Maridose à li cya Ɛsitɛri u uru tɛgɛ
4
Maridose à pa lire kani lógo ke,
ka u u u vàanntinŋke cwɔn,
maa cafuboni le maa cwɔɔnre kulʼa wu uye puni naa,
maa jyè na ɲaare kànhe e,
maa ŋkwúuli nàvunŋke cye e.
2 U à sà nɔ saanŋi pyɛnge ɲwɔge na ke,
maa yyére,
ɲaha kurugo yɛ,
wà ɲyɛ a mpyi na jyè saanŋi pyɛnge e ná yamɛsu vàanɲyi i mɛ.
3 Saanŋi tùnnture ná u kakwɔnɲjyahanʼà nɔ u màrampe cyaga maha cyage e ke,
tʼà pyi yyetanhara ninmbwɔrɔ Yahutuubilʼá.
Ka pire si súnŋi le,
maa myahigii sú,
maa mpaare.
Pi niɲyahamilʼà sínni cafubɔrigii ná cwɔɔnre na.
4 Ɛsitɛri báarapyipucyaabii ná u bage saɲcwɔnsigibilʼà pa yire jwo u á ke,
ka u u fyá sèlʼe.
Ka u u vàanɲya kan pi sà ŋkan Maridose á u le,
u u cafuboni wwû,
ŋka Maridose ɲyɛ a ɲɛɛ mɛ.
5 Ɲyɛ ka Ɛsitɛri si Ataki yyere,
uru mpyi saanŋi pyɛnge kacwɔnrɔwɔ,
saanŋi mpyi a uru yaha u yahare e.
Ka Ɛsitɛri si uru tun u sà Maridose yíbe,
nde li ɲyɛ wani ná li ɲùŋke ɲyɛ ŋkemu ke,
si yire cè.
6 Ka Ataki si ŋkàre Maridose cyage e kànhe tafabwɔhe e saanŋi pyɛnge yyetiimpe na.
7 Karigii cyi à pyi ke,
ka Maridose si cyire puni yyaha jwo Ataki á.
Wyɛ́rɛɲwɔge Ama mpyi a jwo uru sí n-kan pi yaha saanŋi nàfuuŋi tayahage e,
saanŋi ká ɲɛnʼa Yahutuubii mbòŋi kuni kan ke,
maa kuru jwo u á mú.
8 Sémɛbii pi mpyi a tɛ̀gʼa Yahutuubii mbòŋi jwumpe caala saanŋi kànhe Suzi i ke,
ka Maridose si uru wà kan Ataki á u sà ɲcyêe Ɛsitɛri na,
u u yi yyaha jwo a fíniŋɛ u á,
maa jwo na Ɛsitɛri u sà saanŋi ɲáara na u ɲwɔ uru shiŋi shiinbii na.
9 Ka Ataki si núrʼa sà Maridose jwumpe taha Ɛsitɛri á.
10 Ka Ɛsitɛri si núrʼa Ataki tun u sà Maridose pyi:
11 «Saanŋi báarapyiibii puni ná u màrampe shiinbii punʼà sàa li cè na sàliya na ɲyɛ,
ŋgemu u ɲyɛ na fî sùpyire puni ɲuŋʼi,
mà li cyêe,
nɔ̀ bâra ceewe na,
shin maha shin ká jyè saanŋi pyɛnge funŋke ntàani na,
mà ta urufoo ɲyɛ a yyere mɛ,
urufolʼà yaa u bò ke.
Saanŋi ká u sɛɛnŋi kàbiini sànha ŋgemu á ke,
uru kanni u maha jà a shwɔ.
Mii wi ke,
mii canmpyaa beɲjaaga na kɛ u ɲyɛ ŋge,
mii sàha yyerʼa shà saanŋi yyére mɛ.»
12 Pi à sà Ɛsitɛri jwumpe jwo Maridose á ke,
13 ka Maridose si Ɛsitɛri ɲwɔ shwɔ:
«Ma hà raa sɔ̂nŋi na mu na ɲyɛ saanŋi pyɛnge e ke,
lire sí mu kanni pyi mu u shwɔ Yahutuubii shwɔhɔlʼe mɛ.
14 Mu aha fyâha niɲjaa,
Yahutuubii sí ntɛ̀gɛŋi ná ɲùŋwuure ta si n-yîri cyage kabɛre e,
ŋka mu ná ma tuŋi pyɛnge si kakyara.
Jofoo bá u à cè kampyi nde tèni kurugo bà mu à pyi saancwoŋi mà yɛ?»
15 Ɲyɛ ka Ɛsitɛri si pi pyi pi sà Maridose pyi:
16 «Sà Suzi kànhe Yahutuubii puni bínni,
yii i súnŋi le mii kurugo.
Yii àha n-lyî mɛ,
yii àha n-bya mɛ,
canmpyaa taanre ná numpiliye taanre funŋʼi.
Mii wi ke,
mii ná na báarapyi cyeebii mú sí súnŋi le.
Lire kàntugo,
mii sí ŋkàre saanŋi yyére,
lire mɛɛ ká mpyi li sí u sàliyaŋi kɛ̀ɛgɛ.
Pi aha mpyi na sí mii bó,
pi na bò.»
17 Ka Maridose si ŋkàrʼa sà yi puni pyi Ɛsitɛri yi jwuŋkanni na.