Yii mɛɛ nivɔnnɔ cêe Kafooŋi á
149
Yii Kafooŋi kêe!
Yii mɛɛ nivɔnnɔ cêe Kafooŋi Kile á,
yii mɛɛ cêe yii i u kêe u yyahafyagarefeebii nimbinnibii shwɔhɔlʼe.
2 Izirayɛli,
ta múgure ma dávooŋi kurugo,
Siyɔn kànhe shiinbii pi pyi funntange e pi Saanŋi kurugo.
3 Pi pèente taha u na ná kwɔ̀hɔre e,
pi i u ŋkèeŋi myahigii cêe ná pinre ná ŋkɔ̀nnɔŋi i.
4 Ɲaha kurugo yɛ,
Kafooŋi à u ɲɛɛmpe ta u shiinbilʼá,
mpii pi à piye tîrige ke,
u à zhwoŋi pyi yaleere pire na.
5 Kile yyahafyagarefeebii pi pyi funntange e pi i pèenɛ taha u na,
pi a funntanga kwuuyi wàa pi tasinayi i.
6 Kile ŋkèeŋi myahigii cyi pyi pi ɲwɔyi i,
ɲwɔyɔ shuunni kàshikwɔnŋwɔntanyi yi pyi pi cye e,
7 si ntɛ̀gɛ nàvunŋɔ kwɔ̀ supyishiŋi na,
sùpyirʼà yaa ná ndemu i ke,
si lire pyi ti na,
8 si yɔ̀rɔyi le pi saanbii na,
si tɔɔnɲyi le pi fànhafeebii tooyi na,
9 ɲcɛ̀ɛgɛŋi kyaa li mpyi a séme pi kyaa na ke,
si uru cyán pi na,
lire sí ɲùɲjirire kan Kile yyahafyagarefeebii puni á.
Yii Kafooŋi kêe!