Sàliyaŋi u à tìŋɛ Yahutuubii sinama kurugo ke
8
Kuru canŋke yabiliŋi,
ka saanŋi Asirusi si Yahutuubii zàmpɛnŋi Ama pyɛnge kan saancwoŋi Ɛsitɛri á.
Ka Maridose si ŋkàre saanŋi yyére,
ɲaha kurugo yɛ,
Ɛsitɛri mpyi á yi jwo saanŋʼá na uru cìnmpworo wi.
2 Kampefegeŋi saanŋi mpyi a shwɔ Ama na ke,
ka u u uru kan Maridose á.
Ka Ɛsitɛri si Maridose tìŋɛ Ama pyɛnge ɲùŋɔ na.
3 Lire kàntugo,
ka Ɛsitɛri si núrʼa sà jwo ná saanŋi i.
U à sà niŋkure sín u taan,
u mɛsuwuŋi,
maa u ɲáara na Agagi tùluge shinŋi Ama mpyi a pege ná kapiini ndemu bégele Yahutuubii mɛɛ na ke,
u lire fyìinnɛ.
4 Ka saanŋi si u sɛɛnŋi kàbiini sànha Ɛsitɛri á,
ka u u yîrʼa yyére saanŋi yyaha yyére,
5 maa jwo:
«Ká mpyi saanŋi sí ɲɛɛ,
kampyi u sí ɲwɔ mii na,
kampyi saanŋi ɲyii wuu li,
kampyi mii kyalʼà táan saanŋʼá,
Amedata jyaŋi Ama u ɲyɛ Agagi tùluge shin ke,
sémɛbii u mpyi a sémɛ mà li cyêe na pi Yahutuubii bò saanŋi màrampe kùlugii puni i ke,
saanŋi u lɛtɛrɛ sémʼa tɛ̀gʼa lire fyìinnɛ.
6 Lire baare e,
di mii sí n-jà n-yyére si kapiini ɲya tapyige e na shiinbii na yɛ?
Di mii sí n-jà pi nimbompii wíi n-jwo yɛ?»
7 Ka saanŋi Asirusi si saancwoŋi Ɛsitɛri ná Yahutunaŋi Maridose pyi:
«Yii wíi,
mii à Ama pyɛnge kan Ɛsitɛri á,
Ama sʼà pwɔ a bò cinŋke na,
ɲaha kurugo yɛ,
u mpyi a ntùŋke taha Yahutuubii na.
8 Yii sémɛ yaa saanŋi mɛgɛ na yii ɲyii yaaŋkanna na,
Yahutuubii ɲùɲaara na,
yii i saanŋi kampefegeŋi fyèŋi yaha u na.
Ɲaha kurugo yɛ,
sémɛ ká yaa saanŋi mɛgɛ na ná u kampefegeŋi fyèŋi i,
wà jìnʼa uru kɛ̂ɛnŋɛ mɛ.»
9 Lire tèni yabiliŋi i,
yyeeni yiŋke tanrewoge ku ɲyɛ Sivan yiŋke ke,
kuru canmpyibeɲjaaga ná tanrewuuni i (23),
ka pi i saanŋi sémɛsemɛbii yyere,
maa semere pyi mà tàanna ná Maridose niɲjwumpe puni i,
mà kan Yahutuubii ná fànhafeebii ná kìni ɲùŋufeebii ná saanŋi màrampe kùlugii ŋkuu ná beɲjaaga ná baashuunniŋi (127) yyaha yyére shiinbilʼá,
mà lwɔ́ Ɛndi kìni na,
mà sà nɔ Etiyopi wuuni na.
Semere mpyi à pyi mà tàanna ná kùlu maha kùlu semere pyiŋkanni ná shi maha shi shɛnrɛ jwuŋkannʼi,
maa Yahutuubii wuubii pyi mà tàanna ná pi semere pyiŋkanni ná pi shɛɛnre jwuŋkanni i mú.
10 Pi à semere pyi saanŋi Asirusi mɛge na,
maa u kampefegeŋi fyèŋi bwɔ̀n sémɛbii puni na mà kan tùnntuunmilʼá,
pi à sà ŋkan ná saanŋi shwɔnyi nintaatan wuyi yʼe.
11 Saanŋi mpyi a kuni kan Yahutuubilʼá pire sémɛbilʼe,
na pi sí n-jà piye bínni si kàshige kwɔ̀n pi múnahigii zhwoŋi kurugo.
Supyishi o shi ká yîri kùlu maha kùlʼe mà cwo Yahutuubii ná pi pyìibii ná pi cyeebii na,
ná kàshikwɔnyaayʼe ke,
na Yahutuubii pi wà piye na,
pi i pirefee kakyara,
pi i pi shi bò,
pi i pi shi pînniŋɛ,
pi i pi cyeyaayi kuu.
12 Pi i lire pyi canŋa niŋkin i saanŋi Asirusi màrampe puni i,
Adari yiŋke ku ɲyɛ yyeeni yiŋke kɛ ná shwɔnwoge ke,
kuru canmpyi kɛ ná tanrewuuni i.
13 Sémɛbii mpyi a yaa pi tun màrampe kùlugii puni i ná sàliyaŋi i,
ŋgemu u sí n-jwo sùpyire punʼá,
na Yahutuubii sí n-bégele lire canmbili i,
si pi ŋkooŋi wwû pi zàmpɛɛnbii na ke.
14 Ka pire sémɛbii kanfeebii si dùgo saanŋi shwɔnyi na,
maa fyâlʼa kàrʼa sà tùnnture pyi mà tàanna ná saanŋi ti jwuŋkanni i.
Tire tùnntunre mú à nɔ saanŋi kànhe Suzi i.
15 Ka Maridose si yîri saanŋi cyage e.
Saanra vàanntinŋɛ mpyi u na.
Kuru yyahe mpyi cwɔ̀nrɔlwɔhɔ fiige maa fíniŋɛ.
Sɛɛnŋi saanre ɲùntoŋɔ ná vànntinmbwɔhɔ niɲyɛngɛ tafyinɲɛ wogo mú mpyi u na.
Suzi kànhe mpyi a ɲî funntanga kwuuyi na.
16 Lʼà pyi funɲiŋɛ nà funntanga ná múguro ná pèenɛ Yahutuubilʼá.
17 Saanŋi tùnnture ná u sàliyaŋʼà nɔ kùlu maha kùlu ná kànha maha kànhʼe ke,
yire puni Yahutuubii mpyi funntange ná múguroŋi i.
Ka pi i lyìmbwoo yaa,
maa kataan pyi kuru canŋke.
Ka shi niɲyahawa supyire sí piye kɛ̂ɛnŋʼa pyi Yahutuu,
ɲaha kurugo yɛ,
pi mpyi a fyá Yahutuubii yyaha na.