Shinpiibii yyahafyagare kileɲarage
140
Mɛceŋkuruŋke yyaha yyére shinŋi.
Dawuda mɛɛni là.
2 Kafooŋi Kile,
na yige shinpiibii cye e,
ma a na shwɔ shinkyanyi na.
3 Kapiini li ɲyɛ pi zòmpyaagilʼe,
kàshige na pi ɲyɛ canŋa maha canŋa.
4 Pi à pi ɲjìrigii jwɔgɔ wwò fiige,
màcwɔnŋi sɔɔnre na ɲyɛ pi ɲwɔseeyi ɲwɔhʼi.
Shelaa
5 Kafooŋi,
shinpiibii sige na na
ma a na shwɔ shinkyanyi na,
pi ɲyɛ na sɔ̂nŋi labɛrɛ na mii ɲcyànŋi bàare e mɛ.
6 Yàmpeenɛfeebii pìlʼà fuuge ná mɛɛre pwɔ mii yyaha na,
pi à cwò pɛrɛ mii kuni i,
pi à fuugo pɛrɛ mii yyaha na.
Shela
7 Mii à yi jwo Kafooŋi á:
«Mu u ɲyɛ mii u Kileŋi.
Kafooŋi,
ma niŋgyiini cyán ma a na ɲarage lógo.»
8 Kafooŋi Kile,
mii shwofooŋi fànhaɲyahaga wuŋi,
mu à yaha mii ɲùŋke na kàshige canŋke.
9 Kafooŋi,
ma hà shinpiibii ɲyii wuuni yaha li pyi mɛ,
ma hà pi funŋɔ kani yaha li yili mɛ,
lire baare e,
pi sí piye pêe.
Shela
10 Mpii pi à mii kwûulo maa mii fugure ná pi ɲwɔjwumpe e ke,
pi ɲwɔjwumpe nimpimpe núruŋʼa cyán pi ɲuŋʼi.
11 Naŋkyanhigii wu pi na,
pi wà nage e,
kacyewyicuguŋke e,
pi ahà n-jà n-fworo wani mɛ.
12 Jwumpimpe jwufooŋi kà n-sìi cyaga ta ɲìŋke na mɛ,
yyefuge ku sàa li taha supyikyange na.
13 Mii à li cè na Kafooŋi sí tànga kan kanhamafooŋʼá,
si fòŋɔfooŋi pyi sèeŋi foo.
14 Sèeŋi na,
shintíibii sí mu mɛge kêe,
shincɛnmpii sí n-tɛ̀ɛn mu taan.