Dawuda à Keyila kànhe shiinbii shwɔ
23
Sùpyire tà a pa Dawuda pyi:
«Wíi,
Filisi shiinbilʼà sà ɲcwo Keyila kànhe shiinbii na,
maa pi sùmaŋi kure fyiigii na.»
2 Ka Dawuda si Kafooŋi yíbe na:
«Si sà Filisi shiinbii tùn la?»
Ka Kafooŋi si u pyi:
«Ta sì,
mu sí n-jà Filisi shiinbii na si Keyila shiinbii shwɔ.»
3 Ŋka Dawuda shiinbilʼà u pyi:
«Ali mà wuu yaha naha Zhuda kùluni i,
wuu na fyáge nta raa ŋko wuu kàre Filisi shiinbii mɛɛ na Keyila kànhe e la?»
4 Ka Dawuda si núrʼa Kafooŋi yíbe,
ka Kafooŋi si u pyi:
«Yîri ma a sì Keyila e,
ɲaha kurugo yɛ,
mii sí Filisi shiinbii le mu cye e.»
5 Ɲyɛ ka Dawuda ná u shiinbii si ŋkàre Keyila e maa sà Filisi shiinbii tùn,
maa mpa ná pi yatɔɔre e,
maa pi niɲyahamii bò.
Lire pyiŋkanni na Dawuda a Keyila shiinbii shwɔ.
6 Tèni i Ayimelɛki jyaŋi Abiyatari à fê a kàre sà ŋwɔhɔ Dawuda yyére Keyila e ke,
u mpyi a kàre ná efodiŋi i.
7 Soli à pa lógo na Dawuda na ɲyɛ Keyila e,
ka u u jwo:
«Kile à Dawuda kan mii á,
ɲaha kurugo yɛ,
u à pa uye ɲwɔ tò kànhe ŋkemu i ke,
bàraya ná yashwɔhɔyɔ na ɲyɛ kuru na.
8 Ka Soli si u kàshikwɔɔnbii puni yyere kàshige mɛɛ na,
bà pi si mpyi si ŋkàre Keyila e,
si sà Dawuda ná u shiinbii ɲwɔ tò mɛ.»
9 Dawuda à pa lógo na Soli wa na kapii bégeli uru mɛɛ na ke,
maa sáragawwuŋi Abiyatari pyi:
«Efodiŋi lwɔ́ ma a ma.»
10 Lire kàntugo,
ka Dawuda si jwo:
«Kafooŋi,
Izirayɛli u Kileŋi,
mu báarapyiŋʼà lógo na Soli la na ɲyɛ si mpa Keyila kànhe jya mii kurugo.
11 Keyila shiinbii sí mii kan u á la?
Soli sí ɲɛɛ mpa mu báarapyiŋi yi lógoŋkanni na la?
Kafooŋi,
Izirayɛli u Kileŋi,
mii na mu ɲáare,
yi yyaha jwo ma báarapyiŋʼá.»
Ka Kafooŋi si jwo:
«Soli sí mpa.»
12 Ka Dawuda si núrʼa u pyi:
«Keyila shiinbii si mii ná na shiinbii kan Soli á la?»
Ka Kafooŋi si jwo:
«Pi sí yii kan u á.»
13 Ɲyɛ ka Dawuda ná u shiinbii si fworo Keyila e mà kàre piye ɲùŋɔ kurugo.
Pi mpyi a nàmbaa ŋkwuu baani (600) kwɔ̀.
Soli à lógo na Dawuda à Keyila kànhe yaha maa ŋkàre sige e ke,
ka Soli si u ŋkàreŋi fyìinnɛ.
Dawuda à sà ŋwɔhɔ Zifu ná Mayɔn siwage e
14 Dawuda à kwôro Zifu síwage e,
maa ŋwɔhɔni lire kùluni ɲaŋgyiyi i.
Soli saha mpyi na u caa,
ŋka Kile ɲyɛ a u kan u á mɛ.
15 Dawuda à li ɲya na Soli na uru caa raa bùu ke,
ka u u ŋkwôro Zifu síwage e,
Oresha kàmpanŋke na.
16 Canŋka,
ka Soli jyaŋi Zhonatan si yîri mà kàre Dawuda yyére Oresha e,
maa sà u yatanɲyi waha Kile kani na.
17 U à u pyi:
«Ma hà raa fyáge mɛ,
mii tuŋi Soli cyɛge sì nɔ mu na mɛ.
Mu sí n-pyi Izirayɛli shiinbii ɲùŋɔ na,
mii u sí n-taha mu na.
Mii tuŋi Soli mú à sàa lire cè.»
18 Ka pi mú shuunniŋi puni si tunmbyara le Kafooŋi yyahe taan,
ka Dawuda si ŋkwôro Oresha e,
ka Zhonatan si ŋkàre u pyɛngɛ.
19 Ɲyɛ ka Zifu kànhe shiinbii pìi si shà Soli yyére Gibeya kànhe e maa sà u pyi:
«Dawuda wa a sà a ŋwɔhɔni wuu kùluni síwage e,
Oresha wwòro kùlu yyéreŋi i,
Akila mpògigii shwɔhɔlʼe.
20 Lire e ke saanŋi,
yîri wu a sì,
ɲaha kurugo yɛ,
mu ɲyii wuuni li ɲyɛ lire.
Wuu pi sí u le mu cye e.»
21 Ka Soli si jwo:
«Kafooŋi u jwó le yii á,
ɲaha kurugo yɛ,
yii à ɲùɲaara ta mii na.
22 Mii à li cya yii á,
yii i núrʼa sà yíbe,
yii i yi yyaha yalʼa cya,
cyage e u à kàre ke,
ná ŋgemu u à u ɲya ke,
yii i yire cè.
Ɲaha kurugo yɛ,
yʼà jwo mii á na u à cyìige sèlʼe.
23 Yii u taŋwɔhɔyi puni cya a cè,
yii i núrʼa pa yi yyahe fínniŋʼa jwo na á.
Lire ká mpyi,
mii sí n-kàre ná yii e.
Ká nta kìni i u ɲyɛ,
mii sí u cya ɲya Zhuda kùluni cyeyi puni shwɔhɔlʼe.»
24 Ɲyɛ ka pi i yîrʼa kàre Soli yyaha na Zifu kànhe e.
Lirʼà ta Dawuda ná u shiinbii na ɲyɛ Mayɔn síwage bafage e,
mà shà síwage wwòro kùlu yyéreŋi i.
25 Ka Soli si ŋkàre ná u shiinbilʼe Dawuda tacyage e.
Ka wà si sà yire jwo Dawuda á.
Ka Dawuda si ntîge kafaayi cyage ɲuŋʼi mà kàre Mayɔn síwage e.
Soli à yire lógo ke,
maa Dawuda fyè tɔ̀rʼa kàre Mayɔn síwage e.
26 Soli mpyi na ntùuli ɲaŋke kàmpanŋke kà na,
Dawuda ná u shiinbii si i ntùuli ku kàmpanŋke sanŋke na.
Ka Dawuda si toro wyɛ̀ɛŋɛ si fê zhwɔ Soli na,
lirʼà ta,
Soli ná u shiinbii la mpyi si Dawuda ná u wuubii kwûulo si ɲcû.
27 Ka tùnntunŋɔ si mpa Soli pyi:
«Ta fyâa ma a ma,
Filisi shiinbii wa a sà ɲcwo kìni na.»
28 Ɲyɛ ka Soli si núru Dawuda fye e mà kàre Filisi shiinbii mɛɛ na.
Lire kurugo,
pi à kuru cyage mɛgɛ le Tashwɔge Kafaage.