Ama ná Maridose kani
3
Cyire karigii kàntugo,
ka saanŋi Asirusi si mpa Agagi tùluge shinŋi Amedata jyaŋi Ama pêe maa u dùrugo,
maa u tìŋɛ ɲùŋufeebii puni ɲùŋɔ na,
pire mpiimu pi mpyi maha mpyi u ŋkère na ke.
2 Saanŋi báarapyiibii pi mpyi maha yyére u pyɛnge ɲwɔge na ke,
pire puni mpyi maha niŋkure sìnni Ama á maa u pêre.
Ɲaha kurugo yɛ,
saanŋi mpyi a jwo na pi a lire pyi u á.
Ŋka Maridose ɲyɛ a sàa u niŋkure sín u á maa u pêe mɛ.
3 Saanŋi báarapyiibii pi mpyi maha yyére u pyɛnge ɲwɔge na ke,
ka pire si Maridose pyi:
«Ɲaha kurugo mu à saanŋi ɲwɔmɛɛni yaha yɛ?»
4 Ná pi sí mpyi maha yire yu ná u e canŋa maha canŋa u sí ɲyɛ a lógo pi á mɛ,
ka pi i yi jwo Ama á si ɲcè kampyi Maridose saha si ŋkwôro u lyempe e,
ɲaha kurugo yɛ,
u mpyi a yi jwo pi á,
na uru na ɲyɛ Yahutu.
5 Ama à li ɲya na Maridose ɲyɛ na niŋkure sínni urʼá maa uru pêre mɛ,
ka u lùuni si yîri sèlʼe.
6 Ka u u li ɲya Maridose kanni ɲcùŋi sì n-jà uru funŋke ɲíŋɛ mɛ.
Ɲaha kurugo yɛ,
pi mpyi a Maridose shiŋi jwo u á.
Ka u la si mpyi,
Maridose shiŋi u ɲyɛ Yahutuubii ke,
si pire puni bò saanŋi Asirusi màrampe puni i.
7 Saanŋi Asirusi saanre yyee kɛ na shwɔnwuuni yiɲcyiige ku ɲyɛ Nisan yiŋke ke,
ka pi i Pirimuŋi pyi,
lire ɲwɔhe ku ɲyɛ mà ŋkyaanlwooni pyi Ama ɲyii na,
si canmbile ná yiŋɛ cè Yahutuubii puni mbòŋi na.
Ka ŋkyaanlwooni si mpa yyeeni yiŋke kɛ na shwɔnwoge cyêe.
Kuru ku ɲyɛ Adaria yiŋke.
8 Ɲyɛ ka Ama si sà saanŋi Asirusi pyi:
«Supyishiŋi wà na ɲyɛ a caala mu màrampe cyeyi puni i,
ŋgemu u à uye wwû supyishiŋi sanŋi i ke.
Pire na ɲyɛ ná sàliya e,
ŋgemu u à uye wwû supyishiŋi sanŋi puni wuŋi i ke,
pi kuro sì ɲyɛ sìi saanŋi sàliyaŋi i mɛ.
Tɔ̀ɔn ɲyɛ li na saanŋʼá mà tire sùpyire yaha yyeɲiŋʼi mɛ.
9 Ká mpyi saanŋi sí ɲɛɛ,
wuu yi sémɛ,
na tire sùpyire puni ti bò.
Mii sí wyɛ́rɛfyinŋi tɔɔnɲwɔ kampwɔhii kɛ (10.000) kan fànhafeebilʼá pi sà yaha saanŋi nàfuuŋi tayahage e.»
10 Ka saanŋi si u kampefegeŋib wwû mà kan Yahutuubii zàmpɛnŋi Ama á,
uru ŋgemu u ɲyɛ Agagi tùluge shinŋi Amedata jyaŋi ke.
11 Lire kàntugo,
ka saanŋi si Ama pyi:
«Ma wyɛ́riŋi yaha maye ɲuŋʼi,
mii mú à tire sùpyire le mu cye e,
nde lʼà táan mu à ke,
lire pyi ti na.»
12 Yyeeni yiɲcyiige canmpyi kɛ ná tanrewuuni,
ka pi i saanŋi sémɛsemɛbii yyere,
maa sémɛbii sémɛ saanŋi mɛgɛ na mà tàanna ná Ama yi jwuŋkanni i pi á,
maa pire tun saanŋi màrampe fànhafeebii ná ɲùŋufeebii ná shiŋi puni yyaha yyére shiinbilʼá,
mà tàanna ná pi shi maha shi shɛnrɛ sémɛŋkanna ná ti jwuŋkanni i,
maa saanŋi Asirusi kampefegeŋi tɛ̀gʼa fyè bwɔ̀n pi na.
13 Ka pi i tùnntunmii tun ná sémɛbilʼe saanŋi màrampe kùlugii puni i,
mà li cyêe na pi Yahutuubii puni,
nàɲjyii bâra nàŋkolyee na,
nàŋkopyire bâra cyee na,
pi pi kakyara pi i pi bò,
pi i pi shi kwɔ̀ canŋa niŋkin i,
yiŋke kɛ ná shwɔnwoge canmpyi kɛ ná tanrewuuni,
ná kuru ku ɲyɛ Adari yiŋke ke,
pi i pi cyeyaayi kuu.
14 Sémɛbii mpyi a tun màrampe kùlugii puni i ná sàliyaŋi i ŋgemu u sí n-jwo sùpyire punʼá bà pi si mpyi si ntɛ̀ɛn kuru canŋke tɛɛnlʼe mɛ.
15 Ka tùnntunmpii si fyâlʼa kàre ná sémɛbilʼe cyeyi puni i,
bà saanŋʼà yi jwo mɛ.
Tùnnture mú à sà jwo saanŋi kànhe Suzi i,
mà saanŋi nà Ama ta pi à tɛ̀ɛn na byii.
Ka Suzi kànhe puni si ɲyaha wwurugo.