Dawuda à kàre Filisi shiinbii kìni i
27
Dawuda à jwo uye funŋʼi:
«Soli sí mii bò canŋka.
Nde lʼà pwɔ́rɔ mii á ke,
lire li ɲyɛ,
mà kàrʼa sà ŋwɔhɔ Filisi shiinbii kìni i,
bà Soli si mpyi si láha mii ɲcyaŋi na Izirayɛli kìni puni i mɛ.
Lire ká mpyi,
mii sí n-shwɔ u na.»
2 Ɲyɛ ka Dawuda si yîri ná u fyèɲwɔhɔshiinbii ŋkwuu baaniŋi i (600) mà kàre Gati saanŋi Mayɔki jyaŋi Akisi yyére.
3 Dawuda ná u shiinbilʼà sà ntɛ̀ɛn Akisi yyére Gati kànhe e.
Pi shin maha shin ná u pyɛngɛshiin pi mpyi,
Dawuda ná u cyeebii shuunniŋi pi mpyi.
Pire pi ɲyɛ:
Ayinoyamu mà yîri Zizirɛli kànhe e,
ná Abigayili mà yîri Karimɛli kànhe e.
Uru na mpyi leŋkwucwo,
u pooŋi mɛgɛ mpyi Nabali.
4 Soli à pa lógo na Dawuda à fê a kàre Gati kànhe e ke,
maa láha u ɲcyaŋi na.
5 Canŋka,
ka Dawuda si Akisi pyi:
«Ká mpyi mii kyalʼà táan mu á,
cyage kà kan na á ɲwɔkurugo kànhe kà na si mpyi na tatɛɛngɛ.
Ɲaha kurugo yɛ,
mu báarapyiŋi ɲyɛ a yaa u tɛ̀ɛn ná mu i saanre kànhe e mɛ.»
6 Kuru canŋke yabiliŋi i,
ka Akisi si Zikilaki kànhe kan Dawuda á.
Lire kurugo Zikilaki kànhʼà pyi Zhuda saanŋi wogo fo mà pa nɔ niɲjaa na.
7 Yyee niŋkin ná yiɲyɛ sicyɛɛre Dawuda à pyi Filisi shiinbii kìni i.
8 Dawuda ná u fyèɲwɔhɔ shiinbii mpyi maha si na kàshige kwùun Geshuri shiinbii ná Gezɛri shiinbii ná Amalɛki shiinbii na.
Tire supyire mpyi a tɛ̀ɛn fo tèemɔni i lire kìni i.
Dawuda à pi tùn,
mà lwɔ́ Suri kùluni na mà sà nɔ fo Misira kìni na.
9 Dawuda mpyi maha kuru kàmpanŋke shiinbii puni kɛ̀ɛge.
Nɔ̀ bâra ceewe na,
u ɲyɛ a mpyi na uru wà tufiige yare bòmbaa mɛ.
U mpyi maha mpàabii ná nìiyi ná dùfaanɲyi ná ɲwɔ́hɔyi ná vàanɲyi kuu maha núrʼa kàre saanŋi Akisi yyére.
10 Akisi ná mpyi a u yíbe:
«Cyage ŋkire yii à sà ntùn niɲjaa yɛ?»
Dawuda mpyi maha jwo:
«Zhuda kùluni wwòro kùlu yyéreŋi»,
lire ɲyɛ mɛ:
«Yeramɛli wwòro kùlu yyéreŋi»,
lire ɲyɛ mɛ:
«Keni wwòro kùlu yyéreŋi.»
11 Dawuda ɲyɛ a nɔ̀,
lire ɲyɛ mɛ ceewe ɲyii wu yaha sʼa wà ná u e Gati kìni i mɛ.
Ɲaha kurugo yɛ,
u mpyi na sɔ̂nŋi pi sí n-pa raa uru kapyiiŋkii yu na:
«Dawuda à yi le mɛyyere,
maa yi yige mɛyyere.»
Lire Dawuda à pyi u tɛ̀ɛnni tèni puni funŋke e,
Filisi shiinbii kìni i.
12 Akisi mpyi a sàa dá Dawuda na.
U mpyi maha jwo uye funŋʼi:
«Dawuda à uye kyaa pɛn u shiinbii,
Izirayɛli shiinbilʼá.
Numɛ,
u sí n-pyi mii báarapyi tèrigii puni i.»