Ɛsitɛri Sémɛŋi
Saanŋi kataanni
1
Ɲcyii karigilʼà pyi saanŋi Asirusi tìiŋi i.
Uru Asirusi mpyi kùlugii ŋkuu ná beɲjaaga ná baashuunni (127) ɲùŋɔ na,
mà lwɔ́ Ɛndi kìni na,
mà sà nɔ Etiyopi wuuni na.
2 Lire tèni i,
Asirusi mpyi u saanre tatɛɛnge e saanre kànhe Suzi i.
3 U saanre yyetanrewuuni i,
u à kataan nimbwoo bégele maa u kìni mɛgɛfeebii ná yyaha yyére shiinbii yyere.
Pɛrɛzi shiinbii ná Mɛdi shiinbii kàshikwɔɔnbii yyaha yyére shiinbii ná shinbwoobii ná kùlugii yyaha yyére shiinbii mpyi a bínni u cyage e.
4 Ka u u u nàfufente nà u saanre sinanmpe na u sífente cyêe pi na canmpyaa ŋkuu ná beecyɛɛre funŋʼi (180).
5 Cyire canmpyaagilʼà fûnŋɔ ke,
ka saanŋi si lyìmbwoo bégele u saanre kànhe Suzi shiinbii puni mɛɛ na,
shinbilere bâra shinbwo na.
Canmpyaa baashuunni pi à pyi li na u saanre pyɛnge funŋke cikɔɔge e.
6 Váanvyinre ná ɲyɛ̀puruge yyahe fiige vàanɲyi nà bula tulugo wuyi mpyi a pwɔ kafafyinye ciŋkunɲwɔ na,
ná dìzin zhiiliŋi niɲyɛŋi ná nivyinŋi i,
yi i fánŋi kuru cyage e.
Dìzinŋi mpyi a pwɔ wyɛ́rɛfyinŋi kaɲcinŋi i na.
Sɛɛnŋi bámbahayi ná wyɛ́rɛfyinŋi wuyi mpyi a cyán kafaayi niɲcɛnɲyi mbìiŋkii wuyi niŋwɔgɔyi ɲuŋʼi ɲìŋke na.
Yire kafaayi yà mpyi a ɲáaŋa,
yà mpyi a fíniŋɛ,
yà yyaha mpyi nɛrɛ fiige,
yà sʼà wwɔ̀.
7 Funɲcwokwuugii sɛɛnŋi wogilʼe pi mpyi na yabyɛɛre kaan sùpyirʼá.
Lire là ná là ɲyɛ a mpyi niŋkin mɛ.
Ɛrɛzɛn sinmpe saanŋʼà kan ke,
puru mpyi a ɲyaha mà tàanna ná saanŋi funvyinge ŋkanŋi i.
8 Shin maha shin mpyi na byii u ɲyii byaŋkanna na.
Saanŋi mpyi a yi jwo u pyɛnge báarapyiibii punʼá,
na pi shinyyerebii niŋkin niŋkinŋi yaha pi a byii pi ɲyii byaŋkanna na.
9 Saancwoŋi Vasiti mú mpyi a kataan nimbwoo bégele cyeebii mɛɛ na,
saanŋi Asirusi saanre bage e.
Saanŋi cwoŋi Vasiti à cyé saanŋi yini logogo
10 Canmpyibaashwɔnwuuni,
mà saanŋi funntanga wuŋi yaha ɛrɛzɛn sinmpe cye e,
ka u u Mehumani ná Bezita ná Aribona ná Bigita ná Abagita ná Zetari ná Karikasi yyere,
pire shiin baashuunniŋi pi mpyi u pyɛnge kacwɔnribiia,
maa yi jwo pi á,
11 na pi sà a ma ná saancwoŋi Vasiti i uru yyahe taan,
mà saanre ɲùntoŋke yaha u ɲùŋke na,
u u mpa u sìnanmpe cyêe shinbwoobii ná sùpyire sannte nimbinnibii na.
U lemɛ mpyi a sàa ɲwɔ.
12 Ka saanŋi pyɛnge kacwɔnribii si sà tùnnture jwo sancwoŋi Vasiti á,
ka saancwoŋi si ɲcyé karaga.
Ka lire si sàa saanŋi lùuni yîrige.
13 Yákilifeebii pi mpyi a tèrigii cè ke,
ka saanŋi si pire yíbe.
Ɲaha kurugo yɛ,
mpii pi mpyi a sàliyaŋi ná kìni yyeshempe cè ke,
pire pi mpyi maha saanŋi yɛrɛge.
14 Pire e,
mpii pi mpyi maha mpyi u ŋkère na ke,
pire pi ɲyɛ:
Karisena ná Shetari ná Adimata ná Tarisisi ná Merɛsi ná Marisena ná Memukan.
Pire shiin baashuunniŋi u mpyi Pɛrɛzi shiinbii ná Mɛdi shiinbii yyaha yyére shiinbii.
Pire pi mpyi kìni tayyereyi nimbwoyi i,
pire mú pi mpyi maha jà na saanŋi ɲaa.
15 Ka saanŋi Asirusi si pire pyi:
«Mà tàanna ná sàliyaŋi i,
ɲaha shi kʼà yaa ku pyi saancwoŋi Vasiti na yɛ?
Ɲaha kurugo yɛ,
mii à tùnntunmii tùn u á,
ka u u ɲcyé paŋa.»
16 Ka Memukan si ɲwɔshwɔɔre pyi saanŋi ná yyaha yyére shiinbii ɲyii na na:
«Nde saancwoŋi Vasiti à pyi ke,
saanŋi kanni na bà u à li pyi mɛ,
ŋka yyaha yyére shiinbii ná saanŋi Asirusi saanre sùpyire puni na u à li pyi.
17 Ɲaha kurugo yɛ,
nde saancwoŋʼà pyi ke,
cyeebii sanmpiipuni sí lire lógo,
lire sí pi pyi pi a pi màmbaabii fare sʼa ŋko:
“Saanŋi Asirusi yabiliŋʼà u cwoŋi Vasiti yyere u shà ka u u ɲcyé.”
18 Niɲjaa yabiliŋi,
Pɛrɛzi shiinbii ná Mɛdi shiinbii yyaha yyére shiinbii cyeebii pi à saancwoŋi kapyiini nde lógo ke,
pire sí li ɲwɔ cû raa lire shi pyi pi nàmbaabii na.
Pi fahante sí pi nàmbaabii lùugii yîrige.
19 Saanŋi Asirusi,
kampyi mu sí ɲɛɛ,
sàliya tèekwombaa wu le ma kan Pɛrɛzi shiinbii ná Mɛdi shiinbilʼá,
ŋgemu u sí li cyêe na Vasiti saha sì n-jà zhà saanŋi Asirusi yyére mɛ,
ŋka saanŋi sí ceeŋi wabɛrɛ pyi saancwoŋi ŋgemu u à pwɔrɔ Vasiti na ke.
20 Saanŋi màrampe ná pu mpèeŋi mú i,
saanŋi sàliyaŋi ká nɔ pu cyeyi puni i,
cyeebii puni sí raa pi nàmbaabii pêre,
nàmbwo bâra nàmbileere na.»
21 Ka puru jwumpe si ntáan saanŋi ná yyaha yyére shiinbilʼá.
Ka saanŋi si Memukan yɛrɛge kuni ɲaara.
22 Ka u u sémii tun u màrampe kùlugii puni i mà tàanna ná sùpyire semere pyiŋkanni ná pi shɛɛnre jwuŋkanni i.
Yi mpyi a sémɛ sémɛbilʼe na,
nɔ̀ maha nɔ̀ à yaa u pyi u pyɛnge ɲùŋɔ na,
u u u nushɛɛnre ɲjwuŋi fànhe cyán u pyɛnge shiinbii na.