Samuwɛli ŋkwùŋi kani
25
Samuwɛli à pa ŋkwû,
ka Izirayɛli shiinbii puni si piye bínni maa u kwùŋi yamɛɛni sú,
maa u tò u kànhe Arama e.
Ka Dawuda si yîrʼa kàre Paran kùluni síwage e.
Dawuda ná Nabali kani
2 Nàŋi wà na mpyi Mayɔn kànhe e.
Yaarafoo u mpyi a sìi u wi.
U cyeyaayi yà na mpyi Karimɛli kànhe e.
Mpàa kampwɔhii taanre (3.000) ná sikyaa kampwoo (1.000) mpyi u á.
U mpyi a kàre Karimɛli i si sà u mpàabii shire kwɔ̀n.
3 Uru nàŋi mɛgɛ na mpyi Nabali,
u cwoŋi mɛgɛ sí ɲyɛ Abigayili.
Uru ceeŋi mpyi yákilifoo,
u lemɛ si mpyi a ɲwɔ.
Ŋka,
u pooŋi kataanmpe mpyi a waha maa mpyi shinpi.
Kalɛbu baga shin u mpyi u wi.
4 Dawuda à tɛ̀ɛn síwage e maa lógo na Nabali wa na u mpàabii shire kwùun.
5 Ka u u u fyèɲwɔhɔ shiinbii nàɲjyii kɛ tun u á maa pi pyi:
«Yii shà Nabali yyére Karimɛli kànhe e,
yii i sà na fwùŋi kan u á,
6 yii i yi jwo u á:
“Kile u shì kan ma á,
u u yyeɲiŋke kan mu ná mapyɛngɛshiinbilʼá,
u u yaha ma cyeyaayi puni na.
7 Mii à lógo na pi wa na u mpàabii shire kwùun numɛ.
Mà u mpànahabii yaha naha wuu yyére,
wuu ɲyɛ a sàa kapii pyi pi na mɛ,
pi yafyin mú ɲyɛ a pînni mà pi yaha Karimɛli tɛɛnni i mɛ.
8 Ma báarapyiibii yíbe,
pi sí yi jwo mu á,
na sèe wi.
Mpii nàɲjiibii cùmulemɛ ɲwɔ,
ɲaha kurugo yɛ,
canmbwɔhe kataannʼá pi à shà.
Yaage ku ɲyɛ mu cye e ke,
náaŋi ma a kuru kà kan ma báarapyiibii ná ma jyaŋi Dawuda á.”»
9 Dawuda tùnntunmpilʼà sà nɔ ke,
maa Dawuda jwumpe puni taha Nabali á,
maa fyâha.
10 Ka Nabali si Dawuda báarapyiibii ɲwɔ shwɔ:
«Dawuda ɲyɛ ɲaha yɛ?
Zhese jyaŋi ɲyɛ ɲaha yɛ?
Báarapyii niɲyahamii na fî na fwore pi ɲùŋufeebii ɲuŋʼi niɲjaa.
11 Bwúuruŋi ná lwɔhe ná kyaare mii à bégele na mpàabii shire kwɔ̀nfeebilʼà ke,
mii i ŋkwɔ̀ a yire lwɔ́ si ŋkan sùpyirʼá mii ɲyɛ a mpiimu tayirige cè mà la?»
12 Ka Dawuda tùnntunmpii si kuni lwɔ́ mà núrʼa kàre.
Pi à sà nɔ ke,
maa puru jwumpe puni yyaha jwo Dawuda á.
13 Ɲyɛ ka Dawuda si u shiinbii pyi:
«Yii shin maha shin u u kàshikwɔnŋwɔɔni tɛ̀gʼa uye cyîbi.»
Ka pi puni si piye cyîbi ná pi kàshikwɔnŋwɔɔgilʼe.
Ka Dawuda mú si uye cyîbi ná u kàshikwɔnŋwɔɔni i.
Ka shiin ŋkwuu sicyɛɛre (400) fiige si ntaha u fye e,
ka shiin ŋkwuu shuunni (200) fiige si ntɛ̀ɛn yaayi taan.
Abigayili à Dawuda lùuni bò
14 Nabali báarapyiŋi wà à sà Nabali cwoŋi Abigayili pyi:
«Wíi,
Dawuda à tùnntunmii tun mà yîri síwage e pi pa wuu ɲùŋufooŋi shɛ́ɛre,
ka u u pi yalʼa faha.
15 Maa li ta,
tire sùpyirʼà sàa ɲwɔ wuu na,
ti ɲyɛ a sàa kapii pyi wuu na mɛ,
wuu yafyin mú ɲyɛ a pînni mà wuu yaha ná pi e sige e mɛ.
16 Mà wuu yaha yatonahani na ná pi e,
lire tèni puni i,
pi à pyi pìlaga bâra canŋa na wuu á mu à jwo kàshisulu káaŋa.
17 Ɲyɛ sɔ̂nŋɔ numɛ,
nde lʼà ɲwɔ ke,
ma a lire pyi.
Ɲaha kurugo yɛ,
kapiinʼà bégelʼa kwɔ̀ wuu ɲùŋufooŋi ná u pyɛngɛ shiinbii puni mɛɛ na,
u sʼà pi fo mà li pyi,
wà sì n-jà ɲjwo ná u e mɛ.»
18 Ka Abigayili si ntílʼa yîri maa bwúuruɲuɲwɔ ŋkwuu shuunni (200) ná ɛrɛzɛn sinmpe sɛɛgɛ bɔrii shuunni ná mpàa kaŋkuro kyara nizhwɔhɔrɔ ná sùmafwɔge yaɲyɛyɛ kaŋkuro ná ɛrɛzɛnŋi niŋwaŋi pwɔ̀hii ŋkuu (100) ná fizhyeŋi yasɛɛre niŋgaŋi pwɔ̀hii ŋkwuu shuunni (200) lwɔ́ a taha dùfaanɲyi ɲuŋʼi,
19 maa u báarapyiibii pyi:
«Yii a wà na yyaha na,
mii ɲyɛ yii fye e.»
Ŋka,
u ɲyɛ a yafyin jwo u pooŋi Nabali á mɛ.
20 Ka u u dùgo dùfaanŋa na,
maa ntîge ɲaŋke ɲuŋʼi.
Lirʼà Dawuda ná u shiinbii ta pi i ntîri u kàmpanŋke na ɲaŋke ɲuŋʼi mú.
Ka ceeŋi si sà pi círi.
21 Dawuda mpyi a jwo uye funŋʼi:
«Tawagʼe mii à yaha ŋge nàŋi síwage yaayi puni na,
ka yafyin si mpyi ku ɲyɛ a pînni yʼe mɛ.
U à mii kacɛnni fwooni tò ná kapilʼe.
22 Mii aha sàa Nabali pyɛngɛ shinŋi wà niŋkin yaha bòmbaa naha ná nùmpanŋa ɲyɛ̀gɛ shwɔhɔlʼe,
Kile u kapegigii puni nimpiini pyi na na.»
23 Abigayili à Dawuda ɲya ke,
maa fyâlʼa tîge u dùfaanŋke ɲuŋʼi,
maa niŋkure sín maa yyahe cyígile ɲìŋke na Dawuda fere e.
24 U à uye yaha a cwo u tooyʼe maa jwo:
«Mii kàfooŋi,
mii fyè wi.
Náaŋi ma a lógo ma bilicwoŋi ɲwɔ na,
ma a ma bilicwoŋi yaha u yi yyaha jwo ma á.
25 Mii kàfooŋi,
ma hà n-yaa Nabali shinpiŋi ŋge na mɛ.
U mɛgʼà u cû.
U mɛge ɲwɔhe ku ɲyɛ sìɲcoŋke.
Mii kàfooŋi mpyi a mpiimu tun ke,
mii,
mu báarapyicwoŋi ɲyɛ a pi ɲya mɛ.
26 Ɲyɛ numɛ,
Kafooŋi ɲyii wuŋi mɛge kurugo,
ná mu ɲyii wuŋi mɛge kurugo mii ɲùŋufooŋi,
Kafooŋi u à mu sige,
ma hà sìshan wu si ma nàvunŋɔ kwɔ̀ ná ma cyɛge e mɛ.
Mu zàmpɛɛnbii ná mpii pi ɲyɛ na ɲcaa si kapii pyi mu na ke,
pire pi pyi Nabali pyiŋkanni na.
27 Mu báarapyicwoŋʼà pa ná ma yaayi ɲjemu i si mpa ŋkan mii ɲùŋufooŋʼá ke,
ɲɛɛ yi na,
ma a yi táa mii ɲùŋufooŋi fyèɲwɔhɔ shiinbii na.
28 Náaŋi ma a ma báarapyicwoŋi ŋguruŋi yàfa u na,
ɲaha kurugo yɛ,
Kafooŋi sí mii ɲùŋufooŋi pyɛnge tígile tèrigii puni i,
mà lire ɲùŋke pyi,
Kafooŋi á mii ɲùŋufooŋi ɲyɛ na kàshiyi kwùun.
Mu shìŋi canmpyaagii puni i,
ɲcɛ̀ɛgɛ cyaga sì nta mu na mɛ.
29 Mii ɲùŋufooŋi,
sùpya ká yîri mu kurugo sʼa bùu,
Kafooŋi,
mu Kileŋi sí n-yaha mu múnaani na,
bà wà maha yaha loŋgara yaaga na mɛ,
si mu zàmpɛɛnbii múnahigii wà,
bà wà maha kafaaga wà ná nàmuruŋʼi mɛ.
30 Kacɛɛnŋkii ɲwɔmyahigii Kafooŋi à lwɔ́ mii ɲùŋufooŋʼá ke,
u aha cyire puni fûnŋɔ,
maa mu tìŋʼa pyi Izirayɛli shiinbii ɲùŋufooŋi tèni ndemu i ke,
31 mii ɲùŋufooŋi saha sì mii ná mpyi a cè jwo mɛ,
u zòmbilini mú sì liye cɛ̂ɛgɛ sìshanwuni ɲùŋɔ bàa wuuni i si uye nàvunŋɔ kwɔ̀ mɛ.
Kafooŋi ká mpa ɲwɔ mii ɲùŋufooŋi na,
ma a funŋɔ cwo ma bilicwoŋi na.»
32 Ka Dawuda si Abigayili pyi:
«Mii fwù ɲyɛ Kafooŋi,
Izirayɛli u Kileŋi na,
uru ŋgemu u à mu tun mu u mpa mii círi niɲjaa ke.
33 Mii fwù ɲyɛ mu na mú,
mu yákilifente kurugo.
Mii fwù ɲyɛ mu na,
mu u à pyi kaɲuŋɔ,
mii sì sìshan wu niɲjaa si na nàvunŋɔ kwɔ̀ ná na cyɛge e mɛ.
34 Sèeŋi na,
Kafooŋi,
Izirayɛli u Kileŋi u à mii sige mii ɲyɛ a kapii pyi mu na mɛ.
Uru ɲyii wuŋi mɛge na,
mii sí n-kâa,
kampyi mu ɲyɛ a mpyi a wyɛ̀rʼa pa mii círi mɛ,
nɔ̀ niŋkin mpyi na sí n-kwôro bòmbaa Nabali pyɛnge e,
naha ná ɲyɛ̀ge shwɔhɔlʼe mɛ.»
35 Yaayi i Abigayili mpyi shà zà ŋkan Dawuda á ke,
ka u u yi shwɔ maa jwo:
«Ta sì pyɛngɛ yyeɲiŋke e.
Wíi,
mii à mu jwumpe lógo,
mii mú a ɲɛɛ.»
Nabali kwùŋi
36 Abigayili à núrʼa kàre pyɛngɛ Nabali yyére,
mà sà uru ta u à kataan nimbwoo bégele u pyɛnge e,
mu à jwo saanwa kataan.
Nabali funŋke mpyi a sàa táan,
u mú mpyi a bya a mɛ́ɛ.
Abigayili mú ɲyɛ a ɲɛnʼa yafyin jwo u á mɛ,
fo mà sà ɲyɛ̀ge múgo.
37 Ɲyɛ̀gʼa pa múgo ka sinmpe si láha Nabali na ke,
karigii cyi mpyi a pyi ke,
ka u cwoŋi si cyire puni yyaha jwo u á.
Ka li i mpyi mu à jwo yaaga kʼà u sú u zòŋi na,
ka u u mpyi mu à jwo kafaaga.
38 Canmpyaa kɛ fiigʼà tòro ke,
ka Kafooŋi si ntîge Nabali ɲuŋʼi,
ka u u ŋkwû.
39 Dawuda à lógo na Nabali à kwû ke,
maa jwo:
«Mii fwù ɲyɛ Kafooŋi na.
Nabali à mii faha,
ka Kafooŋi si lire ŋkooŋi wwû u na,
maa u báarapyiŋi yaha u ɲyɛ a kapii pyi u na mɛ.
Kafooŋi à Nabali kapiini núruŋʼa cyán u ɲuŋʼi.»
Lire kàntugo,
ka Dawuda si tùnntunmii tun Abigayili à na uru la na ɲyɛ si u lèŋɛ mpyi u cwo.
40 Ka Dawuda báarapyiibii si ŋkàre Abigayili yyére Karimɛli kànhe e maa sà u pyi:
«Dawuda à wuu tun wuu pa yi jwo mu á na ma pyi uru cwo.»
41 Ka Abigayili si yîri maa niŋkure sín maa yyahe cyígile ɲìŋke na maa jwo:
«U báarapyicwo u ɲyɛ mii,
mii sí na kàfooŋi báarapyiibii tooyi jyé.»
42 U à kwɔ̀ ke,
maa yîri ɲìŋke na,
maa dùgo dùfaanŋke kà na,
maa báarapyipucyaa kaŋkuro pyi pi à bâra u na,
ka pi i ntaha Dawuda tùnntunmpii fye e,
ka u u sà mpyi Dawuda cwo.