Kile à mii karigii puni cè
139
Mɛceŋkuruŋke yyaha yyére shinŋi.
Dawuda mɛɛni là.
Kafooŋi Kile,
mu à mii zòmbilini suguro,
maa mii karigii puni cè.
2 Mu à mii nintɛ̀ɛnŋi ná mii niɲjìriŋi cè,
mu à mii sɔ̀nŋɔre cè tatɔɔngʼe.
3 Mu à mii niɲaraŋi ná mii nizinniŋi cè,
mu à mii kapyiiŋkii puni cè.
4 Mà mii yaha mii sàha ŋkwɔ̀ a na ɲwɔge múgo jwumpe na mɛ,
lire maha mu ta mu à pu cè Kafooŋi.
5 Mu na ɲyɛ mii kàntugo maa mpyi mii yyaha na,
mu à ma cyɛge taha mii na.
6 Uru ɲcèŋi kakyanhala wuŋʼà fànha tò mii na,
u à tòro mii pɛ̀rɛge taan.
7 Taa mii sí n-kàre si laaga tɔɔn mu na ke?
Taa mii sí n-fê n-sà ŋwɔhɔ mu yyaha na ke?
8 Mii aha dùgʼa kàre nìɲyiŋi na,
mu na ɲyɛ wani,
mii aha ntîgʼa sínni ɲìŋke ɲwɔhʼi,
mu u ŋge wani.
9 Mii mɛɛ ká funkanya yigʼa kàre canŋafworompe tɛgɛni na,
maa núrʼa sà naye ta suumpe lwɔhe tɛgɛni na,
10 ali wani,
mu cyɛge sí raa mii kɛ̂ɛnŋi,
mu kàniŋɛ cyɛge sí mii cû.
11 Mii aha jwo:
«Numpini li pa na tò,
mii kwùumpe bɛ̀ɛnmpe pu kɛ̂ɛnŋʼa pyi numpire,»
12 mu á,
numpini jìnʼa pyi numpire mɛ,
numpini maha mpyi bɛ̀ɛnmɛ canŋa fiige,
numpini ná bɛ̀ɛnmpʼà tàanna mu á.
13 Mu u à mii funŋɔyaayi yaa,
maa mii puni sogo sogo naye na mii nuŋi funŋke e.
14 Mii fwù ɲyɛ mu na,
mu mii yaaŋkanni kakyanhala wuuni kurugo.
Mu yadaɲyi punʼà ɲwɔ,
mii à sàa lire cè.
15 Tèni i mii cyeere mpyi na yaa taŋwɔhɔge e mii nuŋi funŋke e,
maa mii sogo sogo naye na ke,
mii kaciige katufiige ɲyɛ a mpyi a ŋwɔhɔ mu na mɛ.
16 Mà mii ta mii sàha si mɛ,
mu ɲyii mpyi mii na.
Mii canmpyaagii nimpyiiŋkii puni mpyi a sémɛ mu sémɛŋi i,
mà li ta li là sàha nɔ mɛ.
17 Ei Kile,
mu funzɔnŋɔrʼà fànha tò mii na!
Ti pɛ̀rɛge sì n-jà n-cè mɛ!
18 Di mii sí n-jà ti tɔ̀rɔ ɲjwo yɛ?
Tʼà ɲyaha nticɛnŋi na.
Mii aha ɲɛ̀ tère o tère e ke,
mii maha mu ta ná naye e.
19 Ei Kile,
ká mpyi mu mpyi na si ɲɛɛ shinpiŋi bò,
yii shinbuumpii,
yii laaga tɔɔn na na.
20 Pi maha mu mɛge lwɔ́ maha ntɛ̀gɛ na kapegigii pyi,
mu zàmpɛɛnbii maha finni ná mu mɛge e.
21 Kafooŋi,
mu màpɛngefeebii kyaa ɲyɛ a yaa li pɛn mii á mà?
Mpii pi à ntùŋke taha mu na ke,
pire la ɲyɛ a yaa li wwû mii na mà?
22 Mii à pi kyaa pɛn nayʼá fo màpɛnge tɛgɛni,
pi à pyi mii zànmpɛnmii.
23 Kile,
na sugurʼa fyiinnɛ ma a na zòmbilini cya a cè,
na suguro ma a na sɔ̀nŋɔre cya a cè.
24 Wíi,
ká mpyi mii wa kumpiini i,
ma a na yyaha cû a le ma tèekwombaa kuni i.