Soli ná u jyaa taanrʼà kwôro Filisi shiinbii kàshige e
31
Filisi shiinbilʼà sà ɲcwo Izirayɛli shiinbii na,
ka Izirayɛli shiinbii si fê pi yyaha na,
ka pire si pi niɲyahamii bò Giliboha ɲaŋke ɲuŋʼi
2 Ka Filisi shiinbii si ɲcyán Soli ná u jyaabii fye e maa Zhonatan ná Abinadabu ná Malikisuwa bò Sawuli jyaabilʼe.
3 Kàshigʼà ɲáaŋa Sawuli na,
ka sintaayi ŋwɔfeebii pìi si u ta,
maa u fûrugo sèlʼe.
4 Ka Soli si u kàshikwɔnyaayi lwófooŋi pyi:
«Ma kàshikwɔnŋwɔɔni dìrʼa wwû ma tɛ̀gʼa na fûru.
Mii la ɲyɛ mpii ninŋkwɔmbaabii pi ŋkwɔ̀ a na fûru si na cû raa bâhare mɛ.»
U kàshikwɔnyaayi lwófooŋi ɲyɛ a ɲɛɛ mɛ,
ɲaha kurugo yɛ,
uru mpyi a sàa fyá.
Ka Soli si u kàshikwɔnŋwɔɔni lwɔ́ a yyéeŋɛ,
maa uye yaha a cwo li ɲuŋʼi.
5 Soli kàshikwɔnyaayi lwófooŋʼà u ɲya u à kwû ke,
ka uru mú si uye yaha a cwo u kàshikwɔnŋwɔɔni ɲuŋʼi,
maa ŋkwû a bâra u na.
6 Lire pyiŋkanni na,
Soli ná u jyaabii taanreŋi ná u kàshikwɔnyaayi lwófooŋi ná u fyèɲwɔhɔ shiinbii punʼà kwû siɲcyan kuru cannuge e.
7 Izirayɛli shiinbii pi mpyi bafage kàmpanŋke sanŋke,
ná Zhurudɛn baŋi kàmpanŋke sanŋke na ke,
pirʼà Izirayɛli kàshikwɔɔnbii ɲya pi i fî maa lógo na Soli ná u jyaabilʼà kwû ke,
ka pire si pi kànyi yaha maa fê.
Ka Filisi shiinbii si ŋkàrʼa sà ntɛ̀ɛn yire kànyi i.
8 Kuru canŋa nùmpanŋa,
ka Filisi shiinbii si ŋkàre zà kwùubii yaayi tugo.
Ka pi i sà Soli ná u jyaabii taanreŋi niŋkwuubii ta Giliboha ɲaŋke ɲuŋʼi.
9 Ka pi i Soli ɲùŋke kwɔ̀n,
maa u kàshikwɔnyaayi wwû u na,
maa pìi tun pi à sà pi sítaare jwumpe caala Filisi shiinbii kìni puni i,
pi kacyinmbayi ia ná sùpyire shwɔhɔlʼe.
10 Pi à kwɔ̀ ke,
maa sà Soli kàshikwɔnyaayi yaha kacyiinni Asitariti bage e,
maa Soli buwuŋi kwôro Bɛti-Sehan kànhe káaŋke na.
11 Yabɛsi kànhe ku ɲyɛ Galadi kùluni i ke,
tèni i kuru shiinbilʼà Filisi shiinbii kapyiini lógo Soli na ke,
12 ka pire kàshikwɔnmpiyi puni si yîri,
maa numpilage puni pyi ɲani na mà kàrʼa sà Soli ná u jyaabii buwuubii láha Bɛti-Sehan kànhe káaŋke na,
maa núrʼa kàre ná pi e Yabɛsi kànhe e,
maa sà pi súugo.
13 Pi à kwɔ̀ ke,
maa pi kaciiyi wà yiye na mà sà ntò tamarisi cige ɲwɔhʼi Yabɛsi kànhe e,
maa ŋkwɔ̀ maa canmpyaa baashuunni sún le.