21
Dawuda à yîrʼa kàre,
ka Zhonatan si núrʼa kàre kànhe e.
Dawuda à fê a kàre Nɔbu kànhe e Soli yyaha na
2 Dawuda à kàre Nɔbu kànhe e sáragawwuŋi Ayimelɛki yyére.
Ka uru fyagarawuŋi si fworʼa u ɲùŋɔ bɛ̂ maa jwo:
«Ɲaha kurugo mu kanni na ma,
sùpya ɲyɛ a bâra mu na mà yɛ?»
3 Ka Dawuda si sáragawwuŋi Ayimelɛki ɲwɔ shwɔ:
«Saanŋi à tùnnturo jwo mii á,
u à jwo:
“Kani na mii à mu tun,
ná ɲje mii à jwo mu á ke,
ma hà wà yaha u yi cè mɛ.”
Mii à cyage kà cyêe na shiinbii na pi i na bɛ̂ wani.
4 Ɲyɛ numɛ,
ɲaha shi ku wa mu cye e yɛ?
Bwúuru ɲùɲwɔ kaŋkuro kan na á,
lire ɲyɛ mɛ,
ŋke mu wa na sí n-ta ŋkan mii á ke.»
5 Ka sáragawwuŋi si Dawuda pyi:
«Bwúuru nintiiwe nàha mii á mɛ fo bwúuruŋi u à yaha Kile yahare e ke.
Uru wà sí n-jà ŋkan mu á,
ŋka,
fo li ta na mu shiinbii ɲyɛ a wwɔ̀ tasinaga na ná ceewe e ɲcyii canmpyaagilʼe mɛ.»
6 Ka Dawuda si sáragawwuŋi ɲwɔ shwɔ:
«Mà lwɔ́ wuu à fworo ke,
wuu wà sàha wwɔ̀ ná ceewe e mɛ.
Mii shiinbii punʼà fíniŋɛ.
Ɲwɔhɔmɔ kyaa ká nta lʼà pyi,
nàkaana bàa li pyifooŋi sí li láha,
si uye fíniŋɛ niɲjaa.»
7 Ɲyɛ,
bwúuruŋi u à yaha Kile yahare e ke,
ka sáragawwuŋi si uru kan Dawuda á,
ɲaha kurugo yɛ,
uru niɲjahaŋi baare e,
bwúuru sàha ɲyɛ a mpyi mɛ.
Pi à uru lwɔ́ Kafooŋi yyahe taan maa bwúurufɔnŋɔ yaha u cyage e.
8 Lirʼà ta,
Soli báarapyiŋi wà mpyi a shà tùnnturo na Kafooŋi yyahe taan kuru canŋke yabiliŋi i.
U mɛgɛ mpyi Dohegi.
Edɔmu kànhe shin u mpyi uru nàŋi.
Uru u mpyi Soli mpànahabii ɲùŋufooŋi.
9 Ka Dawuda si Ayimelɛki yíbe:
«Tàan,
lire ɲyɛ mɛ,
kàshikwɔnŋwɔɔ wà mu á mà?
Mii nàha a pa ná na kàshikwɔnŋwɔɔni lire ɲyɛ mɛ kàshikwɔnyaage kabɛrʼe mɛ,
ɲaha kurugo yɛ,
saanŋi tùnnture mpyi a wyɛ̀rɛ.»
10 Ka sáragawwuŋi si jwo:
«Filisi kànhe shinŋi Goliyati mu à bò Ela tafage e ke,
uru kàshikwɔnŋwɔɔni li nde lʼà myígile vàanŋʼi mà yaha efodiŋi* kàntugo yyére.
Ká mpyi mu la ɲyɛ si lire lwɔ́,
li lwɔ́,
ɲaha kurugo yɛ,
là sàha ɲyɛ naha mɛ.»
Ka Dawuda si jwo:
«Lire kàshikwɔnŋwɔɔni fiige ɲyɛ a sìi mɛ,
li kan naha.»
Dawuda à fê a kàre Gati kànhe e
11 Kuru canŋke yabiliŋi,
ka Dawuda si fê a yîri Soli taan mà kàre tatɔɔnge e Gati saanŋi Akisi yyére.
12 Ka Akisi báarapyiibii si Akasi pyi:
«Mu ɲyɛ a cè na kìni saanŋi Dawuda na ɲyɛ naha mà?
Uru sùpyire mpyi na báami maa myahigii cêe maa ŋkwɔ̂hɔli maa ŋko:
“Soli à shiin kampwɔhii (1.000) niɲyahamii bò,
ka Dawuda si shiin kampwɔhii kɛ kɛ (10.000) niɲyahamii bò.” »
13 Ka puru jwumpe si Dawuda zòmbilini cúnŋɔ,
ka u u fyá sèlʼe Gati saanŋi Akisi yyaha na.
14 Ka u u uye pyi pi ɲyii na sìcyerefoo fiige,
maa sìcyere karigii pyi.
U mpyi maha gyanrampe pyi pi bàrayi na,
maa ntilwɔhe yaha ku u ntîri u mahajwoŋi kurugo.
15 Ka saanŋi Akisi si u báarapyiibii pyi:
«Yii yabilimpilʼà li cè na ŋge nàŋi ɲùmbwuunʼà kɛ̀ɛge,
ɲaha kurugo yii à pa ná u e mii yyére yɛ?
16 Taha sìcyerefee kuu na ɲyɛ mii na ka yii i núrʼa pa ná ŋge e mii yyére u u mpa a u sìcyere karigii pyi mii ɲyii na?
Ŋge shiŋi sí n-jà n-yaha mii pyɛnge e la?»