Yahutuubilʼà pi ŋkoo wwû pi zàmpɛɛnbii na
9
Yyeeni yiŋke kɛ ná shwɔnwoge ku ɲyɛ Adari yiŋke ke,
kuru canmpyi kɛ ná tanrewuuni mpyi canmbile,
ndemu i saanŋi tùnnture ná u sàliyaŋi kuni mpyi a yaa li ɲaara ke.
Yahutuubii zàmpɛɛnbii mpyi na sɔ̂nŋi na pire sí n-jà Yahutuubii na kuru canŋke,
ŋka yʼà pa mpyi yabɛrɛ.
Ka Yahutuubii si jà pi zàmpɛɛnbii na.
2 Saanŋi Asirusi màrampe kùlugii puni i,
kànha maha kànha na Yahutuubii mpyi ke,
ka pi i wà piye na.
Mpii la ku mpyi si kapiini pyi pi na ke,
maa ɲcwo pire na.
Wà ɲyɛ a jà a yyérʼa pi sige mɛ,
ɲaha kurugo yɛ,
shiŋi sanŋi puni sùpyire mpyi a fyá pi yyaha na.
3 Ka kùlugii yyaha yyére shiinbii ná fànhafembwoyi ná ɲùŋufeebii ná saanŋi kacwɔnribii,
ka pire puni si Yahutuubii tɛgɛ Maridose yyaha fyagare na.
4 Maridose mpyi saanŋi pyɛnge e shinbwo,
u mɛge mpyi a fworo kùlugii cyeyi puni i.
U fànhe mpyi na ɲyahage na wà.
5 Ka Yahutuubii si kàshikwɔnŋwɔɔni tɛ̀gʼa pi zàmpɛɛnbii puni tùn,
maa pi kakyara maa pi bò.
Pi à pi ɲyii wuuni pyi pi zàmpɛɛnbii na.
6 Suzi kànhe e,
Yahutuubilʼà shiin ŋkwuu kaŋkuro (500) bò,
7 maa Parisandata ná Dalifɔn ná Asipata,
8 ná Porata ná Adaliya ná Aridata,
9 ná Parimasita ná Arizayi ná Aridayi ná Vayezata bò mú.
10 Pire shiin kɛŋi u mpyi Yahutuubii kyéregefooŋi Amedata jyaŋi Ama jyaabii.
Ŋka,
pi ɲyɛ a pi cyeyaayi kuu mɛ.
11 Sùpyire tʼà bò Suzi kànhe e ke,
tire pɛ̀rɛgʼà jwo saanŋʼá kuru canŋke.
12 Ka saanŋi si saancwoŋi Ɛsitɛri pyi:
«Yahutuubilʼà shiin ŋkwuu kaŋkuro (500) kakyara maa pi bò naha Suzi kànhe e,
mà bâra Ama jyaabii kɛŋi na.
Ɲaha pi sí n-jà n-ta pi à pyi saanŋi màrampe kùlugii saanŋkilʼe bɛ?
Ɲaha shi kyaa li ɲyɛ mu na yɛ?
Kuru sí n-kan mu á!
Ɲaha shi mu ɲyɛ na ɲcaa sahaŋki yɛ?
Mu sí kuru ta!»
13 Ka Ɛsitɛri si saanŋi pyi:
«Ká mpyi saanŋi sí ɲɛɛ,
kuni li kan Suzi kànhe Yahutuubilʼá,
nde pi à pyi niɲjaa ke,
pi i lire fiige pyi sahaŋki nùmpanŋa pi tàanna ná sàliyaŋi jwumpe e,
pi i Ama jyaabii kɛŋi buwuubii pwɔ ciyi na.»
14 Ka saanŋi si kuni kan pi li pyi amuni.
Ka pi i uru sàliyaŋi jwumpe caala Suzi kànhe e.
Ka pi i Ama jyaabii kɛŋi buwuubii pwɔ dùrugo cinɲyi na.
15 Ka Suzi kànhe Yahutuubii si núrʼa wà piye na Adari yiŋke canmpyi kɛ ná sicyɛrɛwuuni i,
maa shiin ŋkwuu taanre (300) bò Suzi kànhe funŋke e,
ŋka pi ɲyɛ a bwɔ̀n pi cyeyaayi na mɛ.
16 Yahutuubii sanmpiipi mpyi saanŋi màrampe kùlugii saanŋkilʼe ke,
ka pire si wà piye na,
si pi munahigii shwɔ.
Pi à piye shwɔ pi zàmpɛɛnbii na,
maa yyeɲiŋɛ ta.
Pirʼà shiin kampwɔhii beetaanre ná kɛ ná kaŋkuro (75.000) bò pi zàmpɛɛnbilʼe,
ŋka pi ɲyɛ a bwɔ̀n pi cyeyaayi na mɛ.
17 Lirʼà pyi Adari yiŋke canmpyi kɛ ná tanrewuuni i.
Ku canmpyi kɛ ná sicyɛrewuuni,
ka Yahutuubii si lire ŋɔ̀ maa li pyi funntanga kataan canŋa.
18 Yahutuubii pi mpyi Suzi kànhe e ná pi mpyi a wà piye na yiŋke canmpyi kɛ ná tanrewuuni ná ku kɛ ná sicyɛrewuuni i ke,
ka pire si yiŋke canmpyi kɛ ná kaŋkurowuuni ŋɔ̀,
maa lire pyi funntanga kataan canŋa.
19 Lire kurugo,
Yahutuubii pi ɲyɛ bùgure ná kànpyɛɛre e ke,
pire maha Adari yiŋke canmpyi kɛ ná sicyɛrɛwuuni ŋɔ̀ni,
maa lire pyi funntanga kataan canŋa,
maa yalyire kaan piyʼá.
Purimu kataanni
20 Maridose à cyire karigii sémɛ mà tùugo saanŋi Asirusi màrampe kùlugii puni Yahutuubii punʼá,
labiire wuu bâra latɔɔngɔ wuu na,
21 maa yi jwo pi á na pi a Adari yiŋke canmpyi kɛ ná sicyɛrɛwuuni ná canmpyi kɛ ná kaŋkurowuuni pyi kataan yyee maha yyee,
22 ɲaha kurugo yɛ,
cyire canmpyaagilʼe pi à piye shwɔ pi zàmpɛɛnbii na,
maa yyeɲiŋke ta.
Kuru yiŋke e,
pi yyetanharʼà ŋkɛ̂ɛnŋʼa pyi katanra,
ka pi nàvunŋke si ŋkɛ̂ɛnŋʼa pyi funntanga.
U à jwo na pi cyire canmpyaagii pyi funntanga kataan canɲya,
ɲjemu i pi sí raa yalyire kaan piyʼá sʼa ma yaaya kaan fòŋɔfeebilʼá ke.
23 Ka Yahutuubii si Maridose jwumpe kuni ɲaara lire kataanni mpyiŋi cye kurugo,
pi mpyi a lire ndemu ɲwɔ cû ke,
maa ŋkwôro na lire pyi yyee maha yyee.
24 Agagi tùluge shinŋi Amedata jyaŋi Ama u mpyi Yahutuubii kyéregefooŋi ke,
uru mpyi a vùnŋɔ pwɔ Yahutuubii na,
maa Purimuŋi pyi,
lire ɲwɔhe ku ɲyɛ,
mà ŋkyaanlwooni pyi si canmbile cè,
ndemu i pi sí Yahutuubii shi bò ke.
25 Ŋka Ɛsitɛri à shà saanŋi yyére ke,
ka saanŋi si sémɛ yaa mà li cyêe na Ama mpyi a vùnmpwɔɔre ntemu pyi Yahutuubii mbòŋi mɛɛ na ke,
lire kani li cwo u na.
Ka pi i u ná u jyaabii pwɔ a dùrugo cinɲyi na.
26 Lire kurugo pi maha cyire canmpyaagii pyi Purimu.
Kuru mɛgʼà fworo Puri i,
lire ɲwɔhe ku ɲyɛ:
«Mà ŋkyaanlwooni pyi.»
Mà tàanna ná sémɛŋi funŋɔ jwumpe ná nde pi mpyi a ɲya ná nde li mpyi a pi ta ke,
27 ka Yahutuubii si sàa li lwɔ́,
si li fànhe cyán pi ná pi tùluyi nimpaɲyi ná mpii puni pi à piye pwɔ pire na ke,
yyee maha yyee,
sʼa kataanni pyi ɲcyii canmpyaagii shuunniŋi i,
si ntàanna ná cyi sémɛŋkanni ná tèni niɲcyeeni i,
cyi kyaa na.
28 Pi tùluyi nimpaɲyi punʼà yaa pi funŋɔ cwo cyire canmpyaagii na,
si cyi pyi kataan pi pyɛnyi puni ná kùlugii puni ná kànyi puni i.
Uru Purimuŋi canmpyaagii kataanni ɲyɛ a yaa li yyére Yahutuubii shwɔhɔlʼe,
pi tùluhi nimpaɲyi yi kwɔ̀ a funŋɔ wwɔ̀ cyi na mɛ.
29 Abiyɛli pworoŋi Ɛsitɛri u ɲyɛ saancwoŋi ke,
ka uru ná Yahutunaŋi Maridose si sémɛ shwɔnwu sémʼa tun mà tɛ̀gʼa Purimuŋi kataanni mpyiŋi fànha cyán pi na.
30 Ka pi i sémɛbii tun saanŋi Asirusi màrampe kùlugii ŋkuu ná beɲjaaga ná baashuunniŋi (127) Yahutuubii punʼá.
Yyeɲiŋke ná yakilitɛɛnre jwumpe pu mpyi pi e.
31 Li mpyi a cya Yahutuubilʼá pire sémɛbilʼe,
na pi a Purimu kataanni pyi li tèepyilʼe bà Yahutunaŋi Maridose ná saancwoŋi Ɛsitɛri mpyi a yi jwo pi á mɛ.
Li mpyi a kyaalʼa yaha amuni pi yabilimpii ná pi tùluyʼá,
bà pi súnleni ná mɛsuuni wuuni mpyi a pyi mɛ.
32 Lire pyiŋkanni na,
Ɛsitɛri tùnnture niɲjwuurʼà Purimu kataanni mpyiŋi tígile.
Cyire karigii punʼà sémɛ sémɛŋi i.