha na yɛ mu à jwo na mu à Kafooŋi Kile shincwɔnrɔŋi bò!»
Soli ná Zhonatan kwùŋi parage mɛɛni
17 Dawuda à ŋke parage mɛɛni cêe Soli ná u jyaŋi Zhonatan na.
18 Lire kàntugo,
ka Dawuda si pi pyi na pi Zhuda shiinbii taanna lire mɛɛni na.
Pi maha li mɛgɛ pyi «Sintaage mɛɛni.»
Lire mɛɛnʼà sémɛ Yashari sémɛŋi i na:
19 «Izirayɛli,
yii kàshikwɔnmpiyi à bò yii ɲaɲyi ɲuŋʼi!
Ɲaha na yii nàntanhabilʼà kwû yɛ?
20 Sùpya kà ŋkwɔ̀ mpe jwumpe jwo Gati kànhe e mɛ!
Sùpya kà ŋkwɔ̀ ɲje yyaha jwo Asikalɔn kànhe pyɛnkuuŋi i mɛ!
Lire bàare e,
Filisi shiinbii pùcempyire funɲyi sí n-táan.
Pire niŋkwɔnmbaabii pùcempyire sí raa ŋkwɔ̂hɔli funntange cye e.
21 Giliboha ɲaɲyi,
kamɛŋɛ kà ŋkwɔ̀ n-tîge yii ɲuŋʼi sahaŋki mɛ,
zànha mú kà ɲcwo yii ɲuŋʼi sahaŋki mɛ!
Sùpya kà ŋkwɔ̀ kɛrɛgɛ fàa mu ɲuŋʼi ŋkemu sùma u sí ɲwɔ mɛ!
Ɲaha na yɛ,
wani kàshikwɔnmpiyi tɔɔnnte yabeyʼà wà.
Soli tɔɔnnte yabeŋke,
ku saha sì n-cwuugo ná sìnmpe e mɛ!
22 Zhonatan sintaage ɲyɛ a mpyi na núruli
zàmpɛɛnbii sìshange ná kàshikwɔnmpiyi sìnmpe bàa mɛ.
Soli kàshikwɔnŋwɔɔni niŋgaani mú ɲyɛ a mpyi na núruli mɛ.
23 Soli ná Zhonatan mpyi a táan pi shìŋi puni i,
kwùŋi ɲyɛ a pi láha piye na mɛ!
Pi toro mpyi a wyɛ̀re kàmɛɛgii na,
pi fànhe mpyi a ɲyaha cànraya wogo na.
24 Izirayɛli pùcempyire,
yii a mɛɛ súu Soli kurugo,
uru
u mpyi maha vàansinaɲyi kaan yii á,
maa sɛɛnŋi pùcyage yaleere leni yii vàanɲyi na.
25 Ɲaha kʼà kàshikwɔnmpiyi ta yʼà cwo a kwû kàshige cyage e yɛ?
Ɲaha kʼà Zhonatan bò ɲaɲyi ɲuŋʼi yɛ?
26 Ei mii cìnmpworonaŋi Zhonatan,
mu kwùŋi nàvunŋke naha a sìi mii i.
Mu kani mpyi a sàa waha mii na!
Mu tàange mpyi a pêe mii á,
mà tòro cyeebii wogo na.
27 Ɲaha kʼà pa ná lʼe kàshikwɔnmpiyi punʼà cwo a kwû yɛ?
Ɲaha kʼà pa ná lʼe kàshikwɔnyaayi punʼà kakyara amɛ yɛ?»