Ɛsitɛri à lyìmbwoo bégele saanŋi ná Ama á
5
Sunŋi canmpyitanrewuuni,
ka Ɛsitɛri si u saanre vàanɲyi le,
maa ŋkàre saanŋi saanre bage ntàani na.
Saanŋi nintɛɛnŋi mpyi u saanre tatɛɛnge e u saanre bage e,
mà yyaha kan saanre bage ntàani tajyiɲwɔgʼá.
2 Saanŋʼà saancwoŋi Ɛsitɛri niɲjyereŋi ɲya saanre bage ntàani na ke,
ka u kyaa si ntáan u á.
Sɛɛnŋi kàbiini li mpyi u cye e ke,
ka u u lire sànha Ɛsitɛri á.
Ka Ɛsitɛri si file maa bwɔ̀n kàbiini múnaani na.
3 Ka saanŋi si jwo:
«Saancwoŋi Ɛsitɛri,
na ɲaha yɛ?
Ɲaha kyaa li ɲyɛ mu na yɛ?
Mu mɛɛ ká mpyi saanre taaga niŋkin kurugo,
kuru sí n-kan mu á!»
4 Ka Ɛsitɛri si jwo:
«Ká mpyi saanŋi sí ɲɛɛ,
mii à lyìmbwooni ndemu bégele u á ke,
u Ama bâra uye na u a ma lʼá niɲjaa.»
5 Ka saanŋi si jwo:
«Yii fyâlʼa sà Ama yyere yii a ma wuu u sà Ɛsitɛri yini lógo.»
Ka saanŋi ná Ama si ŋkàre Ɛsitɛri yyére lire lyìmbwoonʼá.
6 Mà pi yaha pi i ɛrɛzɛn sinmpe byii,
ka saanŋi si Ɛsitɛri yíbe:
«Ɲaha kyaa li ɲyɛ mu na yɛ?
Kuru sí n-kan mu á.
Ɲaha shi la ku ɲyɛ mu na yɛ?
Mu mɛɛ ká mpyi saanre taaga niŋkin kurugo,
kuru sí n-kan mu á!»
7 Ka Ɛsitɛri si u ɲwɔ shwɔ:
«Yaage kyaa li ɲyɛ mii na ke,
yaage mii ɲyɛ na ɲcaa ke,
kuru ku ɲyɛ ŋke:
8 Ká mpyi mii kyalʼà táan saanŋʼá,
kampyi u sí ɲɛɛ mii yacyage kan mii á si mii funŋke ɲíŋɛ,
saanŋi ná Ama u a ma nùmpanŋa lyìmbwoonʼá,
mii sí lire bégele pi á.
Lire ká mpyi,
mii sí ɲwɔshwɔrɔ kan saanŋʼá.»
Ama la ɲyɛ si Maridose bò
9 Ama funntagawuŋi ná u zòmbilini múguro wuuni lʼá yîri wani kuru canŋke.
Ŋka,
u à ta u Maridose nintɛɛnŋi ɲya saanŋi pyɛnge tajyiɲwɔge na,
u sí ɲyɛ a yîri nta raa ŋko si ɲyɛhɛ uru yyaha na mɛ,
ka u lùuni si yîri sèlʼe Maridose taan.
10 Lire ná li wuuni mú i,
Ama à jà a cû uye na,
maa ŋkàre pyɛngɛ,
maa sà u ceveebii ná u cwoŋi Zerɛsi yyere,
11 maa ɲwɔ le u yarafennte ná u pyìibii ɲyahaŋkanni i na yu pi á,
mà bâra karigii puni saanŋʼà pyi maa u dùrugo,
maa u pêe,
maa tatɛɛngɛ kan u á ɲùŋufeebii ná saanŋi báarapyiibii ɲùŋɔ na ke,
12 maa núrʼà jwo:
«Lire kanni bà mɛ,
sancwoŋi Ɛsitɛri à lyìmbwooni ndemu bégele ke,
mii kanni u à yyerʼa bâra saanŋi na lire ɲjyìŋi na.
U à núrʼa mii yyere nùmpanŋa mà bâra saanŋi na.
13 Ŋka,
lire là ɲyɛ a sìi na mii funŋke ɲíŋini,
mà mii yaha mii i ŋge Yahutunaŋi Maridose nintɛɛnŋi ɲaa saanŋi pyɛnge ɲwɔge na mɛ.»
14 Ka u cwoŋi Zerɛsi ná u ceveebii puni si u pyi:
«Pi yaha pi i cinŋɛ yaa ŋkemu tɔɔnre ti ɲyɛ kàsinmɛɛni sinnagii beeshuunni ná kɛ ke.
Nùmpanŋa ɲyɛ̀gɛ na,
maa li cya saanŋʼá u pi yaha pi i Maridose pwɔ a bò ku na.
Lire kàntugo,
mu funntanga wuŋi sʼa wà ná saanŋi i lyìmbwooni cyage e.»
Ka puru jwumpe si ntáan Ama á,
ka u u pi pyi pi à cinŋke yaa.