Dawuda à Amalɛki shiinbii tùn
30
Dawuda ná u fyèɲwɔhɔ shiinbii ɲani canmpyitanrewuuni i,
pi à sà nɔ Zikilaki kànhe e ke,
mà sà Amalɛki shiinbii ta pi à sà ɲcwo Zhuda shiinbii kìni wwòro kùlu yyéreŋiŋi ná Zikilaki na,
maa kànhe jya maa ku súugo.
2 Pi à ku cyeebii ná ku shiinbii sanmpii puni kuu,
shinlye bâra nàŋkocyaawa na.
Pi ɲyɛ a sùpya bò mɛ,
maa pi puni cû a kàre.
3 Dawuda ná u fyèɲwɔhɔshiinbilʼà sà nɔ kànhe e mà sà ku ta kʼà sógo,
ku cyeebii ná ku nàɲjiibii ná pùcyaabii puni sʼà kulʼa kàre bilere na.
4 Ka Dawuda ná u fyèɲwɔhɔ shiinbii si mɛɛ sú fànha na fo mà sà pi myahigii fàan.
5 Dawuda cyeebii shuunniŋi mú mpyi a cû a kàre,
pire pi mpyi:
Ayinoyamu mà yîri Zizirɛli kànhe e ná Abigayili mà yîri Karimɛli kànhe e.
Uru mpyi a fyânha a pyi Nabali cwo.
6 Dawuda funŋke mpyi a sàa pɛn,
ɲaha kurugo yɛ,
sùpyire mpyi na ŋko na pire sí u wà si mbò.
Pi jyaabii ná pi pworobii ɲcùŋi mpyi a sàa pi lùugii yîrige.
Ŋka Dawuda à uye tíiŋɛ Kafooŋi u Kileŋi na,
maa fànha ta sahaŋki.
7 U à sáragawwuŋi Ayimelɛki jyaŋi Abiyatari pyi:
«Ɲwɔ na na,
ma a efodiŋi* lwɔ́ a kan na á.»
Ka Abiyatari si efodiŋi lwɔ́ a kan Dawuda á.
8 Ka Dawuda si Kafooŋi yíbe:
«Si sùpyire fyè tɔ̀rɔ la?
Mii sí ti kɔ̀rɔ nta la?»
Ka Kafooŋi si u pyi:
«Pi fyè tɔ̀rɔ,
mu sí pi kɔ̀rɔ nta,
si sùpyire niŋkuure shwɔ pi na.»
9 Ka Dawuda ná u fyèɲwɔhɔ shiinbii ŋkwuu baaniŋi (600) si yîrʼa kuni lwɔ́.
Ka pi i ŋkàrʼa sà nɔ Bezɔri lwɔhe ɲwɔge na,
ka kàntugoyyere shiinbii si yére wani.
10 Shiin ŋkwuu shuunni (200) mpyi a yyére Bezɔri lwɔhe ɲwɔge na,
pi ɲyɛ a jà a ku jyiile kanhare cye e mɛ.
Ka Dawuda ná shiin ŋkwuu sicyɛɛre (400) si wá na pi fyè leni.
11 Ka pi i sà Misira shinŋi wà círi sige e,
maa mpa ná u e Dawuda yyére.
Ka pi i u kan u à lyî maa bya.
12 Pi à fizhe waara yire niŋkin ná ɛrɛzɛn waara yirii shuunni kan u á.
Ka u u yire lyî maa fànha ta,
ɲaha kurugo yɛ,
u mpyi a canmpyaa taanre ná numpiliye taanre pyi lyìmbaa ná byambaa.
13 Ka Dawuda si u yíbe:
«Jofoo pyɛngɛ shin u ɲyɛ mu yɛ?
Taa mu à yîri ke?»
Ka u u jwo:
«Mii na ɲyɛ Misira shin,
maa mpyi Amalɛki shinŋi wà biliwe.
Cyi canmpyaa taanre u ɲyɛ ŋge,
mii ɲùŋufooŋʼà yîri mii taan mà li ɲùŋke pyi,
mii mpyi na ya.
14 Wuu mpyi a kàrʼa sà Kerɛti shiinbii wwòro kùlu yyéreŋi ná Zhuda shiinbii kùluni ná Kalɛbu kùluni wwòro kùlu yyéreŋi tùn maa Zikilaki súugo.»
15 Ka Dawuda si u pyi:
«Mu sí ɲɛɛ zà kuru kàshikwɔnkuruŋke saha cyêe mii na la?»
Ka u u jwo:
«Kâa na á Kile mɛge na,
na mu sì mii bò mɛ,
mu mú sì mii kan na ɲùŋufooŋʼá mɛ.
Lire ká mpyi,
mii sí ŋkàre ná mu i kuru kàshikwɔnkuruŋke cyage e.»
16 Lire pyiŋkanni na,
uru nàŋʼà pi yyaha cû mà kàre.
Ka pi i sà Amalɛki shiinbii ta pi à caalʼa tɛ̀ɛn tɛ̀ɛn sige puni yyaha kurugo,
maa lyî maa byii,
maa katangigii pyi yaɲyahayi niŋkuuyi kurugo,
mà yîri Filisi shiinbii kìni ná Zhuda wuuni i.
17 Ka Dawuda si pi kakyara mà lwɔ́ kuru canŋke ɲyɛ̀kwɔnge na,
mà sà nɔ kuru canŋa nùmpanŋa yàkoŋke na.
Pi wà ɲyɛ a shwɔ mɛ,
fo nàɲjyii ŋkwuu sicyɛreŋi (400) u à jà a dùgo ɲwɔ́hɔyi ɲuŋʼi mà fê ke.
18 Yaayi Amalɛki shiinbii mpyi a kuu ke,
ka Dawuda si yire puni shwɔ pi na,
maa u cyeebii shuunniŋi shwɔ pi na mú.
19 Pi sùpya ɲyɛ a kwôro wani mɛ,
nàŋkocyaawa bâra shinlye na,
nàɲjyiiwe bâra pùcwo na.
Yaayi Amalɛki shiinbii mpyi a kuu kàshige e ke,
Dawuda à yire puni kɔ̀rʼa shwɔ.
20 Dawuda à mpàabii ná sikyaabii ná nìiyi puni kuu.
Mpii pi mpyi tire yatɔɔre yyaha yyére na wà ke,
pire mpyi na ŋko:
«Yaayi Dawuda à kuu kàshige cyage e ke,
yire yi ɲyɛ ɲje.»
21 Ɲani kanhare mpyi a shiin ŋkwuu shuunniŋi (200) ŋgemu pyi u ɲyɛ a jà a kàre ná Dawuda e mɛ,
maa ŋkwôro Bezɔri lwɔhe ɲwɔge na ke,
ka Dawuda si núru na wà pire cyage e.
Ka pire si Dawuda ná u fyèɲwɔhɔ shiinbii ɲùŋu bɛ̂.
Ka Dawuda si file pi na maa pi shɛ́ɛre.
22 Shinpiibii ná shinkuuyi yi mpyi Dawuda fyèɲwɔhɔshiinbilʼe ke,
ka yire si jwo:
«Ná pi sí ɲyɛ a shà ná wuu e mɛ,
yaayi wuu à kuu kàshige cyage e ke,
wuu sì yafyin kan pi á yʼe mɛ fo pi cyeebii ná pi nàŋkopyire kanni.
Pi pire shwɔ pi raa wà.»
23 Ŋka,
Dawuda à jwo:
«Mii cìnmpyiibii,
Kafooŋi à yaayi ɲjemu kan wuu á ke,
yii àha yi karigii cû amuni mɛ.
Ɲaha kurugo yɛ,
u à yaha wuu na,
kàshikwɔnkuruŋke ku mpyi a pa wuu mɛɛ na ke,
u à ku le wuu cye e.
24 Jofoo u sí ɲɛɛ mpe e yɛ?
Mpii pi à shà kàshige cyage e ke,
ná mpii pi à tɛ̀ɛn yaayi taan ke,
pire puni nàzhanŋʼà yaa u pyi niŋkin.
Yi sí n-táa siɲcyan.»
25 Mà lwɔ́ kuru canŋke na fo mà pa nɔ niɲjaa na,
Dawuda à lire pyi to ná kalyee Izirayɛli shiinbilʼá.
26 Pi à núrʼa sà nɔ Zikilaki i ke,
ka Dawuda si yaayi niŋkuuyi yà tùugo u ceveebii,
Zhuda kùluni kacwɔnrɔbilʼá maa jwo:
«Yaayi yʼà shwɔ kàshige cyage e Kafooŋi zàmpɛɛnbii na ke,
mii à ɲje kan yii á yire e.»
27 U à yà tùugo Bɛtɛli kacwɔnrɔbilʼá ná wwòro kùlu yyéreŋi i Aramɔti wuubii ná Yatiri wuubii,
28 ná Arowɛri wuubii ná Sifimɔti wuubii ná Ɛsitemowa wuubii,
29 ná Arakali wuubii ná Yeramɛli kànyi wuubii ná Keni kànyi wuubii,
30 ná Ɔrima wuubii ná Bori-Asan wuubii ná Ataki wuubii,
31 ná Eburɔn wuubilʼá mà bâra cyeyi puni i Dawuda ná u fyèɲwɔhɔshiinbilʼà tòro ke,
yire puni wuubilʼá.