Kafooŋi u ɲyɛ wuu tɛgɛfooŋi
146
Yii Kafooŋi kêe!
Mii zòmbilini li Kafooŋi Kile kêe.
2 Mà mii yaha shì na,
mii sí raa Kafooŋi kêre,
mii sí raa ŋkèeŋi myahigii cêe na Kileŋi á na shìŋi canmpyaagii puni i.
3 Yii àha yii sɔ̀nŋɔre taha fànhafeebii na mɛ,
sùpyii pi kanna,
pi sì n-jà wà shwɔ mɛ.
4 Pi munaani ká fworo pi e,
pi maha núru pwoore e,
pi karigii punʼasi yyére kuru canŋke.
5 Ŋgemu ká uye tíiŋɛ Yakuba u Kileŋi na,
maa u sɔ̀nŋɔre taha Kafooŋi uru Kileŋi na ke,
urufoo wuunʼà ɲwɔ.
6 Uru u à nìɲyiiŋi na ɲìŋke dá,
ná suumpe lwɔhe ná ku funŋɔ yaayi puni.
U sí n-kwôro ɲwɔmɛɛ foo fo tèekwombaa.
7 Ɲcwu à pyi mpimu na ke,
u maha pire tanga kan,
u maha yalyire kan kategefeebilʼá.
Kafooŋi maha bilibii cye yaha.
8 Kafooŋi maha fyinmpii pyi pi i ɲaa,
Kafooŋi maha shincwuubii yîrige,
shintíibii kyalʼà táan Kafooŋi á.
9 Kafooŋi maha nàmpwuunbii sanɲcwɔnŋi sigili,
u maha yaha círimpii ná leŋkwucyeebii na,
ŋka u maha shinpiibii karigii kɛ̀ɛgɛ.
10 Kafooŋi sí n-kwôro Saanwa tèrigii puni i,
Siyɔn,
mu u Kileŋi sí n-kwôro fo tèekwombaa.
Yii Kafooŋi kêe!