Dawuda à pa mpyi sùpyire tà ɲùŋufoo
22
Dawuda à yîri Gati kànhe e,
maa ŋkàrʼa sà ŋwɔhɔ Adulamu ɲaŋgyige e.
U yyahafeebii ná u pyɛngɛ shiinbii punʼà pa u saha cè ke,
maa ŋkàre u fye e.
2 Sùpyire ti mpyi ŋgahaŋi i ná fwɔhigii mpyi mpiimu na ke,
ná nàvunŋɔfeebii,
pire puni mpyi a sà piye bínni Dawuda taan,
ka u u mpyi pi ɲùŋufooŋi.
Sùpyire ti mpyi a bínni u taan ke,
tire mpyi a shiin ŋkwuu sicyɛɛre (400) kwɔ̀.
3 Dawuda à pa yîri wani mà kàre Muwabu kìni Misipa e,
maa sà Muwabu saanŋi pyi:
«Mii na mu ɲáare,
na tuŋi ná na nuŋi yaha pi pa ntɛ̀ɛn naha mu yyére mà jwo mii i ɲcè nde Kile sí n-pyi mii à ke.»
4 Ɲyɛ ka Dawuda si ŋkàre ná pi e Muwabu saanŋi yyére,
ka pi i ntɛ̀ɛn wani u yyére Dawuda ɲaŋgyige funŋke tèeŋwɔhɔni puni i.
5 Canŋka,
ka Kile tùnntunŋi Gadi si Dawuda pyi:
«Ma hà ntɛ̀ɛn n-yaha ɲaŋgyige e mɛ,
fworo ma a sì Zhuda kìni i.»
Ka Dawuda si fworʼa kàre Ɛrɛti sípuŋke e.
Soli à Kafooŋi sáragawwuubii bò
6 Soli à pa lógo na Dawuda ná u shiinbii saha na ɲyɛ a cè.
Lire mpyi a Soli ta u à tɛ̀ɛn tùnmpuɲuŋɔ ɲuŋʼi tamarisi cige ɲwɔhʼi Gibeya kànhe e,
u tàanŋi ɲyɛ u cye e,
u báarapyiibii puni sʼà yyére u taan.
7 Ka Soli si u báarapyiibii niɲjyerebii pyi uye taan:
«Bezhamɛ tùluge shiinbii,
yii lógo.
Zhese jyaŋi sí kɛrɛyɛ ná ɛrɛzɛn cikooyo kan yii punʼá la?
U sí yii puni tìŋɛ tìŋɛ si mpyi shiin kampwoo kampwoo (1.000) ɲùŋufee ná shiin ŋkuu ŋkuu (100) ɲùŋufee la?
8 Ná lire bà mɛ,
ɲaha kurugo yii punʼà vùnŋɔ pwɔ mii na,
shin ɲyɛ a ta yii e,
si yi jwo mii á,
na mii jyaŋʼà tunmbyara le ná Zhese jyaŋi i mà yɛ?
Ɲaha kurugo shin ɲyɛ a ta yii e,
mii kanʼà waha ŋgemu na,
urufoo si mii sɔ̂nŋɔ na mii jyaŋʼà mii báarapyiŋi sɔ̀n a yaha mii na,
ka u u kànhaɲya cyán mii na bà li ɲyɛ niɲjaa mà yɛ?»
9 Edɔmu shinŋi Dohegi u ɲyɛ Soli báarapyiŋi wà ke,
ka uru si jwo:
«Mii à Zhese jyaŋi ɲya Akitubu jyaŋi Ayimelɛki yyére Nɔbu kànhe e.
10 Ayimelɛki à Kafooŋi yíbe u á,
maa yalyire kan u á,
maa Filisi shinŋi Goliyati kàshikwɔnŋwɔɔni kan u á mú.»
11 Ka sanŋi Soli si tùnntunŋɔ tun u à sà Akitubu jyaŋi Ayimelɛki yyere,
uru na ɲyɛ sáragawwu,
mà bâra u tuŋi pyɛngɛ shiinbii puni na.
Pire na mpyi sáragawwuu,
pi mpyi a tɛ̀ɛn Nɔbu kànhe e.
Ka pire puni si ŋkàre saanŋi pyɛnge e.
12 Ka Soli si jwo:
«Akitubu jyaŋi,
lógo.»
Ka u u jwo:
«Mii u ŋge kàfooŋi!»
13 Ka Soli si jwo:
«Ɲaha kurugo mu ná Zhese jyaŋʼà vùnŋɔ pwɔ mii na yɛ?
Ɲaha kurugo mu à bwúuru ná kàshikwɔnŋwɔɔ kan u á maa Kile yíbe u á,
ka u u yîri mii kurugo maa kànhaɲya cyán mii na bà li ɲyɛ niɲjaa mà yɛ?»
14 Ka Ayimelɛki si saanŋi pyi:
«Mu báarapyiibii puni i,
jofoo u ɲyɛ ɲwɔmɛfoo Dawuda fiige yɛ?
Saanŋi nafoo wi,
mu saɲcwɔnsigibii yyaha yyére shinŋi wi,
mu pyɛngɛ shiinbii puni na u pêre.
15 Niɲjaa u ɲyɛ mii canɲcyiige ma Kile yíbe u á la?
Mà byanhara bá la!
Saanŋi,
ma hà tuguro tɛ̀gɛ ma báarapyiŋi ɲuŋʼi,
lire ɲyɛ mɛ,
mii tuŋi pyɛngɛ shin ɲuŋʼi mɛ,
ɲaha kurugo yɛ,
mu báarapyiŋi ɲyɛ a sàa yafyin cè nte vùnmpwɔɔre e mɛ.»
16 Ka saanŋi si jwo:
«Ayimelɛki,
mu ná ma tuŋi pyɛngɛ shiinbii puni sí n-bò.»
17 Ɲyɛ,
saɲcwɔnsigibii pi mpyi a yyére saanŋi taan ke,
ka u u jwo pirʼá:
«Yii file Kafooŋi sáragawwuubii na,
yii i pi bò,
ɲaha kurugo yɛ,
pi ná Dawuda à wwɔ̀.
Pi à cè na Dawuda à fê,
ŋka pi ɲyɛ a yafyin jwo mii á mɛ.»
Ŋka saanŋi saɲcwɔnsigibii ɲyɛ a ɲɛnʼa cye nɔ Kafooŋi sáragawwuubii na,
si pi bò mɛ.
18 Ka saanŋi si Dohegi pyi:
«Mu wi ke,
file sáragawwuubii na maa pi bò.»
Ka Edɔmu shinŋi Dohegi si file sáragawwuubii na maa pi bò.
U à shiin beecyɛɛre ná kaŋkuro (85) bò kuru canŋke ná kàshikwɔnŋwɔɔni i,
pire mpiimu pi mpyi maha sáragawwu vàanntinŋke leni ke.
19 Soli à sáragawwuubii kànhe Nɔbu shiinbii bò ná kàshikwɔnŋwɔɔni i,
nàmbaabii ná cyeebii ná nàŋkopyire nà jiriŋwɔrɔ pyìibii ná nìiyi ná dùfaaɲyi ná mpàabii.
U à yire puni bò ná kàshikwɔnŋwɔɔni i.
20 Akitubu jyaŋi Ayimelɛki u jyaŋi wà niŋkin u à jà a fê a shwɔ,
maa ŋkàre Dawuda yyére.
U mɛgɛ mpyi Abiyatari,
21 maa yi jwo u á na Soli à Kafooŋi sáragawwuubii bò.
22 Ka Dawuda si Abiyatari pyi:
«Edɔmu kànhe shinŋi Dohegi mii à ɲya wani kuru canŋke ke,
mii mpyi a tɛ̀ɛn ná lʼe,
uru sí yi puni jwo Soli á.
Mii u à pyi kaɲuŋɔ ka pi i mu tuŋi pyɛngɛ shiinbii puni bò.
23 Tɛ̀ɛn naha mii yyére,
ma hà raa fyáge mɛ.
Shinŋi u ɲyɛ na mii caa raa bùu ke,
uru u ɲyɛ na mu caa raa bùu.
Mà mu yaha naha mii yyére,
yafyin sì mu ta mɛ.»