Kafooŋi, yyefugofooŋi tɛgɛfooŋi
141
Dawuda mɛɛni là.
Kafooŋi Kile,
mii na mu yiri,
fyâlʼa pa na tɛ̀gɛ.
Mii aha mu yyere,
na yini lógo.
2 Na ɲarage yaha ku táan mu á nùguntanga wusuna fiige.
Mii ɲarage cyeɲjirigini li pyi mu á yàkoŋɔ ɲwɔ sáraga fiige.
3 Kafooŋi,
yaha na ɲwɔge na,
na ɲwɔseeyi kàanmucya jwuɲjwumbaampe na.
4 Ma hà na zòmbilini yaha li dìri kapyimbaala kurugo,
li kwɔ̀ a kapii pyi ná kapiimpyiibilʼe mɛ.
Ma hà na yaha sì n-lyî ná pi e pi yalyire e mɛ.
5 Shintíiŋi u mii bwɔ̀n,
mii à ɲyii yige lire kurugo.
U aha yogo jwo mii na,
lire na ɲyɛ wyɛrɛ mii á,
mii sì n-cyé ti na mɛ.
Ŋka mii na Kile ɲáare,
pi karigii kà ɲwɔ mɛ.
6 Pi yukyaabii ká wà kafaage ɲuŋʼi,
pi sí li cè na mii jwumpe mpyi a táan.
7 Bà faapyiŋi maha ɲìŋke jya a cɛɛgɛ mɛ,
amuni pi kaciiyi sí n-cɛɛgɛ fanɲyi ɲwɔge naa.
8 Mu mii ɲyɛ na wíi Kafooŋi Kile,
mu u ɲyɛ mii taŋwɔhɔge,
na yaha ɲyii na.
9 Kànhaɲyi pi à cyán mii na ke,
na shwɔ yi na,
na shwɔ ntìimbaaŋi pyifeebii fuuyi na.
10 Shinpiibii yaha pi cû pi yabilimpii kànhaɲyi nimpɛrɛɲyi na,
mii si shwɔ yi na.