Ama mbòŋi
7
Ka Saanŋi ná Ama si ŋkàre saancwoŋi Ɛsitɛri yyére lyìmbwooni talyige e.
2 Mà pi yaha lyìmbwooni toozhwɔnwoge na,
ka saanŋi si núrʼa Ɛsitɛri pyi:
«Saancwoŋi Ɛsitɛri,
ɲaha kyaa li ɲyɛ mu na yɛ?
Kuru sí n-kan mu á.
Ɲaha shi la ku ɲyɛ mu na yɛ?
Mu mɛɛ kampyi saanre taaga niŋkin kurugo,
kuru sí n-kan mu á!»
3 Ka saancwoŋi Ɛsitɛri si u ɲwɔ shwɔ:
«Ei saanŋi,
kampyi mii kyalʼà táan mu á,
kampyi mu sí ɲɛɛ,
na múnaani lo.
Lire mii ɲyɛ na ɲcaa mu á.
Na shiŋi shiinbii shwɔ,
lire lage ku ɲyɛ mii na.
4 Ɲaha kurugo yɛ,
mii ná na shiinbilʼà pɛ́rɛ si wuu kakyara si wuu shi bò,
si wuu shi pînniŋɛ.
Ká mpyi wuu mpyi a pɛ́rɛ si mpyi bilinambaa ná bilicyee kanna,
mii mpyi na sí yaaga jwo mɛ.
Ŋka,
pi aha wuu bò,
wuu zàmpɛɛnbii sí saanŋi pyi u pɔɔ̂ɔn yaagʼe u sàha sì ŋkemu ta mɛ.»
5 Ka saanŋi Asirusi si saancwoŋi Ɛsitɛri pyi:
«Jofoo u ɲyɛ urufoo yɛ?
Ɲùŋgagafooŋi u ɲyɛ na ŋko raa lire pyi ke,
taa u ɲyɛ ke?»
6 Ka Ɛsitɛri si jwo:
«Wuu kyéregefooŋi ná wuu zàmpɛnŋi u ɲyɛ Ama shinpiŋi ŋge.»
Ka Ama si fyá fo na ɲcyɛ̂ɛnni saanŋi ná saancwoŋi yyaha na.
7 Ka saanŋi lùyiriwuŋi si yîri lyìmbwooni cyage e mà kàre u saanre pyɛnge funŋke cikɔɔge e.
Ka Ama si ŋkwôro na saancwoŋi Ɛsitɛri ɲáare u u ɲwɔ uru na,
ɲaha kurugo yɛ,
u mpyi a li cè saanŋi i,
na u sí uru bò.
8 Saanŋʼà yîri u pyɛnge cikɔɔge e mà núru na wà lyìmbwooni tapyige bage e ke,
mà sà Ama niɲcwuŋi ta Ɛsitɛri yasinniŋke na.
Ka saanŋi si jwo:
«Saancwoŋi yabiliŋi na u la ɲyɛ si ɲcwo mii ɲyii na la?»
Saanŋʼà puru jwumpe yige u ɲwɔge e cyage ŋkemu i ke,
ka pi i ntílʼa Ama yyahe tòa.
9 Saanŋi pyɛnge kacwɔnrɔŋi mɛge ku ɲyɛ Aribona ke,
ka uru si jwo:
«Maridose u à saanŋi múnaani lo ke,
Ama mpyi a cinŋɛ yaa uru mbòŋi mɛɛ na.
Kuru cinŋke ku ŋke kʼà cûru Ama pyɛnge e,
ku tɔɔnre ɲyɛ kàsinmɛɛni sinnagii beeshuuni ná kɛ.»
Ka saanŋi si jwo:
«Yii Ama pwɔ ku na yii bò.»
10 Ka pi i Ama pwɔ a bò cinŋke na,
u mpyi a kuru ŋkemu yaa Maridose mɛɛ na ke.
Ka saanŋi lùuni si nta a tɛ̀ɛn.