Dawuda saha à Soli yaha bòmbaa
26
Zifu kànhe shiinbii pìlʼà shà Soli yyére Gibeya kànhe e maa sà u pyi:
«Dawuda wa a sà a ŋwɔhɔni Akila mpògigii shwɔhɔlʼe síwage kàmpanŋke na.»
2 Ka Soli si yîrʼa kàre Zifu síwage e ná Izirayɛli kàshikwɔnmpiyi shiin kampwɔhii taanre e (3.000) mà sà a Dawuda caa.
3 Ka pi i ŋkàrʼa sà pi tatɛɛnge yaa Akila mpògigii shwɔhɔlʼe kuni ɲwɔge na,
síwage kàmpanŋke na.
Lirʼà ta Dawuda mpyi síwage e.
U à pa ɲcè na Soli à shà uru mɛɛ na ke,
4 maa pìi tun pi sà u ŋwɔhʼa wíi,
ka li i mpa nta na sèeŋi na,
Soli à nɔ wani.
5 Ka Dawuda si yîrʼa kàre Soli ná u shiinbii tatɛɛnge e,
mà sà Soli tasinnage ná u kàshikwɔɔnbii yyaha yyére shinŋi Nɛri jyaŋi Abinɛri tasinnage wíi.
Soli mpyi maha sínni pi tatɛɛnge niŋke e,
kàshikwɔɔnbilʼasi sínnʼa u kwûulo.
6 Ka Dawuda si jwumpe lwɔ́ maa Ɛti tùluge shinŋi Ayimelɛki ná Seruya jyaŋi Yohabu sìɲɛɛŋi Abisayi pyi:
«Jofoo la ku ɲyɛ si shà ná mii i Soli ná u kàshikwɔɔnbii tatɛɛnge e yɛ?»
Ka Abisayi si jwo:
«Mii sí n-shà ná mu i.»
7 Ka Dawuda ná Abisayi si ŋkàre numpilage e Soli shiinbii cyage e,
mà sà Soli ta u à sínni na ŋwúuni kàshikwɔɔnbii shwɔhɔlʼe.
U tàanŋi mpyi a cûru ɲìŋke e u ɲùŋke ŋkère na.
Abinɛri ná kàshikwɔɔnbii mpyi a sínnʼa ŋɔ́ɔ mà u kwûulo.
8 Ka Abisayi si Dawuda pyi:
«Kile à mu zàmpɛnŋi le mu cye e niɲjaa.
Náaŋi ma a na yaha si u sú ná na tàanŋi i si ŋkwôro ɲìŋke na tɔɔgɔ niŋkin.
Ku sì nɔ tozhwɔnwogo na mɛ.»
9 Ka Dawuda si Abisayi pyi:
«Ma hà u bò mɛ.
Jofoo u sí n-jà cye nɔ Kafooŋi shincwɔnrɔŋi na,
ná lire ŋkooŋi ɲyɛ a wwû urufoo na mà yɛ?»
10 Ka Dawuda si núrʼa jwo:
«Kafooŋi ɲyii wuŋi mɛge na,
mii à tɛ̀ɛn ná lʼe uru sí u bò.
U canŋkwuge ká nɔ,
u sí n-kwû uyʼá,
lire ɲyɛ mɛ,
u sí n-kwû kàshige kà cyagʼe.
11 Kafooŋi u na shwɔ si na cyɛge nɔ Kafooŋi shincwɔnrɔŋi na.
Tàanŋi u à cûru u ɲùŋke ŋkère na ke,
uru ná lwɔhe kucwooni kanni lwɔ́ ma a ma wuu a sì.»
12 Ɲyɛ ka Dawuda si tàanŋi ná kucwooni lwɔ́ Soli ɲùŋke taan mà kàre.
Sùpya ɲyɛ a pi ɲya mɛ,
sùpya ɲyɛ a li tère cè mɛ,
sùpya mú ɲyɛ a ɲɛ̀ mɛ,
ɲaha kurugo yɛ,
Kafooŋi mpyi a pi puni pyi pi à ŋɔ́nʼa cûnnu.
13 Ka Dawuda si ɲaŋke kacyage jyiilʼa sà dùgo ɲaŋke kà na,
maa sà yyére tatɔɔngʼe,
14 maa yyaha kan kàshikwɔɔnbii ná Nɛri jyaŋi Abinɛri kàmpanŋke na,
maa sêe:
«Abinɛri,
mu sì mii ɲwɔ shwɔ mà?»
Ka Abinɛri si jwo:
«Jofoo u ɲyɛ mu,
ka mu u wa na sêre saanŋi kàmpanŋke na yɛ?»
15 Ka Dawuda si Abinɛri pyi:
«Taha nɔ̀ bà u ɲyɛ mu ŋgemu u ɲyɛ,
u ɲca sì n-ta Izirayɛli shiinbilʼe mɛ?
Ɲaha kurugo mu ɲyɛ a yaha saanŋi,
ma kàfooŋi na mà yɛ?
Sùpyaŋi wà mpyi a shà si sà saanŋi,
mu ɲùŋufooŋi bò.
16 Nde mu à pyi ke,
li ɲyɛ a ɲwɔ mɛ.
Kafooŋi ɲyii wuŋi mɛge na,
yii à yaa yii bò,
ɲaha kurugo yɛ,
yii ɲyɛ a yaha Kile shincwɔnrɔŋi,
yii kàfooŋi na mɛ.
Wíi numɛ,
saanŋi tàanŋi ná u kucwooni yi mpyi u ɲùntahage taan ke,
taa yi ɲyɛ ke?»
17 Ka Soli si Dawuda mɛjwuuni lógʼa cè maa jwo:
«Mii jyaŋi Dawuda la?»
Ka Dawuda si jwo:
«Mii wi saanŋi mii kàfooŋi»,
18 maa núrʼa jwo:
«Ɲaha kurugo mii kàfooŋi ɲyɛ na u báarapyiŋi fyè tɔ̀rɔ yɛ?
Ɲaha shi mii à pyi yɛ?
Kapiini ndire mii à pyi yɛ?
19 Saanŋi mii kàfooŋi u u báarapyiŋi jwumpe lógo numɛ.
Ká mpyi Kafooŋi u à mu sɔ̀n a yaha mii na,
u ɲɛɛ na sárage na,
ŋka kampyi sùpyire ti,
ti láŋa Kafooŋi yyahe taan.
Ɲaha kurugo yɛ,
ti na mii kɔ̀re na láre Kafooŋi kìni na,
na mii i sà a kilebii piibɛrii pêre.
20 Ei,
mii àha zìi n-kwû si na laage ta kʼà tɔɔn Kafooŋi na mɛ.
Izirayɛli shiinbii saanŋi na mii caa ŋkàrimɔ cyaŋkanna na,
mu à jwo bà wà maha santu caa ɲaɲya ɲuŋʼi mɛ.»
21 Ka Soli si jwo:
«Mii à wurugo.
Mii jyaŋi Dawuda,
núru ma a ma,
mii saha sì kapii pyi mu na mɛ.
Ɲaha kurugo yɛ,
mu à mii múnaani kyaa waha maye na niɲjaa.
Mii à sìɲcomɔ pyi,
mii à sàa wurugo.»
22 Ka Dawuda si jwo:
«Saanŋi tàanŋi u ŋge,
mu shinŋi wà u pa u shwɔ.
23 Kafooŋi sí shin maha shin sâra si ntàanna ná urufoo ntìiŋi ná ɲwɔmɛfente e.
Kafooŋi mpyi a mu le mii cye e niɲjaa,
ŋka mii ɲyɛ a ɲɛnʼa cye nɔ Kafooŋi shincwɔnrɔŋi na mɛ.
24 Bà mii à mu múnaani kyaa waha naye na niɲjaa mɛ,
amuni Kafooŋi mú sí mii múnaani kyaa waha uye na.
U sí mii yige na funmpɛn karigii puni i.»
25 Ka Soli si Dawuda pyi:
«Mii jyaŋi Dawuda,
Kile u jwó le ma á.
Mu cyeleŋkarigii sí raa ɲwɔge.»
Ka Dawuda si kuni lwɔ́ a kàre,
ka Soli si núrʼa kàre u pyɛngɛ.