Saanŋi kileɲarage
144
Dawuda mɛɛni là.
Kafooŋi Kile u kêe,
mii kafaage,
uru u à mii taanna yoge na,
maa mii bégele kàshige mɛɛ na.
2 Uru u ɲyɛ mii tɛgɛfooŋi ná mii kàshisulubage,
mii kàanmucyafooŋi ná mii shwofooŋi,
mii tɔɔnnte yabeŋke ná mii taŋwɔhɔge.
Uru u maha sùpyire le mii tooyi ɲwɔhʼi.
3 Ei Kafooŋi,
sùpyaŋʼà sìi ɲaha shi fo mu na ntɔ̀rɔ u e yɛ?
Supyibilini na ɲyɛ ɲaha shi fo ka mu u yaha li na yɛ?
4 Sùpyaŋi na ɲyɛ mu à jwo kafɛɛgɛ,
u shìŋi canmpyaagii na ɲyɛ mu à jwo mbyimɛ pu tùuli.
5 Kafooŋi,
nìɲyiŋi fɛ̂ɛn ma a ntîge,
bwɔ̀n ɲaɲyi na,
ma a yi pyi yʼa naŋguuruge yige.
6 Kileɲini wà ma tɛ̀gʼa zàmpɛɛnbii caala,
tàanbii wà ma tɛ̀gʼa pi cɛɛgɛ.
7 Tɛ̀ɛn nìɲyiŋi i ma a ma cyɛge sànha,
ma a na shwɔ,
ma a na dìrʼa yige lwɔhe niɲcuguge e,
ma a na shwɔ supyishiŋi sanŋi shiinbii na,
8 pire mpimu pi maha finni pi ɲwɔyi i,
pi si maha pi kàniŋɛ cyeyi yîrige maa ŋkâre kafinare ɲuŋʼi ke.
9 Ei Kile,
mii sí mɛɛ nivɔnnɔ cêe mu á,
mii sí mɛpyaa kɛ ŋkɔ̀nnɔŋi tɛ̀gɛ si mɛɛ cêe si mu kêe.
10 Mu u maha saanbii shwuu,
mu u à ma báarapyiŋi Dawuda shwɔ boore kàshikwɔnŋwɔɔni na.
11 Na shwɔ,
ma a na yige supyishiŋi sanŋi shiinbii cye e,
pire pi maha finni pi ɲwɔyi i,
pi si maha pi kàniŋɛ cyeyi yîrige maa ŋkâre kafinare ɲuŋʼi.
12 Wuu pùnampyire ti pyi ti nàɲjiige tèni i,
mu à jwo cire nivyinvɔnnɔ,
ntemu ti na yîri ná fànhʼe ke.
Wuu pùcempyire ti sìnama ta,
mu à jwo yasinaɲyi yi maha yaha saanŋi bage e si ntɛ̀gɛ ku lemɛ ɲwɔ ke.
13 Wuu bwɔ̀nhigii cyi ɲî sùmaŋi shiŋi puni na.
Wuu yatompyɛɛre ti púgʼa pyi kampwɔhii niɲyahigii,
ti pyi kampwɔhii kɛ kɛ tatɛɛnyɛ niɲyahaya,
wuu sige e.
14 Wuu nìiyi yi púgo,
kakyara kà wuu ta mɛ,
wuu zànmpɛn kʼàha ɲjà wuu kuu ŋkàre mɛ,
tùbili kà núru n-fworo wuu pyɛnkuuŋi i mɛ.
15 Supyishiŋi ŋgemu ká mpyi lire pyiŋkanni na ke,
uru wuunʼà ɲwɔ,
Kafooŋi ɲyɛ supyishiŋi ŋgemu u Kileŋi ke,
uru wuunʼà ɲwɔ.