Wuu mɛɛ cêe Siŋi Punifooŋi Kile á
147
Yii Kafooŋi kêe!
Mà mɛɛ cêe maa wuu Kileŋi kêe,
lirʼà ɲwɔ,
u ná lirʼà yaa.
2 Kafooŋi Kile sí núru Zheruzalɛmu faanra,
u sí Izirayɛli shiinbii nimbwɔnɲcaabii bínni piye e.
3 Mpimu u zòmpyaa cyi na sóre ke,
u sí pire zòompii taala,
si pire tabannayi wyɛrɛ pyi.
4 Uru u à wɔ̀rigii tɔ̀rɔ,
maa mɛyɛ le cyi puni niŋkin niŋkinŋi na.
5 Wuu Kafooŋi à pêe,
u fànhʼà ɲyaha,
tɛgɛlɛ ɲyɛ u taceŋke na mɛ.
6 Mpii pi à piye tîrige ke,
Kafooŋi maha pire yîrige,
ŋka u maha shinpiibii tîrigʼa cyán ɲìŋke na.
7 Yii fwùkanmyahigii cêe Kafooŋi á,
yii myahigii cêe ná mpòoŋke e,
yii i wuu Kileŋi kêe.
8 Uru u maha ɲahaɲyi tɛ̀gʼa nìɲyiiŋi tò,
maa zànhe cyán ɲìŋke na,
maa ɲyɛge pyi kʼà fyîn ɲaɲyi ɲuŋʼi.
9 U maha yalyire kaan yatɔɔrʼá,
saɲcyɛnpyiyi ká a mɛɛ súu katege na,
u maha yalyire kan yʼá.
10 U kuro ɲyɛ shwɔnge fànhe e mɛ,
sùpyaŋi fànhe ɲyɛ yafyin u á mɛ.
11 Kafooŋi ɲyii shiinbii pi ɲyɛ u yyahafyagare feebii,
pire mpimu pi à pi sɔ̀nŋɔre taha u cɛ̀nmpe na ke.
12 Zheruzalɛmu,
Kafooŋi kêe,
Siyɔn,
fwù kan ma Kileŋi á,
13 ɲaha kurugo yɛ,
u à mu tajyiɲwɔyi yashwɔhɔyi bìli,
maa jwó lwɔ́ mu pyìibii na.
14 U maha yyeɲiŋke kan mu kìnʼá,
maa ɲjyìŋi niɲcyɛnŋi kan mu à lyî a tìn.
15 U maha u tùnnture tùugo ɲìŋkʼá,
u jwumpe torʼà wyɛ̀rɛ.
16 U maha kafeɲiŋke ŋɔ́ɔ maha ntɛ̀gʼa cyage puni fíniŋɛ mpà shire fiige,
maa kàkuraŋke tɛ̀gʼa cyage puni tò cwɔnrɔ fiige.
17 U maha zànhafuɲcɛɛnɲyi wà kafaaya fiige,
yire wyeere kurugo,
jofoo u sí n-jà n-yyére yɛ?
18 Ɲyɛ,
u aha jwo,
yi maha ɲa,
u aha u kafɛɛge fwɔ,
lwɔhe maha fwu na wà.
19 U à u jwumpe cyêe Yakuba na,
maa u ɲyii wuuni ná u kakwɔnɲjyahigii cyêe Izirayɛli na.
20 U sàha lire fiige pyi supyishiŋi wabɛrʼá mɛ,
pire wà ɲyɛ a u kakwɔnɲjyahigii cè mɛ.
Yii Kafooŋi kêe!