Yaayi puni yʼa fwù kaan tèrigii puni i Kileŋi sèe wuŋʼá
145
Ŋkèeŋi mɛɛni,
Dawuda mɛɛni là.
Mii Kileŋi ná mii Saanŋi,
mii sí mu pêe
mii sí mu mɛge kêe tèrigii puni i fo tèekwombaa.
2 Canŋa maha canŋa,
mii sí fwù kan mu á,
sʼa mu mɛge kêre tèrigii puni i fo tèekwombaa.
3 Kafooŋi Kile à pêe,
u à yaa ná ŋkèeŋi i,
u à pêe,
tɛgɛlɛ ɲyɛ tire na mɛ.
4 Lyeɲwɔyi yʼa mu kapyiiŋkii yu yʼa ŋkaan yiyʼá,
yʼa mu kabwɔhigii kyaa yu,
5 yi raa yi yu,
na mu à sàa pêe,
mu lemɛ mú sʼà ɲwɔ,
yi raa sì yʼa núruli mu kabwɔhigii kurugo.
6 Sùpyire sí raa mu fànhaɲyahaga fyagara kapyiiŋkii kyaa yu,
mii sí raa mu mpèeŋi kyaa yu.
7 Sùpyire sí mu kacɛɛnŋkii nimpyiiŋkii yaha tiye funŋʼi,
sʼa cyi kyaa yu,
sʼa mu ntìiŋi kyaa yu ná funntanga nimbwɔhʼe.
8 Kafooŋi u ɲyɛ ɲùɲaare ná ɲùmpiŋke foo,
u lùuni ɲyɛ a wyɛ̀rɛ mɛ,
u sʼà ɲî cɛ̀nmpe na.
9 Kafooŋi à ɲwɔ sùpyire punʼá,
u ɲùŋkʼà pi ná u yadayi puni i.
10 Kafooŋi,
mu yadayi puni yʼa mu pêre,
mu yyahafyagare feebii puni pi a mu kêre.
11 Pi a mu Saanre sìnampe kyaa yu,
pi raa mu sífente kyaa yu,
12 bà sùpyire si mpyi si mu kakyanhala karigii cè,
si mu Saanre niɲcɛnnte sìnampe kyaa cè mɛ.
13 Mu Saanre na ɲyɛ tèekwombaa woro,
mu sí na ɲùŋɔfente pyi lyeɲwɔyi puni ɲuŋʼi.
14 Mpii pi à cwo ke,
Kafooŋi maha pire yîrige.
U maha tùbukurubii puni yîrigʼa yyéreŋɛ.
15 Mu pire puni ɲyɛ na wíi,
mu u yalyire kan pirʼá ti tère e.
16 Mu maha ma cyɛge múgo,
maa ɲyiiyaayi kan fo maha yi funɲyi ɲíŋɛ.
17 Kafooŋi à tíi u kapyiiŋkii puni i,
u na ɲyɛ ɲwɔmɛɛ foo u karigii puni i.
18 Kafooŋi à byanhara u yyerefeebii puni na,
pire mpimu pi na u yiri ná sèeŋi i ke.
19 U maha u yyahafyagarefeebii ɲyii wuuni pyi pi á,
u aha pi tùbilini lógo,
u maha pi shwɔ.
20 Kafooŋi maha u tàanɲɛɛbii puni kàanmucaa,
ŋka u maha shinpiibii puni shi bò.
21 Mii ɲwɔge kʼa Kafooŋi ŋkèeŋi myahigii cêe,
yadaɲyi puni yi pèenɛ taha u mɛge niɲcɛnŋke na,
tèrigii puni i fo tèekwombaa.