Filisi shiinbii ɲyɛ a ɲɛɛ Dawuda si pire tɛ̀gɛ kàshige na mɛ
29
Filisi shiinbilʼà pi kàshikwɔnkuruɲyi puni bínni Afɛki kànhe e,
lirʼà Izirayɛli shiinbii kàshikwɔɔnbii ta pi à sà pi tatɛɛnge yaa Zizirɛli lùbiliŋi taan.
2 Ka Filisi shiinbii yyaha yyére shiinbii si ntòro pi kàshikwɔɔnbii ŋkuu ŋkuubii (100) ná kampwɔhii kampwɔhii (1.000) yyaha na na wà.
Ka Dawuda ná u fyèɲwɔhɔ shiinbii ná saanŋi Akisi si ntaha pi fye e.
3 Ka Filisi shiinbii yyaha yyére shiinbii si jwo:
«Ɲaha shi mpii Eburu shiinbii ɲyɛ na mpyi naha yɛ?»
Ka Akisi si pi ɲwɔ shwɔ:
«Izirayɛli shiinbii saanŋi Soli báarapyiŋi Dawuda wi.
U na ɲyɛ naha mii yyére ke,
lʼà mɔ,
ŋka mà lwɔ́ u canmpaŋke na,
mà pa nɔ niɲjaa na,
mii sàha sàa ɲcɛ̀ɛgɛ cyaga ta u na mɛ.»
4 Ka Filisi shiinbii yyaha yyére shiinbii lùgigii si yîri Akisi taan maa u pyi:
«Ŋge nàŋi pyi u núru u a sì.
Cyage mu à kan u á ke,
u pyi u núru u a si kure e.
U àha ŋkàre ná wuu e kàshige cyage e si ŋkwɔ̀ zà ŋkɛ̂ɛnŋɛ mpyi wuu zàmpɛn,
mà wuu yaha kàshige na mɛ.
Di u sí n-jà zà ŋkêe ta u kàfooŋʼá,
ná u ɲyɛ a kàre u yyére ná wuu shiinbii pìi ɲùmbogilʼe mà yɛ?
5 Cyeebii mpyi na myahigii cêe maa ŋkwɔ̂hɔli ná ŋgemu mɛge e maa ŋko:
“Soli à shiin kampwɔhii (1.000) niɲyahamii bò,
ka Dawuda si shiin kampwɔhii kɛ kɛ (10.000) niɲyahamii bò” ke,
taha uru Dawudaŋi bà u ɲyɛ ŋge mɛ?»
6 Ka Akisi si Dawuda yyére maa u pyi:
«Kafooŋi ɲyii wuŋi mɛge na,
mu à tíi.
Lʼà táan mii á mu u bâra mii na wuu a sì wuu a kàshige kwùun wuu a núruli,
ɲaha kurugo yɛ,
mii ɲyɛ a ɲcɛ̀ɛgɛ cyaga ta mu na mɛ,
mà lwɔ́ mu canmpaŋke na mii yyére fo mà pa nɔ niɲjaa na.
Ŋka mu kyaa ɲyɛ a táan yyaha yyére shiinbilʼá mɛ.
7 Lire e ke,
núru ma a sì yyeɲiŋke e,
ma hà ŋkwɔ̀ kyaa pyi,
ndemu li sí n-pɛn Filisi shiinbii yyaha yyére shiinbilʼe mɛ.»
8 Ka Dawuda si Akisi pyi:
«Ɲaha shi mii à pyi yɛ?
Mà lwɔ́ mu báarapyiŋʼà pa mu yyére mà pa nɔ niɲjaa na ke,
ɲcɛ̀ɛgɛ cyage ŋkire mu à ta mii na,
ŋkemu ku sí mii sige mii àha n-jà ŋkàre kàshigʼá si sà kàfooŋi mii saanŋi zàmpɛɛnbii tùn mà yɛ?»
9 Ka Akisi si Dawuda pyi:
«Mii à yire cè.
Mu kyalʼà táan mii á Kile mɛ̀lɛkɛ fiige,
ŋka Filisi shiinbii yyaha yyére shiinbilʼà jwo na mu sì n-jà ŋkàre ná wuu e kàshigʼá mɛ.
10 Lire e ke,
sôlʼa yîri,
mu ɲùŋufooŋi báarapyiibii pi à pa ná mu i ke,
mu ná pire,
yii sôlʼa yîri,
bɛ̀ɛnmpe ká jà a pa,
yii raa sì.»
11 Ɲyɛ ka Dawuda ná u fyèɲwɔhɔ shiinbii si yîri ɲyɛ̀sɔɔge na,
maa núrʼa kàre Filisi shiinbii kìni i.
Ka Filisi shiinbii si ŋkàre Zizirɛli i.