Dawuda à Soli yaha bòmbaa
24
Dawuda à pa yîri wani mà kàrʼa sà ŋwɔhɔ Ɛni-Gedi ɲaŋgyiyi cyage e.
2 Soli à Filisi shiinbii kɔ̀rʼa kwɔ̀ maa núrʼa pa ke,
ka pi i u pyi:
«Wíi,
Dawuda na wa Ɛni-Gedi síwage e.»
3 Ka Soli si shiin kampwɔhii taanre (3.000) cwɔɔnrɔ Izirayɛli shiinbii puni kàshikwɔnmpiyʼe,
maa ŋkàre ná pi e fo síwage sikapɛrɛgii ɲaɲyi cyage e mà sà a Dawuda ná u shiinbii caa.
4 Ka u u ŋkàrʼa sà nɔ mpàbayi yà na kuni ɲwɔge na.
Ɲaŋgyige na mpyi wani,
ka u u ŋkàrʼa sà jyè kure e si yaarashaga pyi.
Lirʼà Dawuda ná u shiinbii ta wani fo ɲaŋgyige nafyiini na.
5 Ka Dawuda shiinbii si u pyi:
«Canŋke kyaa Kafooŋi mpyi a jwo na uru sí mu zàmpɛnŋi le mu cye e mu u ma ɲyii wuuni pyi u na ke,
kuru ku ɲyɛ niɲjaa.»
Ka Dawuda si yîri,
maa mpeelʼa kàrʼa sà Soli vàanntinmbwɔhe ɲwɔŋkuŋke kà kwɔ̀n.
6 Lire kàntugo,
ka Dawuda zòmbilini si u cɛ̂ɛgɛ Soli vàanntinmbwɔhe ɲwɔŋkuŋke ŋkwɔ̀nŋi na.
7 Ka u u u fyèɲwɔhɔ shiinbii pyi:
«Kafooŋi u na shwɔ si kyaa pyi na kàfooŋi,
Kile shincwɔnrɔŋi na nta raa ŋko si cye nɔ u na.
Ɲaha kurugo yɛ,
Kafooŋi shincwɔnrɔŋi wi.»
8 Dawuda à puru jwo si u fyèɲwɔhɔ shiinbii sige,
pi àha kyaa pyi Soli na mɛ.
Ka Soli si fworo ɲaŋgyige e mà kàre.
9 Lire kàntugo,
ka Dawuda mú si fworo ɲaŋgyige e maa Soli yyere maa jwo:
«Saanŋi,
mii kàfooŋi.»
Ka Soli si yyahe kɛ̂ɛnŋʼa wíi uye kàntugo,
ka Dawuda si niŋkure sín maa yyahe cyígile ɲìŋke na,
10 maa Soli pyi:
«Sùpyire ká mu pyi:
“Wíi,
Dawuda wa na ŋko raa kapii pyi mu na,”
ɲaha kurugo mu maha pi jwumpe lógo yɛ?
11 Mu yabiliŋi ɲyii ɲya li na,
na Kafooŋi mpyi a mu le mii cye e ɲaŋgyige funŋke e niɲjaa.
Sùpyire la mpyi mii i mu bò,
ŋka mii à mu yaha wani.
Mii à pi pyi:
“Mii cyɛge sì nɔ na kàfooŋi na mɛ,
ɲaha kurugo yɛ,
Kafooŋi shincwɔnrɔŋi wi.”
12 Mii tuŋi,
wíi,
mu vàanntinmbwɔhe ɲwɔŋkuŋke kwɔnge ku ŋke mii cye e.
Ná mii sʼà mu vàanntinmbwɔhe ɲwɔŋkuŋke kwɔ̀n maa mu yaha bòmbaa,
li cè na pege ná ɲùŋkyanra ɲyɛ mii funŋʼi mɛ,
mii mú ɲyɛ na ŋko si kapii pyi mu na mɛ,
ŋka mu na mii caa raa bùu.
13 Kafooŋi u sí mii ná mu láha wuye na.
Kafooŋi u sí mii ŋkooŋi wwû mu na,
lire baare e,
mii yabiliŋi cyɛge sì nɔ mu na mɛ.
14 Sùpyire maha tàanlini là yu na:
“Pege maha fworo shinpiŋi i.”
Lire e,
mii cyɛge sì nɔ mu na mɛ.
15 Jofoo fye e Izirayɛli saanŋi ɲyɛ yɛ?
Jofoo mu ɲyɛ na ŋkɔ̀re yɛ?
Pɔ̀nŋkwugo laa,
ŋkàrimɔ?
16 Kafooŋi si yoge kyaala si mii ná mu láha wuye na.
U sí nde kani kàanmucya si mii tùbile kɔ̀rɔ.
U sí tànge kan mii á si mii shwɔ mu na.»
17 Dawuda à kwɔ̀ puru jwumpe ɲjwuŋi na Soli á ke,
ka Soli si jwo:
«Mii jyaŋi Dawuda mɛjwuuni li ɲyɛ nde la?»
Ka Soli si tùpyige le na wàa,
18 maa Dawuda pyi:
«Mu à tíi mà tòro mii na,
ɲaha kurugo yɛ,
kacɛnnɛ mu à pyi mii na,
mà li ta kapii mii à pyi mu na.
19 Mu à li cyêe mii na niɲjaa na mii funɲcɛnŋɛ ku ɲyɛ mu á,
ɲaha kurugo yɛ,
Kafooŋi mpyi a mii le mu cye e,
ŋka mu ɲyɛ a mii bò mɛ.
20 Sùpya ká u zánmpɛn ta,
u sí ɲɛɛ u yaha u kàre yyeɲiŋʼi la?
Kacɛnni mu à pyi mii á niɲjaa ke,
Kafooŋi u li sàraŋi kan ma á.
21 Numɛ,
mii à sàa tɛ̀ɛn nà lʼe na mu sí n-pa mpyi saanwa,
Izirayɛli saanre sí zhà yyaha na mu cye e.
22 Ɲyɛ,
kâa Kafooŋi mɛge na na á,
na mu sì mii tùluge shi bò mii kàntugo mɛ,
na mu sì mii mɛge pînniŋɛ mii tuŋi pyɛnge e mɛ.»
23 Ka Dawuda si ŋkâa Soli á.
Ka Soli si ŋkàre u pyɛngɛ,
ka Dawuda na u shiinbii si dùgʼa kàre pi taŋwɔhɔge e.