Saanŋʼà Maridose pêe
6
Kuru canŋke numpilage e,
ka ŋɔɔmpe si ɲcyere saanŋi yyahʼe.
Ka u u pi pyi pi pa ná kìni katoroŋkwɔgigii sémɛŋi i.
Kìni kalyɛgigii mpyi a sémɛ u e.
Ka pi i uru kâla saanŋʼá.
2 Ka pi i sà yi ta yʼà sémɛ u e,
na saanŋi pyɛnge saɲcwɔnsigii shuunni,
Bigitan ná Terɛsi mpyi a vùnŋɔ pwɔ saanŋi Asirusi na si u bò,
ka Maridose si pi ɲwɔhɔ múgo.
3 Ka saanŋi si yíbe:
«Pèente ntire ná kacɛnni ndire lʼà pyi Maridose á lire kani kajyilʼe yɛ?»
Ka saanŋi báarapyiibii si jwo:
«Yafyin!»
4 Ka saanŋi si jwo:
«Jofoo u wa pyɛnge ntàani na yɛ?»
Lirʼà Ama ta u u nɔni saanŋi pyɛnge ntàani na,
si mpa li cya u á u Maridose kan pi pwɔ a bò cinŋke na,
u mpyi a pi pyi pi à kuru ŋkemu yaa lire mɛɛ na ke.
5 Ka báarapyiibii si saanŋi pyi:
«Ama u wa pyɛnge ntàani na.»
Ka saanŋi si jwo:
«Na u jyè.»
6 Ka Ama si jyè,
ka saanŋi si u yíbe:
«Saanŋi la ká mpyi si sùpyaŋi ŋgemu pêe ke,
ɲaha shi u à yaa u pyi urufolʼá yɛ?»
Ka Ama si jwo uye funŋʼi:
«Mii baare e,
jofoo saha saanŋi la ɲyɛ si mpêe yɛ?»
7 Ka Ama si saanŋi ɲwɔ shwɔ:
«Saanŋi la ká mpyi si sùpyaŋi ŋgemu pêe ke,
8 pi pa ná saanŋi vàanntinŋke nindeŋke kà ná u shwɔnge niduguge kʼe,
saanre ɲùntoŋkʼà tò ŋkemu ɲùŋɔ na ke.
9 Pi i mpa vàanntinŋke ná shwɔnge le saanŋi fànhafembwɔhe kà cye e.
Sùpyaŋi saanŋi la ɲyɛ si mpêe ke,
fànhafembwɔhe si vàanntinŋke le urufoo na,
pi i u dùrugo shwɔnge ɲuŋʼi,
pi i ɲaare ná u e pyɛnkuuŋi i,
pi raa ŋkúuli u yyaha yyére fànha na,
na:
“Saanŋi la ká mpyi si sùpyaŋi ŋgemu pêe ke,
amɛ u maha urufoo pyi!”»
10 Ka saanŋi si Ama pyi:
«Fyâlʼa sà vàanntinŋke lwɔ́ maa shwɔnge cû.
Yahutunaŋi Maridose nintɛɛnŋi u ɲyɛ saanre bage tajyiɲwɔge na ke,
maa li pyi urʼá bà mu à yi jwo mɛ.
Ma hà funŋɔ wwɔ̀ ma niɲjwumpe pà niŋkin na mɛ.»
11 Ka Ama si vàanntinŋke lwɔ́ maa shwɔnge cû,
maa vàanntinŋke le Maridose na,
maa u pyi u à dùgo shwɔnge ɲuŋʼi,
maa ɲaare ná u e pyɛnkuuŋi i,
maa ŋko fànha na u yyaha yyére:
«Saanŋi la ká mpyi si sùpyaŋi ŋgemu pêe ke,
amɛ u maha urufoo pyi!»
12 Lire kàntugo,
ka Maridose si nùrʼa kàre saanŋi pyɛnge tajyiɲwɔge na.
Ka Ama nàvunŋɔ wuŋi si u yyahe tò,
maa fyâlʼa kàre u pyɛnge e.
13 Nde lʼà u ta ke,
ka u u sà lire yyaha jwo u cwoŋi Zerɛsi ná u ceveebii punʼá.
Ka u yɛrɛfeebii ná u cwoŋi Zerɛsi si u pyi:
«Maridose yyaha taan fahantʼà ɲwɔ cû na nɔni mu na ke,
uru na ɲyɛ Yahutu.
Lirʼà li cyêe na mu saha sì n-jà yafyin pyi u na mɛ,
ŋka mu sí n-sìi n-kwôro sʼa ntîri u ɲwɔhʼi!»
14 Mà pi yaha puru jwumpe na,
ka saanŋi tùnntunmpii pìi si mpa,
maa fyâlʼa kàre ná Ama e Ɛsitɛri lyìmbwooni niɲjaani talyige e.