Ntɛ̀gɛŋi kileɲarage
143
Dawuda mɛɛni là
Kafooŋi Kile,
na ɲarage lógo,
ma niŋgyiini cyán ma a na parage lógo.
Na ɲwɔ shwɔ ma ɲwɔmɛfente,
ná ma ntìiŋi kurugo.
2 Ma hà yoge kwɔ̀n ma báarapyiŋi na mɛ,
ɲaha kurugo yɛ,
sùpyaŋi wà tufiige ɲyɛ a tíi mu yyahe taan mɛ.
3 Mii zàmpɛnŋi na ɲyɛ mii munaani kurugo,
u à mii cyán ɲìŋke na sʼa fwòoŋi.
U à mii myîgimɛ numpini i,
kwulyeyi fiige.
4 Mii yatanɲyi puni na ŋkwûu mii na,
mii funŋkʼà sàa pɛn.
5 Mii funŋʼà cwo tèni nintoroni na,
mu kapyiɲjyɛhigii na ɲyɛ mii funŋʼi,
mii na sɔ̂nŋi mu cyɛge kapyiiŋkii na.
6 Mii à na cyeyi yîrige mu á si mu ɲaare,
mu kani na ɲyɛ mii na,
bà lwɔhe kani maha mpyi ɲìŋgage na mɛ.
Shelaa
7 Na ɲwɔ shwɔ fwɔ fwɔ Kafooŋi,
mii à sàa nɔ na tɛgɛni na.
Ma hà ma yyahe ŋwɔhɔ na na mɛ,
lire baare e,
mii sí n-pyi fanɲjyiibii fiige.
8 Ɲyɛ̀ge ni sàa múgo ke,
ma cɛ̀nmpe cyêe na na,
ɲaha kurugo yɛ,
mu na mii à na sɔ̀nŋɔre taha.
Kuni mii à yaa mii i lwɔ́ ke,
lire cyêe na na,
ɲaha kurugo yɛ,
mii à naye tíiŋɛ mu na.
9 Kafooŋi,
na shwɔ na zàmpɛɛnbii na,
mu u ɲyɛ mii taŋwɔhɔge.
10 Na taanna ma ɲyii wuuni mpyiŋi na,
ɲaha kurugo yɛ,
mu u ɲyɛ mii Kileŋi.
Mu sɔ̀nŋɔre niɲcɛnnte ti mii yyaha cû kuntiini i.
11 Kafooŋi,
shì kan na á,
ma mɛge kurugo.
Na yige yyefuge e ma ntìiŋi kurugo.
12 Na zàmpɛɛnbii puni shi bò ma cɛ̀nmpe kurugo,
na kyéregefeebii puni shi pînniŋɛ,
ɲaha kurugo yɛ,
mii ɲyɛ mu báarapyi.