Ɛsitɛri à pa mpyi saanŋi cwoŋi
2
Ɲyɛ,
cyire karigii kàntugo,
ka saanŋi Asirusi lùuni si ntɛ̀ɛn,
ka u u sɔ̂nŋɔ Vasiti kapyiini na,
mà bâra nde li mpyi a bégele u mɛɛ na ke.
2 Ɲyɛ ka saanŋi pyɛnge kacwɔnribii si jwo:
«Pùcempyire nisinante ti ɲyɛ ti sàha nɔ̀ shi cè mɛ,
wuu tire tà cya pa saanŋʼá.
3 Saanŋi u tùnntunmii tìŋɛ u màrampe kùlugii puni i.
Pire sí pùcempyire nɔ̀ shi cèmbaa woore nisinannte puni bínni cyaga niŋkin i,
saanre kànhe Suzi i,
saanŋi cyeebii bage e.
Saanŋi cyeebii kacwɔnrɔŋi u ɲyɛ Egayi ke,
uru sí raa pi karigii cwɔɔnre,
sʼa pi pùcyage yaayi kaan pi á.
4 Pùcembilini ndemu kyaa ká ntáan saanŋʼá ke,
lire sí n-pyi sancwoŋi,
Vasiti cyaga.»
Ka saanŋi si ɲɛɛ puru jwumpe na,
ka pi i li pyi amuni.
5 Lirʼà ta,
Yahutunaŋi wà na mpyi saanŋi kànhe Suzi i,
uru mɛgɛ mpyi Maridose.
Uru u tuŋi mɛgɛ mpyi Yahiri,
uru u tuŋi mɛgɛ sí ɲyɛ Shimɛyi,
uru u tuŋi mɛgɛ sí ɲyɛ Kisi.
Uru mpyi Bezhamɛ tùluge shin.
6 Babilɔni saanŋi Nebukadenezari mpyi a Zhuda saanŋi Yekoniya ná mpiimu cû Zheruzalɛmu i mà kàre Babilɔni i ke,
Maridose mpyi pire e.
7 Adasa pi maha mpyi Ɛsitɛri ke,
Maridose u mpyi na uru byíi.
U tubileni pworo u mpyi u wi.
U tuŋi ná u nuŋi sàha mpyi mɛ.
Lire pùcembilini lemɛ mpyi a ɲwɔ,
li wíimɛ sʼà táan.
Li sifeebii kwùŋkwooni kàntugo,
Maridose mpyi a li lwɔ́ na byíi.
8 Saanŋi tùnnture ná u kakwɔnɲjahani jwumpʼà caala tèni ndemu i ke,
ka pi i pùcempyire niɲyahara bínni saanre kànhe Suzi i,
maa pi kyaa le Egayi cye e.
Pi mú mpyi a kàre ná Ɛsitɛri e saanŋi pyɛnge e mà sà ŋkan saanŋi cyeebii kacwɔnrɔŋi Egayi á.
9 Ka Ɛsitɛri kyaa si ntáan Egayi á,
ka uru si sàa yaha u na,
maa ntílʼa pùcyage pyi pyi yaayi kan u á mà bâra yalyire na.
Báarapyipùcempyire shwɔhɔlʼe,
maa baashuunni wwû tire e saanŋi pyɛnge e mà kan u á,
maa u ná tire yaha cyeebii bage puni tasinaŋke e.
10 Ɛsitɛri ɲyɛ a ɲɛnʼa u shiŋi ná u tupyɛnge cyêe mɛ,
ɲaha kurugo yɛ,
Maridose mpyi a u sige yi ɲjwuŋi na.
11 Canŋa maha canŋa,
Maridose mpyi maha ŋkàrʼa sà a ɲaare cyeebii pyɛnge ɲwɔge na,
si ɲcè pyiŋkanni na Ɛsitɛri ɲyɛ,
ná cùŋkanni na pi à u cû ke.
12 Yiɲyɛ kɛ ná shuunni yi mpyi a kan pùcempyire tiye ɲjaaŋi mɛɛ na,
si nɛɛ zhà saanŋi yyaha taan.
Lire tèni funŋke e,
pi mpyi maha yiɲyɛ baani pyi miri sìnmpe nùguntanga wumpe ntìriŋi na,
maa yiɲyi baaniŋi sanŋi pyi cyeebii sewɔɔgɔ sìnmpe ná pi nùguntanga sìnmpe pabɛrɛ ntìriŋi na.
13 Ɲyɛ,
amɛ pùcempyire mpyi maha sì saanŋi yyére.
Ŋgemu ná mpyi na wà ke,
yaaga maha yaaga kyaa li ɲyɛ u na mà yîri cyeebii bage e sʼa wà saanŋi yyére ke,
pi mpyi maha yire puni kan u á.
14 Yàkoŋke u mpyi maha ŋkàre,
maa yîri wani ɲyɛ̀ge na maha ŋkàre cyeebii bage kabɛrɛ e,
maha sà ŋkan Shasigasi á.
Uru cyeebii saɲcwɔnsigiŋi mpyi maha saanŋi cyeebii tatɛɛnge shwɔnwoge bage saɲcwɔnŋi sigili.
Lire pùcembilini sàha ɲyɛ mpyi na sì saanŋi bage e mɛ,
fo u kyaa kampyi saanŋi na,
ka u u u lwɔ́ u mɛge na maa pi pyi pi à u yyere.
15 Maridose tubileni Abiyɛli pworoŋi Ɛsitɛri u mpyi u u byíi ke,
saanŋi bage zhàŋʼà mâhanʼà pa nɔ uru na.
Saanŋi pyɛnge kacwɔnrɔŋi Egayi u ɲyɛ na cyeebii saɲcwɔnŋi sigili ke,
ɲje urʼà jwo Ɛsitɛri á ke,
u ɲyɛ a yaaga bâra yire na mɛ.
Ɛsitɛri kyaa mpyi a táan u ɲyafeebii punʼá.
16 Ka pi i ŋkàre ná Ɛsitɛri i saanŋi Asirusi saanre bage e,
Tebɛti yiŋke e.
Kuru ku ɲyɛ yyeeni yiŋke kɛ woge.
Lʼà pyi saanŋi saanre yyeebaashwɔnwuuni i.
17 Ka Ɛsitɛri kyaa si ntáan saanŋʼá mà tòro cyeebii sanmpiipuni na,
ka u u ɲɛɛ u na mà tòro pùcempyire sannte puni na.
Ka u u saanre ɲùntoŋke tò u ɲùŋke na,
maa u pyi saancwoŋi,
Vasiti cyaga.
18 Ka saanŋi si kataan nimbwoo pyi u shinbwoobii puni ná yyaha yyére shiinbii punʼà Ɛsitɛri mɛge na,
maa u màrampe kùlugii puni pyi cyi à lire canmbilini ŋɔ̀,
maa ma yaaya niɲyahaya táa mà tàanna ná u saanre cyentage e.
Maridose à saanŋi múnaani shwɔ
19 Pi à pùcempyire bínnizhwɔnwuuni pyi tèni ndemu i ke,
Maridose nintɛɛnŋi mpyi saanŋi pyɛnge ɲwɔge na.
20 Ɛsitɛri ɲyɛ a mpyi a u shiŋi lire ɲyɛ mɛ u tupyɛnge cyêe sùpya na mɛ,
ɲaha kurugo yɛ,
Maridose mpyi a u sige lire na.
U mpyi a Maridose ɲwɔmɛɛni cû bà u mpyi mà u yaha Maridose yyére mɛ.
21 Lire tèni i,
mà Maridose yaha saanŋi pyɛnge ɲwɔge na,
kacwɔnribii pi mpyi na saanŋi pyɛnge saɲcwɔnŋi sigili ke,
pire pìi shuunni,
Bigitan ná Terɛsi,
ka pire si ɲùŋɔ kyán saanŋi Asirusi na,
maa u bòŋkanna caa.
22 Maridose à pa yire cè ke,
maa yi jwo saancwoŋi Ɛsitɛri á,
ka uru si sà yi jwo saanŋʼá Maridose mɛgɛ na.
23 Pi à lire kani suguro mà pa li ta sèe ke,
ka pi i pire Saɲcwɔnsigibii shuunniŋi pwɔ a bò cige na.
Ka pi i cyire karigii sémɛ kìni katoroŋkwɔgigii sémɛŋi i saanŋi ɲyii na.