Soli à shà ɲcèfooŋi wà yyére
28
Lire tèni i,
Filisi shiinbii mpyi a pi kàshikwɔɔnbii wà piye na mà pyi kuruŋɔ niŋkin,
si Izirayɛli shiinbii tùn.
Ka Akisi si Dawuda pyi:
«Mu à yi cè na mu ná ma shiinbii sí n-bâra mii kàshikwɔnkuruŋke na.»
2 Ka Dawuda si Akisi ɲwɔ shwɔ:
«Nde mu báarapyiŋi sí n-pyi ke,
mu sí lire ɲya.»
Ka Akisi si jwo:
«Mii sí mu pyi na saɲcwɔnsigiŋi tèrigii puni i.»
3 Lire mpyi a Samuwɛli ta u à kwû,
ka Izirayɛli shiinbii si u tò u yabiliŋi kànhe Arama e,
maa u kwùŋi yamɛɛni sú.
Mpii pi mpyi maha kwùubii yiri na yíbili,
ná mpii pi mpyi maha cɛɛre pyi ke,
Soli mpyi a cyire karigii kwɔ̀ kìni i.
4 Ka Filisi shiinbii kàshikwɔɔnbii si piye bínni maa ŋkàrʼa sà pi tatɛɛnge yaa Sunɛmu kànhe e.
Ka Soli si Izirayɛli shiinbii puni kàshikwɔɔnbii wà piye na maa ŋkàrʼa sà pi tatɛɛnge yaa Giliboha ɲaŋke ɲuŋʼi.
5 Soli à Filisi shiinbii kàshikwɔɔnbii ɲya ke,
maa fyá fo u zòŋi na ŋkùre sèlʼe.
6 Ka u u Kafooŋi yíbe,
ŋka Kafooŋi ɲyɛ a u ɲwɔ shwɔ ŋɔɔgɔ,
lire ɲyɛ mɛ Urimuŋia cye kurugo,
lire ɲyɛ mɛ Kile tùnntunmpii cye kurugo mɛ.
7 Ka Soli si u báarapyiibii pyi:
«Yii ceeŋi wà saha cyêe na na,
ŋgemu u maha kwùubii yîri na yíbili ke.
Mii sí zhà u yíbe.»
Ka u báarapyiibii si u pyi:
«Ceeŋi wà na ɲyɛ Eni-Dɔri kànhe e uru maha lire pyi.»
8 Ka Soli si vàanɲyi tɛ̀gʼa uye yige u lyempe e,
maa ŋkàre ná nàmbaa shuunni i.
Ka pi i sà nɔ numpilage e ceeŋi yyére,
ka Soli si u pyi:
«Karigii nimpaaŋkii wílʼa jwo na á.
Mii sí buŋi ŋgemu cyêe mu na ke,
uru múnaani yyere ma tɛ̀gʼa li pyi.»
9 Ka ceeŋi si jwo:
«Nde Soli à pyi ke,
mu à li cè.
Mpii pi maha kwùubii yîri na yíbili ná mpii pi maha cɛɛre pyi ke,
u à cyire karigii kwɔ̀ kìni i.
Ɲaha kurugo mu à pa mii pɛrɛ ɲcû si mbò yɛ?»
10 Ka Soli si ŋkâa Kafooŋi mɛge na na:
«Kafooŋi ɲyii wuŋi mɛge na,
yafyin sì mu ta nde kani i mɛ.»
11 Ka ceeŋi si jwo:
«Mu la na ɲyɛ mii i jofoo yyere yɛ?»
Ka Soli si u pyi:
«Samuwɛli yyere na á.»
12 Ceeŋʼà Samuwɛli ɲya ke,
maa ŋkwûlo sèlʼe maa Soli pyi:
«Ɲaha kurugo mu à mii ɲwɔ fáan mà ta mu u ɲyɛ Soli yɛ?»
13 Ka saanŋi si u pyi:
«Ma hà vyá mɛ,
ɲaha shi mu à ɲya yɛ?»
Ka ceeŋi si jwo:
«Mii naha a kakyanhala yaaga ɲya ku u fwore ɲìŋke e.»
14 Ka Soli si jwo:
«Di ku yyahe wa yɛ?»
Ka ceeŋi si jwo:
«Nàŋkolye u naha na fwore,
vàanntinmbwɔhɔ sí ɲyɛ u na.»
Ka Soli si yi cè na Samuwɛli wi,
maa niŋkure sín,
maa yyahe cyígile ɲìŋke na.
15 Ka Samuwɛli si Soli pyi:
«Ɲaha kurugo mu à mii kànha,
maa mii yyerʼa yige naha yɛ?»
Ka Soli si jwo:
«Yyefugo nimbwɔhɔ ku naha mii na.
Filisi shiinbilʼà kàshige bégele mii mɛɛ na.
Kile sʼà cyé mii na,
u sàha ɲyɛ na mii ɲwɔ shwuu Kile tùnntunmpii,
lire ɲyɛ mɛ,
ŋɔɔyi cye kurugo mɛ.
Lire kurugo mii à mu yyere,
nde mii à yaa mii i mpyi ke,
ma a lire cyêe na na.»
16 Ka Samuwɛli si jwo:
«Ká mpyi Kafooŋi à mu cyé maa mpyi mu zàmpɛn,
ɲaha kurugo mu à mii yyere na yíbili yɛ?
17 Kafooŋi mpyi a mii pyi mii à mpemu jwo mu á ke,
u à mu cû mà tàanna ná purʼe.
Kafooŋi à saanre shwɔ mu na mà kan wabɛrʼá,
uru u ɲyɛ Dawuda.
18 Mu ɲyɛ a sàa Kafooŋi ɲwɔmɛɛni cû mɛ.
Mu ɲyɛ a u nàvunŋɔ kwɔ̀ Amalɛki shiinbii na,
maa pi bò mɛ,
lire kurugo Kafooŋi à nde pyi mu na niɲjaa.
19 Lire kanni bà mɛ,
Kafooŋi sí mu ná Izirayɛli shiinbii le Filisi shiinbii cye e.
Nùmpanŋa,
mu ná ma jyaabii sí n-pyi ná mii i na cyage e.
Kafooŋi sí Izirayɛli shiinbii kàshikwɔɔnbii le Filisi shiinbii cye e.»
20 Ka Soli si ntílʼa cwo a sànhana ɲìŋke na,
ɲaha kurugo yɛ,
Samuwɛli jwumpe mpyi a u pyi u à sàa fyá.
Mà bâra lire na,
u fànhe mpyi a sàa kwɔ̀,
ɲaha kurugo yɛ,
u mpyi a canmpuni ná numpilipuni pyi lyîmbaa.
21 Ka ceeŋi si file Soli na,
u à u ɲya u à sàa fyá ke,
maa u pyi:
«Wíi,
nde mu à jwo ma báarapyicwoŋi u pyi ke,
u à lire pyi.
Mii à na múnaani yaha mpuŋɔ na maa mu tùnnture pyi.
22 Numɛ,
náaŋi ma a lógo ma báarapyicwoŋi ɲwɔ na,
ma a na yaha si bwúuruɲuŋɔ niŋkin kan ma á ma lyî,
ma a fànha ta,
ma a kuni lwɔ́ ma a sì.»
23 Ka Soli si ɲcyé maa jwo:
«Mii sì n-lyî mɛ.»
Ka u báarapyiibii ná ceeŋi si u kárima fo u à lyî.
Ka u u yîri ɲìŋke na mà tɛ̀ɛn yasinniŋke na.
24 Nunaɲcaŋa sìnmɛ wogo na mpyi ceeŋʼá,
ka u u fyâlʼa kuru bò,
maa mbyimɛ lwɔ́ a cwɔ̀nhɔ mà tɛ̀gʼa bwúuru niɲjyirigembaawa yaa,
25 mà pa ntîrige Soli ná u báarapyiibii taan.
Ka pi i lyî,
lire kàntugo,
maa kuni lwɔ́ a kàre kuru numpilage yabiliŋi i.