Zhonatan à Soli funŋɔ kani jwo Dawuda á
20
Dawuda à fê a yîri Kile tùnntunmpii cyelempyiibii tatɛɛnge e Arama kànhe e mà kàre Zhonatan yyére,
maa sà u pyi:
«Ɲaha shi mii à pyi yɛ?
Kawaani ndire mii à pyi yɛ?
Kapiini ndire mii à pyi mu tuŋi na ka u u wá na mii caa raa bùu yɛ?»
2 Ka Zhonatan si u pyi:
«Lire sì n-jà mpyi mɛ.
Mu sì n-bò mɛ.
Mii tuŋi ɲyɛ a sìi na kyaa pyi,
lʼà pêe yoo,
lʼà cyɛ́rɛ yoo ná u ɲyɛ a yi jwo mii á mɛ.
Ɲaha shi ku sí u pyi u nde ŋwɔhɔ mii na yɛ?
Lire sì n-jà mpyi mɛ.»
3 Ka Dawuda si ŋkâa maa Zhonatan pyi:
«Mu tuŋʼà cè na mii kyalʼà táan mu á,
lire kurugo u ɲyɛ a ɲɛnʼa yi jwo mu á mɛ,
lire baare e,
li sí n-waha mu na.
Ŋka,
mii sí yi jwo mu á Kafooŋi ɲyii wuŋi mɛge ná mu ɲyii wuŋi mɛge na,
na pòori kyaa lʼà mii fô mii ŋkwû.»
4 Ka Zhonatan si Dawuda pyi:
«Ɲaha shi mu la ɲyɛ mii mpyi yɛ?
Mii sí lire pyi mu á.»
5 Ka Dawuda si u pyi:
«Nùmpanŋa yivɔnni sí n-fworo,
mii sí mpyi a yaa mii sà lyî ná saanŋi i.
Mii la naha a mpyi ma a na yaha si sà ŋwɔhɔ sige e zà nɔ fo canmpyitanrewuuni yàkoŋke na.
6 Mu tuŋi ká fô mii i,
ma a yi jwo u á:
“Dawuda à sàa li cya mii á na mii u yaha u shà u tukanhe Bɛtilɛhɛmu i,
na pire pyɛngɛ shiinbii puni sí raa pi yyeeni sárage wwû.”
7 U aha jwo:
“Lirʼà ɲwɔ,”
ɲyɛ,
mu báarapyiŋi fyagare sí n-kwɔ̀.
Ŋka,
u lùuni ká yîri,
tɛ̀ɛn ná lʼe,
u à li lwɔ́ si mii bò.
8 Lire e ke,
ma ɲwɔmɛfente cyêe ma báarapyiŋi na,
ɲaha kurugo yɛ,
mu à tunmbyara le ná ma báarapyiŋi i Kafooŋi yyahe taan.
Ŋka,
kampyi mii à kapii pyi,
mu yabiliŋi u mii bò.
Ɲaha kurugo mu sí n-kàre ná mii i ma tuŋi yyére yɛ?»
9 Ka Zhonatan si jwo:
«Lire sì n-sìi n-pyi mɛ.
Mii aha ɲcè na mii tuŋʼà kapii bégele si mpyi mu na,
mii sí yi jwo mu á!»
10 Ka Dawuda si Zhonatan yíbe:
«Mu tuŋi ká mu ɲwɔ shwɔ ná jwuŋgamʼi,
jofoo u sí yire jwo mii á yɛ?»
11 Ka Zhonatan si Dawuda pyi:
«Ta ma wuu a sì sige e.»
Ka pi mú shuunniŋi si fworʼa kàre sige e.
12 Ka Zhonatan si Dawuda pyi:
«Kafooŋi,
Izirayɛli u Kileŋi u ɲyɛ mii shɛ̀rɛfoo.
Nùmpanŋa,
lire ɲyɛ mɛ,
nùmpanŋaɲcye numɛ cyíin si mii ta mii à jwo ná na tuŋi i si u funzɔnŋɔre cè.
Mii aha li ɲya na mu funɲcɛnŋɛ na ɲyɛ u á,
mii sí mu yaha mu u yi cè.
13 Ŋka,
lʼaha nta na kapii li ɲyɛ mii tuŋi funŋʼi ná mu i,
mii àha mpyi mii ɲyɛ a yi jwo mu á,
mu raa wà yyeɲiŋke e mɛ,
Kafooŋi u sàa na kíbe fo u li lemɛ pi.
Kafooŋi u pyi ná mu i bà u mpyi ná mii tuŋi i mɛ.
14 Ká mpyi mii saha sí canmpyaa pyi shì na,
ma a ɲwɔ na na Kafooŋi cɛ̀nmpe kurugo.
Mii sí ká ŋkwû,
15 ma hà ma cɛ̀nmpe ɲwɔ yaha na pyɛngɛ shiinbii kàmpanŋke na mɛ,
ali Kafooŋi mɛɛ ká sàa mu zàmpɛɛnbii puni bò a lwɔ́ ɲìŋke na.»
16 Ɲyɛ ka Zhonatan si tunmbyaare le ná Dawuda ná u pyɛngɛshiinbilʼe maa jwo:
«Kafooŋi u uye nàvunŋɔ kwɔ̀ Dawuda zàmpɛɛnbii na.»
17 Ka Zhonatan si núrʼa Dawuda pyi u à kâa u á,
pi shwɔ̀hɔŋi cempe kurugo,
ɲaha kurugo yɛ,
Dawuda kyaa mpyi a táan u á u yabiliŋi fiige.
18 Ka Zhonatan si jwo:
«Nùmpanŋa yivɔnni sí n-fworo,
kàanmucyage sí n-fworo li na,
na mu à fô,
ɲaha kurugo yɛ,
mu tatɛɛnge niŋgage sí n-pyi.
19 Nùmpanŋaɲcye,
mu sí n-tîge zà ŋwɔhɔ kuru canŋke taŋwɔhɔge e,
Ezɛli kafaage taan.
20 Mii sí tàanlii taanre ŋwɔn kuru kàmpanŋke na mu à jwo yaaga mii ɲyɛ na sɛ́ɛnni.
21 Lire kàntugo,
mii sí na báarapyiŋi tun si yi jwo u á:
“Sà tàanbii lwɔ́ ma a ma.”
Mii aha u pyi:
“Wíi,
mu à tòro tàanbii taan,
núrʼa pi lwɔ́ ma a ma,”
lire e,
mu sí n-jà raa ma,
ɲaha kurugo yɛ,
kapii ɲyɛ mu yyaha na mɛ,
yafyin sì mu ta mɛ,
mii sí yire jwo mu á Kafooŋi ɲyii wuŋi mɛge na.
22 Ŋka,
mii aha báarapyiŋi pyi:
“Tàanbii na ɲyɛ fo mu yyaha yyére,”
lire e ke,
ma a yîri ma a sì,
ɲaha kurugo yɛ,
Kafooŋi la ku ɲyɛ ma a sì.
23 Ɲwɔmɛɛni wuu à jwo a kan wuyʼá ke,
Kafooŋi u pyi mii ná mu shɛ̀rɛfoo lire e tèrigii puni i.»
24 Ɲyɛ ka Dawuda si sà ŋwɔhɔ sige e.
Yivɔnnʼà fworo ke,
ka saanŋi si ntɛ̀ɛn ɲjyìŋi ɲuŋʼi.
25 Saanŋi à tɛ̀ɛn u yatɛɛnŋke e ŋkunnuŋke ŋkère na,
bà u mpyi maha ntêe na li pyi mɛ.
Ka Zhonatan si ntɛ̀nʼa yyaha kan u á,
ka Abinɛri si ntɛ̀ɛn Soli taan,
ka Dawuda yatɛɛnŋke niŋgage si ŋkwôro.
26 Soli ɲyɛ a yafyin jwo kuru canŋke mɛ,
ɲaha kurugo yɛ,
u mpyi a li yaha na kani là li sí n-ta lʼà u ɲwɔ́hɔ mà u pyi u ɲyɛ a jà a pa mɛ.
27 Kuru canŋa nùmpanŋa,
yivɔnni canmpyishwɔnwuuni,
Dawuda yatɛɛnŋke niŋgage saha mpyi a kwôro.
Ka Soli si u jyaŋi Zhonatan pyi:
«Ɲaha kurugo Zhese jyaŋi Dawuda ɲyɛ a pa ɲjyiŋʼá taɲjaa ná niɲjaa mà yɛ?»
28 Ka Zhonatan si Soli pyi:
«Dawuda à sàa li cya mii á,
na mii uru yaha u shà Bɛtilɛhɛmu i.
29 U à mii ɲáara na mii uru yaha u shà,
ɲaha kurugo yɛ,
uru pyɛngɛ shiinbii sí raa sáraga wwû kànhe e,
uru yyahafooŋi sʼà jwo na uru u a sì.
U à jwo na kampyi uru kyalʼà táan mii á,
na mii uru yaha u sà u yyahafeebii ɲya.
Lire lʼà u pyi u ɲyɛ a pa saanŋi ɲjyìŋʼá mɛ.»
30 Ka Soli lùuni si sàa yîri Zhonatan taan,
ka u u u pyi:
«Cikuuŋɔ pyà ɲùŋkyan wogo kà ke.
Taha mu na sɔ̂nŋi na mii ɲyɛ a cè na mu ná Zhese jyaŋi na ɲyɛ cevee mɛ?
Mu ná ma nuŋi silige ki!
31 Yi cè na mà Zhese jyaŋi yaha shì na ŋke ɲìŋke na,
mu ná ma saanre sì n-jà ntígile mɛ.
Pìi tun numɛ pi i sà u cû pi a ma,
ɲaha kurugo yɛ,
u à yaa u bò.»
32 Ka Zhonatan si u tuŋi Soli pyi:
«Ɲaha kurugo mu sí u bò yɛ?
Ɲaha u à pyi yɛ?»
33 Ka Soli si u tàanŋi kɛ̂ɛnŋɛ Zhonatan yyére sʼa bùu.
Kuru cyage e Zhonatan à li cè na uru tuŋʼà li lwɔ́ si Dawuda bò.
34 Ka Zhonatan lùfwɔgɔ wuŋi si yîri ɲjyìŋi taan.
U tuŋʼà Dawuda faha ke,
lire kurugo u ɲyɛ a yivɔnni canmpyishwɔnwuuni ɲjyìŋi lyî mɛ.
35 Kuru canŋa nùmpanŋa ɲyɛ̀ge na,
ka Zhonatan si ŋkàre sige e,
u ná Dawuda mpyi a cyage ŋkemu cyêe piye na ke,
wani.
U ná nàɲjiiŋi wà mpyi a kàre sìŋcyan.
36 Ka u u uru nàɲjiiŋi pyi:
«Tàanbii mii sí n-wà ke,
fê a sà pi lwɔ́ ma a ma.»
Ka nàɲjiiŋi si wá na fî na ŋkɛ̀ɛge,
ka Zhonatan si tàanŋi wà u yyaha yyére.
37 Mà nàɲjiiŋi yaha u u ŋkɛ̀ɛge tàanŋi tacwuge kàmpanŋke na,
ka Zhonatan si sêe u na:
«Tàanŋi ɲyɛ a tòrʼa kàre fo mu yyaha yyére mà?»
38 Ka u u núrʼa sêe u na:
«Ta fyàa ma a wà,
ma hà n-yyére mɛ.»
Ka Zhonatan nàɲjiiŋi si sà tàanŋi lwɔ́ a pa ŋkan u ɲùŋufooŋʼá.
39 Nàɲjiiŋi ɲyɛ a mpyi a yaaga yyaha cè pʼe mɛ,
Zhonatan ná Dawuda kanni u mpyi a yi yyaha cè.
40 Ka Zhonatan si u kàshikwɔnyaayi kan uru nàɲjiiŋʼá,
maa yi jwo u á na u núru a sì ná yʼe kànhe e.
41 Nàɲjiiŋʼà kàre ke,
ka Dawuda si yîri wwòro kùlu yyéreŋi i,
maa uye yaha a cwo,
maa niŋkure sín maa yyahe cyígile ɲìŋke na tooyo taanre.
Lire kàntugo,
ka u ná Zhonatan si piye pûrʼa cû maa mɛɛ súu.
Ŋka Dawuda u mɛsuuni cye mpyi a tòro.
42 Ka Zhonatan si Dawuda pyi:
«Ta sì yyeɲiŋke e numɛ.
Li yaha maye funŋʼi na wuu à kâa wuyʼá Kafooŋi mɛge na,
maa jwo:
“Kafooŋi u pyi tèrigii puni i mii ná mu shɛ̀rɛfoo,
u u mpyi mii tùluge ná mu woge shɛ̀rɛfoo.”»