Soli la na ɲyɛ si Dawuda bò
19
Soli à yi jwo u jyaŋi Zhonatan ná u báarapyiibii punʼá na pi Dawuda bò.
Ŋka Dawuda kyaa mpyi a sàa táan Soli jyaŋi Zhonatan á.
2 Ka uru si yi ŋwɔhʼa jwo Dawuda á na:
«Mii tuŋi Soli la ɲyɛ si mu bò.
Yaha maye na nùmpanŋa ɲyɛ̀gɛ na,
maa sà ŋwɔhɔ cyage kʼe,
maa ntɛ̀ɛn wani.
3 Sige e mu sí n-zà ŋwɔhɔ ke,
mii sí n-fworo ná na tuŋi i si sà yyére u taan kurʼe,
si mu kyaa jwo u á,
si ɲcè ɲje u sí n-jwo ke.
U aha ɲjemu jwo ke,
mii sí yire jwo mu á.»
4 Ka Zhonatan si jyè Dawuda mɛtange e na yu u tuŋi Soli á na:
«Saanŋi,
ma hà kapii pyi ma báarapyiŋi Dawuda na mɛ,
ɲaha kurugo yɛ,
u ɲyɛ a sàa yafyin pyi mu na mɛ.
U à kacɛnŋii niɲyagii pyi mu á.
5 U à u múnaani wà mpuŋɔ na maa Filisi shinŋi bò.
Kafooŋi à sítara nimbwɔrɔ kan Izirayɛli shiinbii punʼá u cye kurugo.
Mu à lire ɲya,
ka li i ntáan mu i.
Ɲaha kurugo mu sí kapiini pyi Dawuda na si shintíiŋi sìshange wu ɲùŋɔ bàa yɛ?»
6 Ka Soli si ɲɛɛ Zhonatan jwumpe na,
maa ŋkâa na:
«Kafooŋi ɲyii wuŋi mɛge na,
Dawuda saha sì n-bò mɛ.»
7 Ka Zhonatan si Dawuda yyere maa puru jwumpe puni yyaha jwo u á.
Lire kàntugo,
maa ŋkàre ná u e Soli yyére.
Ka Dawuda si núrʼa u báaraŋi sogo na mpyi Soli á bà u mpyi a fyâha na u pyi mɛ.
Dawuda cwoŋi Mikali à u pyi u à shwɔ
8 Kàshigʼà núrʼa sìi,
ka Dawuda si ŋkàre Filisi shiinbii mɛɛ na,
maa sàa li taha pi na fo pi à fê u yyaha na.
9 Ɲyɛ,
mà Soli nintɛɛnŋi yaha u bage e ná u tàanŋi i cyɛge e,
ka Kafooŋi si múnapiini là pyi lʼà jyè u e.
Lirʼà Dawuda ta u u ŋkɔ̀nnɔŋi bwùun.
10 Ka Soli la si mpyi si Dawuda kwòro ŋkunnuŋke na,
ná u tàanŋi i.
Ka Dawuda si fyíngʼa fworo tàanŋi ɲwɔhʼi,
ka tàanŋi si sà ŋkunnuŋke fûru.
Ka Dawuda si fê a shwɔ kuru canŋke numpilage e.
11 Ka Soli si pìi yaha pi à kàre Dawuda pyɛnge e,
si sà a u kàanmucaa,
si nta u bò ɲyɛ̀ge na.
Ka Dawuda cwoŋi Mikali si u sɔ̂nŋɔ.
U à jwo:
«Ná mu ɲyɛ a fê ŋke numpilage e mɛ,
nùmpanŋa mu na ɲyɛ bu.»
12 Ka Mikali si Dawuda yige fìnɛtiriŋi i,
ka u u fê a shwɔ.
13 Lire kàntugo,
ka Mikali si kacyiin lwɔ́ a sínniŋɛ yasinniŋke ɲuŋʼi,
maa sikasɛɛgɛ lwɔ́ a yaha ɲùntahage cyɛge e,
maa vàannto tɛ̀gʼa ku tò.
14 Soli tùnntunmpilʼà sà nɔ Dawuda na si u ɲcû ke,
ka Mikali si pi pyi:
«U ɲyɛ a cùuŋɔ mɛ.»
15 Ka Soli si pi pyi pi núrʼa sà u wíi,
pi i yasinniŋke lwɔ́ ná u e pi a ma,
uru sí n-pa u bò.
16 Ka pi i núrʼa kàrʼa sà wíi,
mà li ta kacyiin li ɲyɛ yasinniŋke ɲuŋʼi maa sikasɛɛgɛ pyi ɲùntahage.
17 Ka Soli si Mikali pyi:
«Ɲaha kurugo mu à mii ɲwɔ fáanʼa wurugo amɛ,
maa mii zàmpɛnŋi yaha u à kàre ka u u shwɔ yɛ?»
Ka Mikali si Soli ɲwɔ shwɔ:
«U à jwo na mii uru yaha uru u à wà lire baare e,
uru sí mii bò.»
Dawuda à fê a kàre Kile tùnntunmpii cyelempyiibii tatɛɛnge e
18 Lire pyiŋkanni na Dawuda à fê a shwɔ,
maa ŋkàre Samuwɛli yyére Arama kànhe e.
Karigii Soli à pyi u na ke,
ka u u cyire puni yyaha jwo Samuwɛli á.
Lire kàntugo,
ka u ná Samuwɛli si ŋkàrʼa sà ntɛ̀ɛn Kile tùnntunmpii cyelempyiibii tatɛɛnge e.
19 Ka pìi si sà yi jwo Soli á na Dawuda na wa Kile tùnntunmpii cyelempyiibii tatɛɛnge e Arama kànhe e.
20 Ka Soli si pìi yaha a kàre pi i sà Dawuda cû.
Ka pire si ŋkàrʼa sà Kile tùnntunmpii kuruŋke kà ta kʼà fworo ku lyempe e maa Kile tùnnture yu,
Samuwɛli sí ɲyɛ pire ɲùŋufooŋi.
Ka Kile Munaani si ntîge Soli tùnntunmpii ɲuŋʼi,
ka pire si li ɲwɔ cû na Kile tùnnture yu.
21 Ka pi i sà yire yyaha jwo Soli á.
Ka u u piibɛrii tun.
Ka pire mú si sà fworo pi lyempe e maa Kile tùnnture yu niɲcyiibii fiige.
Ka Soli si tùnntunmii pìi tun tontanrawogo,
ka pire mú si sà fworo pi lyempe e maa Kile tùnnture yu.
22 Li ɲyɛ a pa ɲwɔ mɛ,
ka Soli yabiliŋi si yîrʼa kàre Arama kànhe e.
U à sà nɔ Seku lwɔhe bwùunni cyage e ke,
maa yíbe:
«Taa Samuwɛli ná Dawuda ɲyɛ ke?»
Ka pi i u ɲwɔ shwɔ:
«Pi na ɲyɛ Kile tùnntunmpii cyelempyiibii tatɛɛnge e,
Arama kànhe e.»
23 Ka u u kuni lwɔ́ na ŋkɛ̀ɛge Kile tùnntunmpii cyelempyiibii tatɛɛnge e,
Arama e.
Ka Kile Munaani si ntîge u ɲuŋʼi mú,
ka u u fworo u lyempe e,
maa Kile tùnnture yu na wà fo mà sà nɔ Kile tùnntunmpii cyelempyiibii tatɛɛnge e,
Arama kànhe e.
24 U mú mpyi a fworo u lyempe e,
maa vàanɲyi wwû,
maa Kile tùnnture yu Samuwɛli yyaha taan.
Ka u cípyire wuŋi si ɲcwo ɲìŋke na mà kuru canŋke canmpuni ná numpilipuni pyi.
Lire e,
ka sùpyire si wá na yíbili:
«Taha Soli mú na ɲyɛ Kile tùnntunŋɔ?»